УИХ-ын гишүүн Г.Уянга УИХ дахь Бие даагчдын бүлэгтэй хамтран сайд нарын "давхар дээл"-ийг тайлахын тулд Үндсэн хуульд өөрчлөлт оруулах хуулийн төсөл боловсруулан өргөн барих гэж байна. Энэ талаар УИХ-ын гишүүн Г.Уянгаас тодрууллаа. 

- Энэ заалтыг өөрчилснөөр Үндсэн хуулийн аль зүйл заалтад, ямар өөрчлөлт орж байгаа вэ?

-Үндсэн хуулийн 29.1-д УИХ-ын гишүүн Засгийн газрын гишүүний албыг давхар хашиж болно гэсэн заалт байгаа. Үүнийг нь УИХ-ын гишүүн Ерөнхий сайд болон Засгийн газрын гишүүний үүргийг  хавсарч болохгүй гэж өөрчилсөн хуулийн төсөл боловсруулсан. Бие даагчид болон миний бие Үндсэн хуульд нэмэлт өөрчлөлт оруулж "давхар дээл"-ийг тайлах асуудлыг төгс шийдэх хувилбарыг оруулж ирж байгаа юм.
 
-Ерөнхийлөгчөөс өргөн барьсан хуулийн төслийн хэрэгжиж эхлэх хугацаанд нэлээд маргаан дагуулж байсан. Тэгвэл Үндсэн хуулийн энэхүү өөрчлөлтөд хугацааг хэрхэн зохицуулж байгаа вэ?

-Бид хуулийн хэрэгжих хугацааг тавиагүй. УИХ хэлэлцүүлгийнхээ явцад хугацааг тавьж болох байх гэж бодож байна.
 
-Хууль санаачлагчид Үндсэн хуульд нэмэлт өөрчлөлт оруулах журмын тухай хуулийн дагуу ажиллаж байгаа юу?

-Үндсэн хуульд нэмэлт өөрчлөлт оруулах журмын тухай хууль 2012 онд батлагдсан. Бид дөрөв энэ хуулийг анх удаа хэрэглэж байгаа юм. Уг хуулийн дагуу Үндсэн хуульд өөрчлөлт оруулж байгаа талаар иргэд олон нийтийн саналыг авах ёстой. Бид дөрөв энэ хуулийн төслийн талаарх иргэдийн санал бодлыг өөрсдийн албан ёсны вэб сайтаараа дамжуулж авна.
 
-Та Үндсэн хуулийг бүхэлд нь өөрчлөх ёстой гэж үздэг гишүүдийн нэг. Таны энэ байр суурьтай бие даагч гишүүдийн Үндсэн хуульд өөрчлөлт оруулах тухай санал нэгдсэн гэж үзэж болох уу?

-Гишүүдийн "давхар дээл"-ийг тайлах талаар оруулж байгаа энэ нэмэлт өөрчлөлт бол Үндсэн хуульд нэмэлт өөрчлөлт оруулах журмын тухай хуулийн 1.3-д зааснаар Монгол Улсын Үндсэн хуулийг бүхэлд нь хянан үзэж шинээр батлахтай холбогдсон харилцааг зохицуулахгүй. Тэгэхээр Үндсэн хуулийг бүхэлд нь өөрчлөх гэсэн миний үзэлтэй зөрчилдөхгүй байгаа учраас бие даагчидтай нэгдсэн. Хэрвээ бидний өргөн барьсан хуулийн төсөл батлагдвал Үндсэн хуульд нэмэлт өөрчлөлт оруулах журмын тухай хуулийн дагуу найман жил энэ заалтад өөрчлөлт оруулахгүй.