УИХ дахь Ардчлсан намын бүлэг өчигдөр хуралдаж, хурлаар ямар асуудлууд хэлэлцсэн талаараа мэдээлэл өглөө. Энэ үеэр бүлгийн дарга Д.Эрдэнэбатаас зарим зүйлийг тодруулав. 

-Яамдын тоог цөөрүүлэх шаардлагатай гэж сөрөг хүчин ярьж байгаа. АН-ын бүлэг үүн дээр ямар байр суурьтай байгаа  вэ?

-Засгийн газар төсвийн тодотголоо оруулж ирэх ёстой. Төсвийн тодотголоор яамдын асуудлыг хэрхэн оруулж ирэх нь тэдний бүрэн эрхийн асуудал. Ер нь манай гишүүдийн олонхи нь Засгийн газрынхаа бүтэц зохион байгуулалтыг цомхон байя гэдэг саналыг гаргаж байгаа.  Энэ асуудлыг ярилцана. Гэхдэ хугацааны хувьд ямар нөхцөлд яаж шийдэх гэдэг нь хүлээгдэж байгаа зүйл гэж хэлж болно.

-Төмөр замын царигийн асуудалд эрх баригч нам ямар байр суурьтай байгаа вэ?

-Төмөр замын асуудлаар өргөн барьсан тогтоолын хүрээнд царигийн асуудлыг УИХ шийднэ. Цаг хугацаа бага байгаа гэдгийг хаа, хаана ойлгож байгаа.

-Х.Баттулга сайдыг чөлөөлөх тухай бүлэг байр сууриа нэгтгэж ярьсан болов уу?

-Засгийн газраас Баттулга сайдын асуудлаар УИХ-д асуудал оруулж ирсэн нөхцөлд Ардчилсан намын бүлэг яах вэ гэдэг асуудлаар дахин нэг хуралдана.

-Үйлдвэр хөдөө, аж ахуйн салбарт хийгдэж байгаа шинэчлэлийг Х.Баттулга сайд үргэлжлүүлээд явах нь зөв үү?

-Үйлдвэр хөдөө, аж ахуйн салбарт шинэчлэлт өөрчлөлтийн олон ажил хийгдэж байгаа. Х.Баттулга сайд өөрийнхөө хүсэлтээр чөлөөлөгдөх хүсэлтээ өгсөн учраас Засгийн газар нухацтай хэлэлцэх байх. Аливаа нэгэн шинэчлэлийг цааш нь үргэлжлүүлэх хүсэл эрмэлзлэл байна уу, үгүй юу гэдгийг Х.Баттулга сайдаас өөрөөс нь асуух хэрэгтэй.

-Сүүлийн үед Ардчилсан намын бүлэг байр сууриа нэгтгэж чадахгүй, дотроо хагаралдаж байна гэсэн хардлага байна. Үүнд ямар тайлбар хийх вэ?

-АН-ын бүлэг Ерөнхийлөгчийн өргөн барьсан "давхар дээл"-ийг тайлах хуулийг дэмжих нь зүйтэй гэж үзэж байгаа. Харамсалтай нь эцсийн хэлэлцүүлэгт Ерөнхийлөгчийн өргөн барьсан хуулийн хувилбар 180 градус эргэсэн. Ерөнхийлөгч зөвхөн Ерөнхий сайд УИХ гишүүн байж болно гэснийг Ерөнхий сайд буюу үндсэн чиг үүргийн яамдууд гэж  өөрчилсөн. Хоёрдугаарт Ерөнхийлөгч энэ хуулийг 2016 оноос мөрдөнө гэж заасныг 2014 он болгож өөрчилсөн. Тийм учраас эцсийн хэлэлцүүлэгийн үеэр Ардчилсан нам Ерөнхийлөгчийн өргөн барьсан анхны хувилбарыг дэмжинэ гэдэг дээр байр сууриа хатуу илэрхийлсэн. АН уг асуудлаар одоог хүртэл байр сууриа илэрхийлсээр байгаа. Үүгээр далимдуулан Засгийн газрыг тогтворгүй болгох гэсэн хөндлөнгийн өтөөлтөнд АН ороогүй. Цаашид ч орох ёсгүй. Ардчилсан нам хэзээ ч 100 хувийн саналаар асуудлыг шийдэж байгаагүй. Зарим гишүүд өөр, өөрийнхөө үзэл бодлоор саналаа өгснийг буруутгахгүй байгаа.

-УИХ-ын гишүүн Р.Бурмаа эсрэг санал өгснөөрөө намаасаа хөөгдөх тухай яригдаж эхэлсэн. Дараа нь УИХ-ын дарга З.Энхболд эсрэг санал өгсөн. Тиймээс З.Энхболдтой  хариуцлага тооцох асуудлыг ярих уу?

-Уг нь намын асуудал байгаа юм. Манай Хяналтын Ерөнхий хорооны шийдвэр бол дүгнэлт юм. Үүнийг шийддэг байгууллага бол Үндэсний зөвлөлдөх хороо. Бид хэн нэгэндээ ял тулгах гэж энэ Засгийг бариагүй, олонхи болоогүй. Гэхдээ өөрсдийнхөө намын үндсэн зарчим шийдвэрийг хүндэтгэж үзэх нь тэдний хамгийн гол улс төрийн ноён нуруу байх ёстой гэдэг дэр хатуу байр суурьтай байгаа. Асуудал дандаа Ардчилсан намын шийдвэрээс гажаад явана гэж бодохгүй байна. Бидэнд дотроо ойлголцох зүйлүүд байгаа. Гэхдээ үүнийг эргэж нийлэшгүй хагарал гэж ойлгож болохгүй.

-Х.Тэмүүжин сайдын асуудалд Ардчилсан намын бүлэг завсарлага авсан. Өчигдөр бүлгийн хуралдаанаараа энэ асуудлыг ярилцсан уу?

-Х.Тэмүүжин сайдын асуудлаар Ардчилсан намын байр суурь хэвээрээ байгаа. Сүүлийн үед Х.Тэмүүжин сайдын хувийн амьдрал руу нь хэт их орж байна. Нотлогдоогүй зүйл олон байгаа. Хэн, нэгнийг гэм буруутай нь нотлогдоогүй байхад хариуцлаа хүлээлгэх ёсгүй. Хуулийн дагуу дөрөв дэх өдөр энэ асуудлыг хэлэлцэнэ.

-Хяналтын тухай хууль батлагдвал Мэргэжлийн  хяналтын байгууллагын явуулж байгаа хяналт шалгалтын тоо цөөрөх юм байна. Үүнийгээ дагаад хяналт, шалгалт явуулдаг байцаагчийн тоо цөөрөх үү?

-Мэргэжлийн хяналтын байгууллага бүтцээрээ өөрчлөгдөнө. Дөрвөн чиглэлд хувиарлагдана. Мэдээж цомхон байх тухай асуудлаар гишүүдийн гаргасан саналыг харгалзан үзэх ёстой. Орон тооноос гадна Мэргэжлийн хяналтын  ажилчдын цалин хангамжийг бусдад автагдахгүй байдлаар яаж шийдэх вэ гэдэг асуудлыг хуулиндаа тодотгож өгөх ёстой гэдгийг ярилцаж байна.

-Эдийн засаг хүндэрч буй энэ үед хяналт шалгалтыг багасгана гэдэг нь иргэдийн аюулгүй байдал алдагдах юм биш биз?

-Хяналтын тухай хуулийн хүрээнд энэ асуудал яригдсан. Ийм болгоомжлол байна. Ажлын хэсэгт үүрэг өгчихсөн байгаа.

-Хариуцлагагүй ажилласан зарим сайд нарт хариуцлага тооцох ёстой гэдэг зүйл яригдаж байна. Энэ талаар АН-ын бүлэг ямар байр суурьтай байгаа вэ?

-Сайд нарт хариуцлага тооцох тухай асуудлыг оруулж ирэх нь Засгийн газар буюу Ерөнхий сайдын хийх ажил.