Мьянмарын Холбооны Бүгд Найрамдах Улсын нийслэл Нейпьидо хотноо 2014 оны 5 дугаар сарын 6-нд болсон Монгол, Мьянмарын ГХЯ-д хоорондын анхны Зөвлөлдөх уулзалтыг Монгол Улсын ГХЯ-ны Ази, Номхон далайн орнуудын газрын захирал Ч.Баярмөнх, Мьянмарын Гадаад хэргийн яамны Улс төрийн газрын ерөнхий захирал У Сан Лвин нар тус тус тэргүүлж, хоёр талын харилцаа, хамтын ажиллагаа болон Ази, Номхон далайн бүс нутгийн интеграцийн тодорхой асуудлуудаар санал солилцов. Зөвлөлдөх уулзалтад Монгол Улсаас МХБНУ-д суугаа Онц бөгөөд Бүрэн эрхт Элчин сайд Ч.Баттөмөр оролцов.Монгол Улсын Ерөнхийлөгчийн 2013 онд МХБНУ-д хийсэн төрийн айлчлал болон Мьянмарын Холбооны Парламентын дарга Тура У Шве Манны 2014 оны 4 дүгээр сард Монгол Улсад хийсэн албан ёсны айлчлал амжилттай болж, хоёр талын харилцаа, хамтын ажиллагааг эхлүүлэхэд чухал түлхэц өгснийг талууд онцлон тэмдэглээд, айлчлалын үеэр тохиролцсон зүйлүүд тухайлбал, уул уурхай, ашигт малтмалаар баялаг орнуудын хувьд байгалийн баялгаа зөв зохистой ашиглах талаар харилцан туршлага солилцох, аялал жуулчлалын салбарт хамтран ажиллах зэрэг бусад асуудлыг ажил хэрэг болгоход хоёр талын ГХЯ цаашид анхаарч ажиллахаар тохиров.
Мөн ардчилал, нээлттэй нийгэм, төрийн албаны болон шүүхийн шинэчлэл, олон намын тогтолцоо зэрэг айлын талын сонирхсон сэдвээр Мьянмарын төрийн албан хаагч нарт зориулсан богино хугацааны сургалт семинарыг Монгол Улсын олон улсын хамтын ажиллагааны сангийн шугамаар зохион байгуулах, Үндсэн хууль болон Сонгуулийн хуулийн асуудлаар Парламентын төлөөлөгчид, Сонгуулийн Хорооны албаны хүмүүсийг харилцан солилцохоор санал нэгдэв.
Мьянмар улс 2014 онд АСЕАН-ыг даргалж буй орны хувьд Монгол Улсын АСЕАН-ны яриа хэлэлцээний түнш, “Зүүн Азийн дээд хэмжээний уулзалт”-ын оролцогч болох асуудлаар санал солилцож, энэ оны 8 дугаар сард болох АСЕАН-ны Сайд нарын уулзалтад Монгол Улсын Гадаад харилцааны сайдыг Мьянмарын Засгийн газрын тусгай зочноор оролцуулж, “АСЕАН + 1” албан бус уулзалт зохион байгуулах тухай манай талын албан ёсны хүсэлтийг мьянмарын тал гишүүн орнуудтай зөвшилцөн, аль болох нааштайгаар шийдвэрлэхээ илэрхийлэв.
Энэ өдөр АНДОГ-ын захирал Ч.Баярмөнхийг МХБНУ-ын Гадаад хэргийн дэд сайд У Тант Кяв хүлээн авч уулзав. Уулзалтын үеэр дэд сайд У Тант Кяв, сүүлийн хорь гаруй жилийн хугацаанд ардчилал, нээлттэй нийгмийг хөгжүүлэх, чөлөөт зах зээлийн харилцааг бий болгоход Монгол Улсын олсон ололт амжилтыг өндрөөр үнэлээд, Азийн хөрсөнд бий болсон ардчиллын үнэт зүйлсээс суралцаж, хамтран ажиллахад бэлэн байгаагаа илэрхийлэхийн зэрэгцээ НҮБ зэрэг олон улсын бусад байгууллагуудад бие биеэ харилцан дэмжиж ажиллахын чухлыг онцлон тэмдэглэв.
