УИХ дахь "Шударга ёс" эвслийн бүлэг өнөөдөр хуралдаж Авто замын тээврийн салбарт төрөөс баримтлах бодлогыг баримт бичгийн төсөл УИХ-д өргөн баригдсантай холбогдуулан Зам тээврийн сайд А.Гансүхийн мэдээллийг сонссон байна. Төмөр замд хэрэгжиж байгаа бодлоготой холбогдуулан гишүүд асуулт асууж тодруулжээ. Мөн Ашигт малтмалын тухай хуулийн төсөлд нэмэлт өөрчлөлт оруулах хуулийн төслийг энэ 7 хоногийн байнгын хороо, УИХ-ын чуулганаар хэлэлцэхтэй холбогдуулан Уул уурхайн сайд Д.Ганхуягаас мэдээлэл сонсжээ. Үүний дараа бүлгийн дарга Н.Батцэрэг сэтгүүлчдийн сонирхсон асуултад хариулт өглөө.

-Төмөр замын ажил ямар шатанд явагдаж байгаа бол. Санхжүүжилт зогссон гэх мэдээлэл байна?

-Эдийн засгийн хөгжлийн сайд төмөр замын бүтээн байгуулалтанд бондын санхүүжилтээс шаардлагатай байгаа хөрөнгийн эх үүсвэрийг хуваарилсан гэж хэлж байгаа. Харин Гансүх сайдын мэдээллээр 20 хэдэн сая долларыг авч хэрэглэсэн байгаа, бусад мөнгөө Хөгжлийн банкнаас авч чадаагүй байна гэсэн тайлбарыг өгч байна. Гаргасан санхүүжилтийн хэмжээг харах юм бол төлөвлөсөн ажил төдийлөн сайн яваагүй байна гэж харж байна.

-Х.Баттулга сайд огцрох хүсэлтээ өгсөн. Өнгөрсөн хугацаанд ҮХААЯ-ыг хэрхэн ажилласан гэж дүгнэж байгаа вэ?

-Үйлдвэр хөдөө, аж ахуйн сайд Х.Баттулга УИХ-ын чуулганд хандаж гарах хүсэлтээ тавьсан. Байнгын хороогоор хэлэлцэх асуудалд орж ирээгүй байна. Ер нь бол сайд ажил хийж байснаа гэнэтхэн чөлөөлөгдөх өргөдлөө өгөөд, гараад явчихаж болохгүй. Ажил хариуцсан хугацаандаа юу хийсэн бэ, юу хийхээр төлөвлөж байсан зэрэг асуултууд хариултаа хүлээж байна. Сайдаас өөрөөс нь  дэлгэрэнгүй мэдээлэл аваагүй байж байр суурь илэрхийлэх нь зохимжгүй.

-О.Баасанхүү гишүүн Х.Тэмүүжин сайдыг огцруулах тухай хуулийн төсөл өргөн барьсан. Тэрээр уучлалт гуйвал өргөдлөө татна гэдэг байр сууриа илэрхийлсэн. Өнөөдрөөс Х.Тэмүүжин уучлалт гуйсан гэсэн мэдээлэл цацагдаж эхэллээ?

-Үүнтэй холбоотой асуудлаар гишүүн мэдээлэл өгөөгүй байна. Ер нь бол хоорондын харьцаагаар уучлалт гуйж, тоглодог тийм зүйл байж болохгүй. Огцруулах тухай үндэслэлийг УИХ дээр нилээд нухацтай ярина. Түүнээс биш хоорондын хувийн ааш, араншингаар хөөцөлдөж байгаа бол тэндээ ярих хэрэгтэй.

-Ашигт малтмалын тухай хуулийн төслийн мэдээллийн талаар тодруулбал?

-Өнгөрсөн хугацаанд геологийн мэдээллийн сан төдийлөн хэрэгжиж чадахүй байсан. Тиймээс бүх мэдээллийн сангаа нэгтгэдэг чиг үүрэгт оруулж өгөх ёстой гэж үзсэн. Хэлэлцүүлгийн явцад илүү сайжруулаад оруулж ирнэ.