БНХАУ-ын иргэн Н.Алхааг Монгол улсаас албадан гаргахаар болоод буй. Тодруулбал, Иргэний харьяалал, шилжилт хөдөлгөөний ерөнхий газраас Н.Алхааг энэ сарын 15-ны дотор МУ-ын нутаг дэвсгэрээс гарахгүй бол албадан гаргана гэх албан бичиг өгөөд байгаа юм. Харин уг асуудалд Н.Алхаа эсрэг байр суурьнаас хандаж, хэрвээ албадан гаргавал зулын гол болохоо мэдэгдсэн. Мөн өөрийг нь хэрэгсэхгүй болсон хэргээс болж, ийнхүү албадан гаргаж байгаа гэж мэдээллэж байгаа юм. Харин яг ямар үндэслэлээр албадан гаргаж байгаа талаар Иргэний харьяалал, шилжилт хөдөлгөөний ерөнхий газрын Цагаачлал хариуцсан ахлах мэргэжилтэн Х.Батбилэгээс тодруулахад "Н.Алхаа гэгч нь 1992 онд сургуульд суралцахаар Монгол Улсын нутаг дэвсгэрт орж ирсэн байдаг. Манай бүртгэлд бол БНХАУ-ын иргэн Вэн Шин гэх нэрээрээ бүртгэлтэй байгаа. Н.Алхаа манай улсын иргэн Н.Ундармаатай гэр бүл болж, Н.Ундармаа нь 1999 онд Франц улс руу цагаачлахаар явсан байна лээ. Түүнээс хойш Н.Алхаа, Н.Ундармаа нар хамтран амьдраагүй. Н.Алхаа манай улсад гэр бүлийн шалтгаанаар оршин суудаг байсан. Тиймээс манай байцаагч нар Н.Алхаагийн асуудлыг судалж, Удирдлагын зөвлөл хуралдсанаар гэр бүлийн шалтгаанаар оршин суух статусыг нь цуцалсан юм. Зөвхөн гэр бүлийн шалтгаанаар оршин суух статусыг нь цуцалсан. Яагаад гэхээр гэр бүл нь дуусгавар болсон. Өөрөөр хэлбэл, 1999 оноос хойш буюу 15 жилийн турш эхнэртэйгээ амьдраагүй байгаа юм. Цаашид манай улсад хөрөнгө оруулалт хийх, хөдөлмөр эрхлэх гэх мэт өөр статусаар оршин суух эрх нь нээлттэй. Энэ хүн цагдаагийн байгууллагад удаа дараа хулгайн хэргээр шалгагдаж байгаа юм билээ. Манайх оршин суух зөвшөөрлийг нь сунгахын тулд хууль хяналтын байгууллагаас санал авдаг. Үүний хариуд цагдаагийн байгууллагаас шалгагдаж байгаа гэх мэдээлэл өгсөн. Гэхдээ хамгийн гол нь гэр бүлийн шалтгаанаар амьдардаг учраас оршин суух зөвшөөрлийг нь цуцалсан юм. Бусад эрх нь нээлттэй байгаа шүү дээ" гэв.

Тэгэхээр Н.Алхаа иргэдэд өөрийгөө гэмт хэрэг хийгээгүй мэтээр ойлгуулж, мөн эхнэр охинтойгоо хамт амьдарсаар ирсэн гэж худал хэлснийг холбогдох албаныхан хэлж байна. Юутай ч тэрбээр гэр бүлийн статустай биш харин хөдөлмөр эрхэлж, хөрөнгө оруулалт хийх статустайгаар амьдарч болох нь.