Сү.Батболдыг МАН-ын дарга, Ерөнхий сайд байхад түүний Засгийн газрыг огцруулахаар өөрийнх нь намын гишүүд өргөх бичиг барин гүйж байв. Тэд Оюутолгойн хөрөнгө оруулалтын гэрээг сайжруулсангүй гэж үзсэн бөгөөд нийт 11 гишүүн нэгдсэн юм. Харамсалтай нь тоогоо 19 болгож чадаагүй. МАН-ынхаа даргын тэргүүлсэн Засгийн газрыг огцруулах ёстой гэж үзсэн гишүүдийн дунд Д.Балдан-Очир, Б.Бат-Эрдэнэ, Ц.Батбаяр, Ц.Даваасүрэн нар байв. Тэд МАН-ынхаа удирдлагыг, Засгийн тэргүүнийг, зарим сайдуудыг нэр цохон дурдаж огцрох ёстой гэж шуугиулж явав. Тэглээ гээд тэднийг МАН-ынхан намаасаа хөөгөөгүй. Бас зарим нь тухайн үеийн Эрдэс баялаг, эрчим хүчний сайд Д.Зоригтыг огцрох ёстой гэж албан тоот өгсөн. МАН-ынхан сайдыгаа ч хамгаалсан. Намын эсрэг олон долоон юм бурсан гишүүддээ хариуцлага тооцно гээгүй өнгөрсөн.

    Харин тухайн үеийн МАН-ын Ерөнхий нарийн бичгийн дарга У.Хүрэлсүх өргөх бичиг барьж гүйсэн гишүүдтэйгээ нэг бүрчлэн уулзаж ойлголцсон төдийгүй, гишүүдийнхээ үзэл бодлыг хүндэтгэнэ, ардчилсан нийгэмд байх л үзэгдэл, ойлголцлын зөрүүгээ арилгана гэсэн төвч байр суурийг илэрхийлсэн нь цахим ертөнцөд үлдэж.

    Энэ үйл явдлын дараа МАН-ынхан ямар ч байсан өөрийн гишүүдээ хөөгөөгүй юм. Элдэв сүртэй үйл явдал ч болоогүй. Харин МАН гишүүдийнхээ үзэл бодлыг хүндэтгэж байна. Манай нам ардчилалтай учир асуудлыг дэврээхгүй. Гишүүдийн тавьсан асуудлыг шийдвэрлэхийн төлөө ажиллана гэсэн тайлбар хийж байжээ.

    Сонирхолтой нь ардчилалыг өмчилж, тунхагладаг АН дотор хэдэн жилийн өмнө МАН-д болж байсан шиг ийм үйл явц өрнөж, нэмэгдэхүүний байрлал өөрчлөгджээ. Юуны өмнө УИХ-ын гишүүн Р.Бурмаагаа засагаа огцруулах гэж санал өгсөн гэдэг шалтгаанаар хөөх шийдвэрээ гаргачихав. Өөрийн үзэл бодлоороо саналаа өгсний төлөө шүү дээ. Одоо тэгээд УИХ-ын дарга З.Энхболдыгоо бас хөөхөөр ярилцаж эхэллээ. Бас л намын эсрэг санал өглөө гэж. Гэтэл МАН-ынхан намын даргаа огцруулна гэж удаа дараа хэвлэлээр мэдэгдэж, албан тоот барьж гүйсэн нөхөдүүдээ яагаа ч үгүй үлдээсэн.

    Эндээс энэ хоёр намын аль нь ардчилсан, аль нь дарангуйлагч болон хувирсныг ойлгож болох юм. Уг нь АН-ынхан хамгийн их ардчилал, шударга ёс, үзэл бодлоо нээлттэй илэрхийлэхийг сурталчилж ирсэн. Тэгсэн мөртлөө тийм үнэлэмжээр асуудалд хандсан гишүүдээ ард түмний өмнө хөөнө гэж зарлаад байгаа нь нэг л ойлгомжгүй нөхцлийг үүсгэв.

    АН-ын оронд МАН-ынхан гишүүдээ хөөж байсан бол гайхах зүйлгүй л дээ. АН-ынхан тэгсэн болохоор л ард түмэн гайхаад л. МАН-ынхан болохоор тэгээгүй. Харин ч ардчилсан байдлаар асуудалд тулхтай хандаж. Гишүүдийнхээ үзэл бодлыг хүндэтгэж байнаа гэсэн дипломат үг хэлээд л байж. Ард түмний толгой үнэхээр эргэж эхлэв.

    Ямар ч байсан АН-ынхан Засгийн эрхэд гарахаараа гишүүдээ хатуурхадаг коммунист хүчин болсноо ард түмний нүдэн дээр нотлов. Харин МАН-ынхан нь ардчилал, шударга ёс, иргэний нийгэм, иргэдийн оролцоо, төлөөллийн ардчилал, социал демократ үзэл суртал ярьдаг болчихов. Хоёрхон жилийн дотор л ингэж “алга урвуулах”-ын дайтай хугацаанд хоёр том намын үнэт зүйл өөрчлөгдчихлөө.