УИХ дахь МАН-ын бүлэг хуралдаж хоёр асуудлыг хэлэлцсэн байна. Энэ долоо хоногт УИХ-ын чуулганаар хэлэлцэх Ашигт малтмалын тухай хуульд өөрчлөлт оруулах хуулийн төслийг алдаатай, тодорхой бус хууль болсон гэж бүлгээс үзсэн байна. Тус хуульд тусгагдсан "Төсвийн мөнгөөр нөөцийг нь тогтоосон хайгуул хийсэн бол 51, 34 хувиас дээшхийг төр эзэмших ёстой гэсэн заалт байсан ч 51 хүртэл, 34 хүртэл гэж өөрчилсөн байна. Энэ нь тодорхойгүй байгаа нь гадаад, дотоодын хөрөнгө оруулагчдад тодорхой бус, ойлгомжгүй байдлыг үүсгэнэ гэж МАН-ын бүлэг үзжээ.

Тиймээс тус заалтуудыг тодорхой болгож өөрчлөхын тулд УИХ-аар нухацтай хэлэлцэх ёстой гэдэг дээр байр сууриа нэгтгэсэн байна. Мөн Хилийн зурваст, Тусгай хамгаалалтай газар нутагт ашигт малтмалын үйл ажиллагаа эрхлэх зөвшөөрлийг УИХ хэлэлцэх ёстой гэсэн хуулийн заалтыг өөрчилж Засгийн газарт эрх мэдлийг нь шилжүүлж байгааг эсэргүүцэж байна гэв. Энэ нь УИХ-ын бүрэн эрхт халдсан үйлдэл гэж тус бүлгээс үзэж байгаа аж.

Бүлгийн хуралдаанаар дараагийн хэлэлцсэн асуудал нь Эдийн засгийг эрчимжүүлэх тогтоолын төсөл юм. Монгол улсын зээлжих зэрэглэл буурч, долларын ханш 1805 хүрсэн. Энэ нь эдийн засаг хүндэрч буйг илтгэж байгаа. Тиймээс Эдийн засгийг хүндэрүүлсэн зарим сайд нартайгаа хариуцлага тооцохыг Ерөнхий сайд Н.Алтанхуягаас шаардаж буйгаа энэ үеэр мэдэгдлээ. Хэрвээ шаардлагыг хэрэгжүүлэхгүй бол Ерөнхий сайдыг огцруулах асуудлыг хөндөнө гэв.

Тус бүлгээс Х.Баттулга сайдын асуудлаар мөн байр сууриа илэрхийллээ.

Бүлгийн дарга С.Бямбацогт энэ талаар "Х.Баттулга сайд өөрийн хүсэлтээр өргөдлөө өгсөн. Нэгэнт ажиллаж чадахгүй гэдгээ илэрхийлсэн байхад Р.Амаржаргал гишүүн шиг хүчээр авч үлдэхгүй байх.  Ийм шийдвэрийг УИХ хүчээр гаргахгүй байх" гэв.