УИХ-ын чуулганы үдээс өмнөх хуралдаанаар Хууль зүйн сайд Х.Тэмүүжинг огцруулах тухай асуудлыг хаалттай хэлэлцэж байгаад завсарлалаа. Үдээс хойшхи хуралдаан 14.00 цагаас эхлэх бөгөөд УИХ-ын гишүүн О.Баасанхүүгийн өргөн мэдүүлсэн Засгийн газрын гишүүнийг огцруулах тухай тогтоолын төслийг үргэлжлүүлэн хэлэлцэх юм.

 Чуулганы хуралдаанд хэлэлцэж буй асуудалтай холбогдуулан Х.Тэмүүжин сайдын хэргийн мөрдөн байцаалтын талаар хууль, хяналтынханыг байлцуулж, асуулт асууж байгаа юм. Мөн Ерөнхий прокурор Д.Дорлигжав оролцож байгаа байна.

- Чуулганы хуралдаан дээр хуулийн байгууллагынханыг оролцуулж байгаа нь хууль зөрчсөн үйлдэл гэж байна. Мөн Х.Тэмүүжин сайдын эрхийг зөрчиж байгаа гэлээ. Үүнд та ямар тайлбар хийх вэ?

- Тийм. Энэ нь хууль зөрчиж байна. Хаалттай хуралдаан байх шаардлагагүй. Чуулганы хуралдааны үеэр мөрдөн байцаах болон тагнуулын байгууллагуудыг байлцуулж Х.Тэмүүжин сайдын хэргийн талаарх мэдээллийг асууж болохгүй. Хариулах ч ёсгүй. УИХ зүгээр л гурван үндэслэлээр огцруулах уу, үгүй гэдэг асуудлыг ярих ёстой. Тийм байхад дуусаагүй байгаа мөрдөн шалгах үйл ажиллагаанаас мэдээлэл авч байна. Энэ бол буруу.  

- Өмнөх парламентад ийм зүйл байсан уу?

- Үе, үе гардаг байсан. Би Ц.Нямдорж сайдад хэлж байсан. Та нар хуулийн байгууллагынханыг энд шүүгээд байж болохгүй шүү гэж хэлсэн. Парламентын үйл ажиллагааны зарчимд энэ өөр байж болохгүй зүйл. Шүүх эрх мэдэл, хууль тогтоох эрх мэдэл холилдох вий гэсэн сэрэмж байна.