УИХ-ын чуулганы үдээс өмнөх хуралдаан  завсарлалаа. Тус хуралдаанаар Хууль зүйн сайд Х.Тэмүүжинг огцруулах асуудлыг хаалттай хэлэлцсэн юм.  Хуралдааны үйл явцын талаар УИХ-ын зарим гишүүдээс тодрууллаа.

О.Баасанхүү:Эцсийн зорилго Х.Тэмүүжинг огцруулах биш

- Хуралдааны явц ямар байна вэ?

- Чуулганы хуралдаан хаалттай болсон учир ямар нэгэн зүйл хэлэх боломжгүй.

- Х.Тэмүүжин сайд таниас албан ёсоор уучлал гуйсан уу?

- Х.Тэмүүжинг надаас уучлал гуйсан гэж би  хэлээгүй. Хүлцэл өчсөн бичиг явуулсан.

- Тэр бичиг нь таныг өргөдлөө буцааж авах үндэслэл болох уу?

- Үндэслэл болохгүй. Төрийн тусгай албан хаагчдын эмнэлэг болон дотор нь байрлах MRA аппарат бүгд хэвэндээ байгаагүй. Тэр асуудлууд шийдэгдээгүй байна. Миний эцсийн зорилго бол Х.Тэмүүжин гэдэг хүнийг огцруулахдаа биш тэр эмнэлэгийн байрыг зориулалтын дагуу ашриглах. Мөн MRA аппарат эвдэрснийг хүлээн зөвшөөрүүлэх, ёс зүйгүй байгаа гэдгийг нь батлахдаа байгаа юм.

- Ёс зүйтэй холбоотой асуудалд Х.Тэмүүжин сайд ямар хариулт өгч байна вэ?

- Хаалттай хуралдааны явцыг хэлэх боломжгүй.

- Таны тавьж буй үндэслэлүүдийг хэр бодитой гэж гишүүд үзэж байна вэ?

- Би бол бодитой гэж үзэж байгаа. Нотлох баримт ч байгаа. Ерөнхийдөө гишүүд өөр, өөрийн үзэмжээр асуулт асууж, хариулт авах нь нээлттэй байгаа.

- Х.Тэмүүжин сайдыг албан тушаалд нь авч үлдэх эсэх нь "Шударга ёс" эвслийн бүлгээс хамаарна гэсэн яриа байна?

-  Байнгын хорооны дүгнэлт байгаа шүү дээ. Түүнд бүх зүйл нь тодорхой тусгагдсан байгаа.

- Таны ард  З.Энхболд байгаа гэсэн мэдээлэл байна. Энэ үнэн үү?

- Миний ард Монголын ард түмэн байгаа. Эмнэлэг иргэдэд л хэрэгтэй биз дээ.

- УИХ-ын чуулганыг шүүх хуралдаан шиг болж байна гэдэг шүүмжлэл байна. Үүнд та ямар байр суурьтай байгаа вэ?

-  Хүмүүс өөр, өөрийнхөөрөө хариулах байх. УИХ-ын чуулганы хуралдаан дэгийнхээ дагуу явж байгаа.