Байгаль орчны сайд асан Д.Цогтбаатар олон улсын  өнөөгийн нийгэм, эдийн засаг, улс төрийн нөхцөл байдлын талаар өөрийн санаа бодлыг илэрхийлжээ.

Тодруулбал тэрбээр өөрийн цахим хуудаснаа "Өнөөгийн олон улсын байдлыг ажиглаад байх нь ээ "Хүйтэн Дайн II" эхэлчихсэн мэт санагдав. "Хүйтэн дайн I" 1945 оноос 1990- оныг хүртэл үргэлжилсэн. Уг дайны онцлог нь талцлын хоёр үндсэн төвтэй, дэлхийн түвшингийн зэвсэгт мөргөлдөөнгүй (халуун дайнгүй) хирнээ бүс нутаг, улс орны түвшинд дайн тулаантай, тэр тулаан нь мөн чанартаа гол хоёр сөргөлдөгч талын хүний нутагт хийж буй тулаантай байдагт оршиж байсан. Энэ дайны бусад шинж чанараас шинжвэл уг дайн нь дэлхийн эдийн засгийг маш их алдагдалд (ялангуяа алдагдсан боломж талаас нь авч үзвэл) хүргэсэн, үзэл суртлын хурц өрсөлдөнийг дагуулсан байдаг. Энэ бүгдээс улбаалаад бүлэглэл, блокууд бие биенийхээ эсрэг төрөл бүрийн хориг арга хэмжээг харилцан авч, дайсагнал улам эрчимждэг нь тодорхой. Бас энэ хуваагдал, утгагүй өрсөлдөөнөөс залхсан орнууд төвийг сахих, Эвсэлд үл нэгдэх хөдөлгөөнд эвсэх зэргээр зайгаа аль, аль талаас барихыг хичээдэг байв.

Өнөөгийн нөхцөл байдал томоохон өгөгдөхүүний хувьд үүнээс юугаараа ялгаатай байна?

Хэрэв "Хүйтэн дайн II" үнэхээр эхэлсэн бол дэлхийн түүхэн дэх энэ шинэ үзэгдэл зүгээр нэг томъёо төдий байхгүй нь ойлгомжтой. Үүнтэй холбогдуулаад бид Монголдоо олон зүйлийг шинээр харж, гарч болзошгүй хор уршигаас нь урьдчилан сэргийлэхэд чиглэсэн цөөнгүй шинэ бодлого, арга хэмжээг сэдэж хэрэгжүүлэх шаардлагатай болно. Ер нь бидний хувьд маш олон зүйл өөрчлөгдөх шаардлагатай болно. Одоогийнхоо завхарсан улс төр, эв нэгдэлгүй байдалтайгаа байвал бид хохирол амсана" хэмээн бичжээ.