“Шинэ төмөр зам” төслийг АН-ынхан АТГ-т шалгуулахаар болсон талаарх шум сүүлийн үед хүчтэй яригдаад байна. Учир нь сүүлийн хэдэн жилүүдэд эрхэм гишүүд, эрх бүхий хүмүүс тэр дундаа АН-ынхан төмөр замын бодлогын хүрээнд хэрэгжүүлж буй шинэ төмөр замынхаа царигийн асуудлыг нэг тийш болгож чадахгүй, маргалдсаар ирсэн. Харин маргалдах гол шалтгаан нь Х.Баттулга гишүүний санал зөрсөнтэй холбоотой юм. Учир нь тэрбээр бүдүүн царигтай байх ёстой гэдэг дээр бат зогсоод байгаа бөгөөд бүдүүн царигтай болсноор манайд хамаагүй илүү ашигтай гэж тодорхойлсон. Улмаар энэ эрчээрээ зөрүүдэлсээр өдий хүрсэн.

 Гэвч Засгийн газраас шинэ шугам барих тухай тогтоолын төслийг  УИХ-д өргөн барьсан.  Ингэхдээ Х.Баттулгынхаар биш буюу нарийн царигтайгаар барих тогтоолыг өргөн барьсан. Өөрөөр хэлбэл, ерөөсөө л төмөр замын цариг нарийн байна гэдгээр Засгийн газар санал нэгдээд УИХ-аар хэлэлцүүлэхээр болсон.

Тэгвэл энэ мэтийн асуудлыг дагуулаад буюу уг төмөр замын цаана хэн нэгний ашиг сонирхол явагдаад байна гэж зарим хүмүүс үзэх болсон. Улмаар хоорондоо санал нийлж чадахгүй байгаа, хэн нь  илүү “идчих” бол гэсэн  бодолтой АН-ынхан “Шинэ төмөр зам”-ын энэ асуудлыг АТГ-аар шалгуулах дээрээ туллаа. Өөрөөр хэлбэл,  нарийн царигтай болсоноор хятадуудад давуу эрх олгоно гэж үзээд буй Х.Баттулга Н.Алтанхуягийг АТГ-аар шалгуулах далд санаагаа хэрэгжүүлж эхлэх шиг боллоо гэж зарим хүмүүс үзэж байна.

Харин нөгөө хэсэг хүмүүс Н.Алтанхуягын зүгээс "Женко" Х.Баттулга бүдүүн царигтай болно гэж зүтгээд байгаа нь цаана нь ашиг сонирхол явагдаад байгааг харуулж байгаа учир шалгуулахаар болсон гэх юм.  Тэгвэл энэ таамаг бараг үнэнд нийцээд байна уу?. Ямартаа ч Х.Баттулга зүгээр суусангүй. Зөрүүлээд  Ерөнхий сайд Н.Алтанхуягийн туслахыг ямар ч тендэргүйгээр тендерт ялсан хэмээн АТГ-аар шалгуулахаар болоод байна.

Юутай ч энэ бүхнээс болж АН-ынхан нэг нэгийнхээ авлигын асуудлыг сөхөж эхлэх тийшээгээ хандлаа.

Ийнхүү эрх баригчдын хагарал дээд цэгтээ хүрч харилцан нэгнийхээ авлигын асуудлыг сөхөж хууль хяналтын байгууллагаар шалгуулах дээрээ тулаад байна. Удахгүй Х.Баттулгын, Н.Алтанхуягийн нэг нэгнээ дөнгөх гэсэн авлигын булхай олон нийтэд ил гарсаар байж ч мэдэх юм.