ҮАБЗ-ийн 2014 оны гуравдугаар сарын 11–ний өдрийн ажлын уулзалтаар улс орны санхүү, эдийн засгийн өнөөгийн байдлын талаар холбогдох сайдын мэдээллийг сонсч,  “Чингис” бондын хөрөнгийн зарцуулалтын талаар ҮАБЗ-д албан ёсоор танилцуулах нь зүйтэй гэж үзсэн билээ. Үүний дагуу Эдийн засгийн хөгжлийн яамнаас албан бичгээр “Чингис” бондын зарцуулалтын талаарх мэдээллийг ҮАБЗ-д ирүүлсэн боловч тодорхой дүгнэлт хийж шийдвэр гаргахад хангалтгүй байна хэмээн үзжээ.

Иймд ҮАБЗ-ийн 2012 оны арванхоёрдугаар сарын 3-ны өдрийн “Засгийн газрын үнэт цаасны талаар авах зарим арга хэмжээний тухай” 28/20 дугаар зөвлөмжийн биелэлтийг заалт нэг бүрээр гаргаж Засгийн газрын хуралдаанаар хэлэлцээд ҮАБЗ-ийн тавдугаар сарын 6-ны өдрийн хуралдаанд албан ёсоор танилцуулахыг Монгол Улсын Ерөнхийлөгчөөс Засгийн газарт үүрэг болголоо.

Уг зөвлөмжийн биелэлтийг танилцуулахдаа бондын зарцуулалт, эргэн төлөлт, тавих хяналтад шаардагдах нэмэлт эрх зүйн орчинг бүрдүүлсэн болон бондоос төсөл, хөтөлбөр сонгон санхүүжүүлэх асуудлыг Засгийн газрын хуралдаанаар хэлэлцэн шийдвэрлэсэн байдал, бондын хөрөнгөөр Монгол Улсын эдийн засгийн бие даасан байдал, аюулгүй байдлыг бэхжүүлэхэд чиглэсэн төсөл, хөтөлбөрийг тэргүүн эгнээнд санхүүжүүлсэн байдал, бондоос нэг төсөл, хөтөлбөрт хийх санхүүжилт нь тухайн төслийн нийт санхүүжилтийн гуравны нэгээс хэтрэхгүй байх тухай зөвлөмжийн 2.3-ын заалтын хэрэгжилт, бондоос санхүүжүүлэх төсөл, хөтөлбөрийг сонгохдоо ил тод, хариуцлагатай байх зарчмыг хэрэгжүүлсэн болон бондоос санхүүжүүлэх төсөл, хөтөлбөр нь заасан хугацаандаа хэрэгжиж байх зарчмыг хэрэгжүүлсэн байдал, бондоос санхүүжүүлэх төсөл, хөтөлбөрийн сонголтыг иргэний хяналтан дор хэрэгжүүлсэн байдал зэргийг тусгахыг чиглэл болгожээ.

Мөн “Чингис” бондын зарцуулалт, үлдэгдлийн дэлгэрэнгүй тайланг хавсаргах, “Чингис” бондыг ирэх гурван жилд эргэн төлөх эх үүсвэр, хуваарийг тодорхой болгохыг үүрэг болголоо.