Өнөөдөр чуулганы нэгдсэн хуралдаанаар Засгийн газраас яаралтай хэлэлцүүлэхээр УИХ-д өргөн барьсан “Эдийн засгийг эрчимжүүлэх” тогтоолын төслийг хэлэлцэж байна. Өнгөрсөн долоо хоногийн баасан гаригийн УИХ-ын чуулганы нэгдсэн хуралдаанаар дээрх асуудлыг хэлэлцсэн ч дуусгаж чадалгүй хуралдаанаа өндөрлүүлсэн юм. Тиймээс өнөөдрийн хуралдаанаар үүнийг үргэлжлүүлж байгаа юм.

Эдийн засгийг идэвхижүүлэх зарим арга хэмжээний тухай УИХ-ын тогтоолын төсөлтэй холбогдуулан УИХ-ын гишүүн Ч.Хүрэлбаатар “Төсвөөс гадуур хэрэгжиж байгаа хөтөлбөрүүдийг төсөвтөө оруулж, хуулийн дагуу явуулах шаардлага байна” гэж хэллээ.

Мөн чуулганаар МАН-ын бүлгээс "Чингис"  болон "Самурай бонд", Хөгжлийн банкны мөнгөний зарцуулалтыг улсын төсөвт суулгах ёстой гэсэн саналыг оруулсан ч дэмжигдсэнгүй.

Хуралдааны үеэр гишүүд өөрсдийн байр суурийг хэлж байна. Тухайлбал УИХ-ын гишүүн С.Бямбацогт “Төрийн бүтэц данхайж байна. 2012 онд манай улс 11 яамтай байсан. Өнөөдөр 17 яамтай, 19 сайдтай ажиллаж байна. Энэ хэрээр Нийслэлийн дарга нарын орлогчийн тоо хүртэл нэмэгдлээ. Сумын засаг дарга хүртэл зөвлөхтэй ажиллаж байна. Шүүхийн шийдвэр гүйцэтгэх ерөнхий газар 100 орчим ажилтантай байсан бол өнөөдөр 190 болсон. Энэ мэтээр төрийн албаны бүтэц томорлоо. Тиймээс төрийн бүтцийг цомхон болгож, улс төрчид болоод сайд дарга нар бүсээ чангалмаар байна. Харин эсрэгээрээ иргэдийнхээ цалинг нэмье. Бид нар бүсээ чангалж, иргэдийнхээ халамжийг илүү болгоё. Үүнийг гишүүддээ уриалмаар байна. Зохицуулсан эрх зүйн орчин болоод энэ дагуух ажлыг зохион байгуулъя” гэлээ.

Хуралдаан үргэлжилж байна.