Ардчилсан намын бүлэг өчигдөр өдөржин хуралдаад хэд, хэдэн асуудлыг хэлэлцсэн байна. Тодруулбал Хяналтын тухай хуулийн төсөл, Ашигт малтмалын хуулийн төсөл болон Эдийн засгийг эрчимжүүлэх хуулийн төслийн талаар хэлэлцжээ. Мөн Үйлдвэр хөдөө аж ахуйн яамны сайд Х.Баттулгын огцрох хүсэлтийн талаар ярилцжээ. Тус бүлэг Эдийн засгийг эрчимжүүлэх тогтоолын төслийг УИХ-ын нэгдсэн чуулганаар хэлэлцэх үед “Шударга ёс эвсэл” завсарлага авсныг буруутгаж, нэн яаралтай батлах нь зөв гэсэн шийдвэрт хүрсэн байна. Мөн тус тогтоолын төсөлд багтсан “Монголын баялаг холдинг”  компанийг байгуулах эсэхийг ажлын хэсгийн хуралдаанаар нягталж үзэхээр болжээ.

Мөн "дан дээл"-тэй үлдэх хүсэлтээ гаргаад буй Үйлдвэр хөдөө аж ахуйн сайд Х.Баттулгын огцрох хүсэлтийг Ардчилсан намын бүлэг хүлээн авахаар болсон талаар эх сурвалж мэдээллээ. Ингээд түүний оронд тус яамны Төрийн нарын бичгийн дарга Х.Золжаргалыг томилох саналыг гаргаж байгаа аж.

Тэрбээр Хүнс, хөдөө аж ахуйн дэд сайдаар ажиллаж байсан туршлагатай нэгэн юм. Харин  өнгөрөгч сонгуулиар Орхон аймагт нэр дэвшсэн ч ялж чадаагүй. Гэхдээ  сонгуульд ялалт байгуулаагүй ч сайд болох чадалтай хэмээн улс төрийн хүрээнийхэн ярьдаг.

Харин УИХ-ын гишүүн Х.Баттулга сайдын албаа өгөх болсон шалтгаанаа одоогоор тайлбарлаагүй байгаа ч гол шалтгаан нь “давхар дээл” тайлахгүй болсонтой холбоотой гэж буй.  Учир нь тэрбээр УИХ-ын гишүүн Засгийн газрын гишүүний албыг давхар хашихгүй байх хуулийн төслийг энэ оны долдугаар сарын 1-нээс эхлэн хэрэгжүүлэхийг дэмжиж, хоёр ч удаа намынхаа эсрэг санал өгсөн. Тиймээс байр сууриа хамгаалан үлдэх шийдвэр хэмээн тайлбарлаж болох юм. Харин улс төрчид үүнийг арай өөрөөр харж байгаа бөгөөд уг асуудлын цаана Ардчилсан намын бүлэглэл, фракцын зөрчлийн асуудал бий гэж үзэж байгаа.

Уг асуудлыг ирэх пүрэв гаригийн УИХ-ын чуулганаар хэлэлцэн эцэслэн хэлэлцэх юм.