УИХ-ын чуулганы үдээс өмнөх хуралдаанаар “Эдийн засгийг эрчимжүүлэх зарим арга хэмжээний тухай" УИХ-ын тогтоолын төслийг хэлэлцсэн. Энэ үеэр гишүүд өөрсдийн байр суурийг илэрхийлж асуулт асуусан юм.

Тодруулбал УИХ-ын гишүүн Сү.Батболд “Аль ч нам  Засгийн эрхэнд  гарсан  улс орныхоо хөгжлийн бодлогыг тууштай, тогтвортой урт хугацааны баримтлал, чиг хандлагатай байлгая гэж боддог.  Бид ч мөн адил   энэ бодлогыг  барьсаар  ирсэн.  Сөрөг хүчин л гэсэн шиг бүх юман  дээр сөрөг байдаг гэж биднийг шүүмжилдэг ч улс орныхоо эрх ашгийг хөндсөн асуудал дээр бид харин саналаа нэмэрлэж, ярилцах ёстой юм. Тунхаглал,  хүсэл мөрөөдлийн жагсаалт, үндэслэлгүй  тоо гаргаж дугуйг дахин бүтээх хэрэгггүй. Улс орны хөгжлийн макро эдийн засгийн гол, гол үзүүлэлтүүд, хүний хөгжлийн томоохон индексүүд, бусад улс оронтой харьцуулсан харьцуулалт гэх мэт тодорхой хэдэн үзүүүлэлтээр дүгнэдэг ийм систем рүү орох ёстой юм. Үе үеийн Засгийн газруудынхаа үйл ажиллагааг ч ингэж дүгнэдэг болох хэрэгтэй. Ингэж байж Засгийн газрын бодлого нь тогтвортой, хэмжүүртэй болж үр дүнг нь ч дүгнэхэд хялбар. Эдийн засгийг эрчимжүүлэх  төлөвлөгөө энэ агуулгад нийцэж  чадаж байна уу, УИХ-ын бусад гишүүдийн өргөн барьсан хуулийн төслүүдтэй хэр уялдаж өгч байгаа вэ” гэлээ.

Харин УИХ-ын гишүүн Д.Зоригт хариуд нь Эдийн засгийг эрчимжүүлэх энэ төлөвлөгөөндөө бид 4 зорилт тавьж байгаа. Хөгжлийн төлөвлөлт нь сонгуулийн амлалтад өртөмтгий, савладаг. Энэ төлөвлөгөөгөөр тэр савалгааг алга болгоно гэж бодож байгаа. Өргөн  утгаараа олон улсын жишигт нийцүүлсэн тэдний туслалцаа дэмжлэг авсан ийм төлөвлөгөө болсон” гэсэн хариултыг өгөв.