Өчигдөр эдийн засгийг эрчимжүүлэх 100 хоногийн төлөвлөгөөг батлах үеэр УИХ-ын гишүүн С.Баярцогтын хэлсэн үг энэ долоо хоногийн дуулианыг тарилаа. Учир нь Шинэчлэлийн Засгийн газар хоёр жилд унагаасан эдийн засгаа 100 хоногт сэргээж, эрчимжүүлнэ гэдэгт МАН-ынхан байтугай ард түмэн ч итгэхгүй байна. Тэгээд ч энэ төлөвлөгөөнд нь казино байгуулах, ашигт малтамлын X лицензийг олгох, тусгай хамгаалалттай болон дархан цаазат газарт ашигт малтмал олборлох, төрийн өмчит аж ахуйн нэгжүүдийг хувьчлах гээд олон асуудал тусгагдаж байгаа юм. Эдгээрийг УИХ-д 26 суудалтайгаас гадна сүүлийн үед илэрхий эрчимтэй ажиллах болсон МАН-ын бүлгийн дэмжлэггүйгээр хэрэгжүүлэх ямар ч боломжгүй гэдгийг АН-ын зарим нэгэн ойлгож эхэлжээ.

    Нөгөө талаас нь авч үзвэл ийм том асуудлыг АН-ынхан дангаараа шийдвэрлэх төвөгтэй ч хийе гэж байгаа ажлуудыг нь дэмжих ёстой гээд МАН-ынхан үзжээ. Ингээд МАН-ынхан эдийн засгийг эрчимжүүлэх 100 хоногийн төлөвлөгөөг яралзтал гараа өргөөд батлаад өгөв. Уг нь сөрөг хүчний хувьд шүүмжилж улс төр хийж бантан болгож чадах байв. Тэгсэнгүй. МАН-ынхан улдан чангаадаг гэх имижээ  бүтээлч сөрөг хүчин гэдэг шинэ имижээр сольжээ. Бас дээр нь 100 хоногт эдийн засаг угаасаа сэргэхгүй. Тиймээс 100 хоногийнх нь дараа улс төр хийх нь илүү ашигтай гэсэн алсын нүүдэл ч хийгээ биз. Тэдний энэ байр сууринаас АН-ынхан айж эхэлж. Бас АН-ынхан хоёр жилд сүйрүүлсэн эдийн засгаа 100 хоногт сэргээнэ гэдэгтээ өөрсдөө ч эргэлзжээ. Угаасаа эрүүл сэтгэлгээгээр бодоод үзэхэд ийм байх боломжгүй л дээ. Хэрэв 100 хоногт сэргээн босгож чадахгүй бол “Намрын халуун өдөр”-үүд үргэлжилнэ. Тэр бүхнийг давж гараад 2016 онд ялна гэдэг АН-ын хувьд хэцүү л дээ. Тиймээс л МАН-ыг Засгийн газартаа урьж, ачааны хүндээсээ үүрч хамтарч улс орноо хөгжүүлье гэсэн уриалга гаргалаа. Ийм саналыг АН-ынхан саяхнаас бэлджээ. Түүнийг нь УИХ-ын гишүүн С.Баярцогт илэрхийлсэн гэж АН дахь эх сурвалж мэдээллээ. Тэрээр “Эдийн засгийн эрчимжүүлэх тогтоолын үзэл санаа маш чухал. Одоогийн байдлаар хэрэгжих магадлал маш муу. Энэ тогтоолыг хэрэгжүүлье гэвэл УИХ дор хаяж гуравны хоёрын өндөр хэмжээний консенсустай (Consensus) байх ёстой. 2008-2009 оныг дамнасан хямралыг МАН, АН хоёр хамтарч байх үедээ давж гарсан. Энэ Монголчуудын хувьд түүхэн боломж байсан. Эдийн засаг нь доошоогоо -1.3 хүртэл унаад тухайн жилдээ 8.7 болж өссөн. Дараагийн жилдээ 17 болтлоо өсч байсан юм. Энэ юу хэлж байна вэ гэвэл бодлогын арга хэмжээг цаг хугацаанд нь авч чадвал манай эдийн засаг эрчимтэй өсөх бололцоотой эдийн засаг байгаа юм. Одоогийн байдлаар хэлэлцүүлэг явуулж байгаа, асуудал шийдэж байгаа байдлыг харахад өндөр хэмжээний консенсус үүсэхгүй байна. Тиймээс би Ерөнхий сайдад хандаж, сөрөг хүчний даргад хандаж энэ хэлэлцээр яриаг эхлүүлээч ээ. Энэ хэлэлцээр хүнд байдлаас гарахын тулд Монгол Улсад Үндэсний эв нэгдлийн Засгийн газар хэрэгтэй байна. Одоогийн Засгийн газарт МАН-аас бусад нь бүгдээрээ байна. Тиймээс Засгийн газарт бүтцийн өөрчлөлт хийж МАН-ыг урих хэрэгтэй гэж үзэж байна. Ингэж байж хүндрэлээс гарна. Тэгэхгүй бол бидний бичсэн зүйл болгон цаасан дээр үлдэнэ. С.Баяр дарга 45 гишүүнтэй байж дангаараа Засгийн газар байгуулаад явах байсан. Тухайн үед тал талаасаа шүүмжлүүлж, муу сайн хэлүүлж байсан. Гэхдээ тэр үед хямралыг богино хугацаанд давж гарч чадсан. Одоо бид энэ арга хэмжээг авахгүй бол нөхцөл байдал эдийн засгийн талаасаа муу харагдаж байна. Би төлбөрийн тэнцлийн хямрал болж үлдээсэй гэж хүсч байгаа. Энэ нь цаашаа эдийн засгийн хямралруугаа битгий ороосой гэж хүсч байгаа. Би ийм л зүйлийг хэлэх гэсэн юм. Одоо бид олонх цөөнх болоод юмнуудаа баталж болно. Энэ болгоны цаана хууль, тогтоомж гарах болно. Энэ болгон дээр маш өргөн хэмжээний дэмжлэг хэрэгтэй. Бидний хаврын чуулган эхэлснээс хойшхи хэлэлцсэн асуудал, авах арга хэмжээг харахаар үнэхээр гунигтай байна. Дандаа улс төржсөн хэдхэн асуудал тойрч яриад ажлын тухай ерөөсөө ярилцсангүй. Ийм яриа явах болгонд бид нарын яриа холдож байна. Ойлголцол байхгүй болж байна. Тийм учраас би дахиад уриалж байна. Энэ эдийн засгийн хямралыг давах төлөвлөгөө өндөр хэмжээний консенсусгүйгээр явахгүй ээ. Хаалттай хуралдаан үргэлжилж байсан бол би бас энэ үгийг хэлье гэж бодож байсан юм. Одоо бид энэ асуудлыг ярьж эхлэхгүй бол оройтно. Үнэхээр бидэнд Үндэсний эв нэгдлийн Засгийн газар хэрэгтэй байна. АН-ын дарга, Ерөнхий сайд Н.Алтанхуяг, МАН-ын дарга, УИХ-ын дэд дарга М.Энхболд нарыг ийм яриа хэлэлцээрт оролцооч ээ, энэ асуудлаа ажил хэрэг болгооч ээ гэж хүсч байна” гэсэн юм.

    Харин АН-ын эдийн засгаа унагачихаад “одоо хэцүүдлээ, ачаагаа даахаа болилоо” гэсэн урилгыг МАН-ынхан яаж хүлээн авахыг хэлэхэд эрт байна. Тэд мэдээж “за” гээд ухасхийхгүй л болов уу?