МАН-ын Ерөнхий нарийн бичгийн дарга асан У.Хүрэлсүх Австралид амьдарч байгаад саяхан иржээ. Түүнийг байхгүй хойгуур парламент уйтгартай байлаа. Хэрэв тэр гишүүнээсээ сайн дураараа татгалзаагүй бол УИХ элдэв сонин мэдээлэлээр дүүрэн байх байсан болов уу. Бас МАН-ын жагсаал ч сонирхолтой, нэмэр хачир ихтэй болох байлаа. Товчхондоо МАН-ын нам жим байдал У.Хүрэлсүхийг хүлээх хүлээлтийг бий болгов.

    Харин хүлээлт үүсгэсэн У.Хүрэлсүх ирээд нилээд хэд хоножээ. Энэ хугацаанд гишүүдтэйгээ уулзаж, улс төрийн нөхцөл байдлыг сайтар ажиглаж байгаагаа найз нөхөддөө ярьжээ. Хааяа нэг жиргэхээс хэтрэхгүй байгаа У.Хүрэлсүхийн улс төрийн идэвхи нэмэгдэж эхэлжээ. У.Хүрэлсүх Австралид яг юу хийж байсныг мэдэх хүн цөөхөн. Тэнд амьдардаг Монгол оюутнуудын яриагаар өндөр зэрэглэлийн фитнест хичээллэдэг байсан бололтой. Үүнээс өөр мэдээлэл хэвлэлээр гараагүй.

    Эх сурвалжийн мэдээлж байгаагаар У.Хүрэлсүх эх орондоо бүр мөсөн иржээ. Эхнэрийнх нь бие ч тун сайн тэнхэрч. Тиймээс дахин хүлгийн жолоо залахгүйгээр Монголдоо төвхнөж улс төрдөө эрчимтэй орохоор болсон байна. Тийм ч учраас өнөөдөр өөрийн удирдаж байсан НАМЗХ-ныхоо залуустай уулзаж санал бодлыг нь сонсохын зэрэгцээ сурсан мэдсэнээ хуваалцах гэнэ. НАМЗХ-ны удирдлагад байдаг залуус “У.Хүрэлсүх даргатайгаа уулзах гэж удаан хүлээлээ”, “У.Хүрэлсүх дарга ирлээ. Нам амь орно. Улс төр сонирхолтой болно”,  “Хол яваад ирсэн хүний үгийг сонс гэдэг. Чухал юм ярих байх” хэмээн өөр хоорондоо хөөрөлдөж байгаа дуулдлаа. Ажиглагчдын харж байгаагаар У.Хүрэлсүх өөрийн залуусаа хурааж, багцалж улс төрийн тодорхой арга хэмжээнүүдийг хийхээр төлөвлөсөн гэнэ.

    Түүнийг байхгүй хойгуур НАМЗХ-ны ерөнхийлөгчийн үүрэг гүйцэтгэгчээр УИХ-ын гишүүн Н.Номтойбаярыг томилсон. Энэхүү томилгоо түүний сэтгэлд хэрхэн нийцсэнийг ирэх өдрүүдэд мэдэх боломж бүрдэнэ. Бас У.Хүрэлсүх залуучуудын холбооныхоо залуучуудын заримыг зөв зүйлийг санаачлан хийж байгаа, заримыг нь огт дуугархгүй юу ч хийхгүй байна, сонгууль дөхчихөөд байхад чимээгүй сууж болохгүй гэсэн хатуухан үгсийг хэлсэн дуулдлаа.

    Ийнхүү У.Хүрэлсүх залуучуудтайгаа уулзалт хийснээр улс төрдөө эргэн ирж байгаагаа өнөөдрөөс тунхаглах гэнэ.