Чуулганы нэгдсэн хуралдааны үдээс өмнөх хуралдаанаар Амгалан дулааны цахилгаан станцын тоног төхөөрөмжийг Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүдийг хэлэлцэж дууслаа.

Хурлын эхэнд УИХ-ын гишүүн Ө.Энхтүвшин “09.00 цагт ажил эхлэх байсан ч цагийн дараа эхэлж байна. Өчигдөр “давхар дээл”-тэй сайд нар төрийн ажил гацаахгүй, хуралдаа байнга сууна гэсэн болоод л хуулийн төслийг унагасан юм байгаа биз дээ.  Гэтэл одоо хар. Хуралдаа орж ирээгүй байна. Үүнтэй холбоотойгоор горимын санал гаргамаар байна. Цаашид сайд нарын ирцийг бүрдүүлж байж МАН-ын гишүүд картаа хийнэ. Өөрсдийнхөө ашиг сонирхлыг хөндөж байгаа асуудал дээр бүгд суудаг мөртлөө өөр асуудлууд дээр огт ирдэггүй. “Давхар дээл”-ийг хэн гацаасныг ард түмэн сайн харж байгаа. Та нар л хагас жил гацааж сунжруулчихаад эцэст нь унагалаа. Бид ингэж л тэмцэхгүй бол та нар бүр галзуурах нь ээ. Чуулганд сайд нар ирсний дараа л бид картаа хийнэ шүү. Өглөө бид цагтаа ирчихээд сайд нарыг чинь л хүлээнэ” гэсэн юм. Ингээд үүний дараа УИХ-ын дарга З.Энхболд Үйлдвэр хөдөө аж ахуйн сайд Х.Баттулгын албан тушаалаасаа чөлөөлөгдөх хүсэлт гаргасан тухай танилцуулсны дараа үндсэн асуудлаа хэлэлцлээ.

    “Амгалан дулааны станц” баригдсанаар нийслэлийн зүүн хэсгийн айл өрхийн дулааны хэрэгцээ, ачааллыг бүрэн хангах бөгөөд ингэснээр дулааны асуудлыг шийдвэрлэх, Улаанбаатар хотын агаарын бохирдлыг бууруулах зэрэгт онцгой ач холбогдолтой тул тус станцын барилга угсралтын ажилд шаардагдах импортын тоног төхөөрөмжийг гаалийн болон нэмэгдсэн өртгийн албан татвараас чөлөөлөхөөр дээрх хуулийн төслүүдэд тусгагджээ. Эдгээр хуулийг баталсан өдрөөс нь эхлэн энэ оны 12 дугаар сарын 31-ний өдрийг хүртэл хугацаанд дагаж мөрдөнө гэсэн Улсын Их Хурлын гишүүн С.Ганбаатарын гаргасан зарчмын зөрүүтэй саналаар санал хураахад хуралдаанд оролцсон гишүүдийн олонх энэ саналыг дэмжлээ.

    Үүгээр дээрх асуудлын анхны хэлэлцүүлгийг дуусгаж улмаар хоёр дахь хэлэлцүүлэгт бэлтгүүлэхээр холбогдох Байнгын хороонд шилжүүлэв.

    Харин одоо УИХ-ын чуулганы хуралдаанаар Засгийн газраас өргөн мэдүүлсэн Эдийн засгийг идэвхижүүлэх зарим арга хэмжээний тухай УИХ-ын тогтоолын төслийн анхны хэлэлцүүлгийг хийж байна. Тус тогтоолын төслийн анхны хэлэлцүүлгийг өчигдөр чуулганаар хийх үед Оюутолгойн далд уурхайтай холбоотой асуудлаар УИХ дахь МАХН-МҮАН-ын “Шударга ёс” эвслийн бүлэг завсарлага авсан юм. Завсарлагын хугацаа өнөөдөр дууссанаар тогтоолын төслийн хэлэлцүүлэг үргэлжилж байгаа нь энэ юм.

    УИХ дахь МАХН-МҮАН-ын “Шударга ёс” эвслийн бүлгийн даргын тайлбараар Оюутолгой төслийн далд уурхайн асуудлаар ойлголцолд хүрсэн байна. Харин УИХ-ын гишүүн О.Баасанхүү “Ганц өдрийн завсарлагаар ойлголцолд хүрсэн гэхэд итгэхгүй байна. Асуудлыг дахин нягтлах шаардлагатай, тиймээс тогтоолын төсөлд тусгасан Оюутолгойн далд уурхайн ажлыг эрчимжүүлэхэд УИХ, Засгийн газар бодлогын дэмжлэг үзүүлнэ гэх заалтыг дэмжих боломжгүй байна” гэсэн юм.

Чуулганы нэгдсэн хуралдаан үргэлжилж байна.