Хууль зүйн дэд сайд Ж.Эрдэнэжамьяаныг мөрдөн байцаах үйл ажиллагаанд санаатайгаар саад учруулсан гэдэг үндэслэлээр хэрэг үүсгэн шалгаж улмаар хоёр жилийн хугацаанд тодорхой албан тушаал хаших эрхийг нь түтгэлзүүлсэн шийдвэрийг анхан шатны шүүхээс гаргаад байгаа. Тэгвэл дэд сайд Ж.Эрдэнэжамьяан энэ асуудлаар нэлээд дэлгэрэнгүй ярилцлыг хэвлэлд өгч өөрийгөө цагаатна гэдэгт 99 хувийн итгэлтэй байгаагаа хэлэв. Тэрээр Н.Энхбаярыг баривчилсан асуудлаар зөвхөн улстөрийн байр суурь илэрхийлсэн, үүнийхээ төлөө ял авч байгаа нь шударга бус хэрэг гэж үзэж байгаа бололтой. Ямартай ч түүний хэргийг давж заалдах шатны шүүх хурлуудаар хэлэлцэн эцэслэн шийдвэрлэнэ. Харин Ж.Эрдэнэжамьяан сайд Х.Тэмүүжингийн талаар ямар бодолтой явдгаа илэрхийлсэн нь олон хүний анхаарлыг татаж байна. Тэрээр “Х.Тэмүүжин бол ирж яваа цагийн түүчээ залуучуудын нэг гэж би боддог. Ёс зүйтэй мэдлэгтэй хүн. Хууль зүйн салбарыг яаж шинэчлэх ёстой вэ? гэдгийг өөрийнхөө хэмжээнд үзэл баримтлалаа болгосон ийм хүн. Танил талаа харж, таван цаас олох гэж явдаг” залуусаас огт өөр хүн гэж тун нялуунаар тодорхойлов. Цаашлаад “Хүмүүс ганц Х.Тэмүүжингээр хууль зүйн салбарын шинэчлэл дутахгүй ” гээд сүртэй  юм ярьсан байна лээ. Ганц хүнээс шалтгаалдаг зүйл байна шүү. Х.Тэмүүжин байгаагүй бол шинэчлэл эхлэхгүй байсан ч юм билүү?” гэх зэргээр салбарын сайдаа нэлээд өмөөрсөн байна. Харин Х.Тэмүүжин сайдыг огцруулах бичгийг өргөн бариад байгаа О.Баасанхүүг “Х.Тэмүүжингийн зөв бурууг тогтоодог прокурор, цагдаа юм уу” гэж чимхээд авав. Ийнхүү дэд сайд Ж.Эрдэнэжамьяан намынхаа нөхрийн үйлдэлд эгдүүцэж сайдыгаа өмгөөлөх болсныг хүмүүс олон талаар тайлбарлаж байна. Нэг хэсэг нь түүнийг Х.Тэмүүжинд тал засч байгаад хэргээ цагаатгаж албан тушаалдаа үлдэх арга эрэлхийлж байна гэж байгаа бол сайдынхаа шавь явсан хүнд багшийгаа түлхэх зүрх зориг байхгүй гэх зэргээр тайлбарлах болов.

Ж.Эрдэнэжамьяаныг Интерпольд захидал бичсэн хэргээр АТГ-ын мөрдөгчид албан өрөөнд нь ирж мэдүүлэг авч байхад УИХ-ын гишүүн О.Баасанхүү төрийн ордноос яаран сандран гүйн ирж намын нөхрөө хамгаалж бөөн хэрүүл дэгдээж байсан гэдэг. Харин өнөөдөр дэд сайд Ж.Эрдэнэжамьяан О.Баасанхүүгээ битүү үгээр чимхэж явах болжээ.