УИХ дахь "Шударга ёс" эвслийн бүлэг ээлжит хуралдаанаа хийж хэд, хэдэн асуудлыг хэлэлцсэн байна. Үүний дотор Ашигт малтмалын тухай хуульд өөрчлөлт оруулах тухай хуулийн төсөл, Г.Уянга, Д.Тэрбишдагва нарын тойрогтоо ажилласан ажлын тайлан,  2012-2016 оны Засгийн газрын мөрийн хөтөлбөрийн хэрэгжилт болон Монгол хэлний тухай хуулийн төсөл зэрэг асуудлууд багтсан байна.

Ашигт малтмалын тухай хуулинд нэмэлт өөрчлөлт оруулахтай холбогдуулан тус бүлгээс Г.Уянга гишүүнээр ахлуулсан ажлын хэсэг гаргахаар болжээ. Тус хуультай холбогдуулан гадны шууд хөрөнгө оруулалт оруулна гэхээсээ илүүтэйгээр гадаад зах зээлээс хөрөнгө босгох, зээл авах байдлаар явбал илүү үр дүнтэй гэж тус бүлгээс үзэж байгаа аж. Мөн тодорхой газар нутагт хайгуул, олборлолт хийх лицензийг олгох нь зөв гэж тус бүлгээс үзэж байгаа аж. Хэрвээ гадны хөрөнгө оруулалтыг босгож, зээл авч чадвал өөрсдөдөө баялагийг үлдээх болно гэж Шударга ёс эвслийн бүлгийн ахлагч Н.Батцэрэг хэллээ.

Бүлгийн хурлаар хэлэлцсэн дараагийн асуудал нь УИХ-ын гишүүн Г.Уянга, Д.Тэрбишдагва нарын тойрогтоо ажилласан, ажлын тайланг авч хэлэлцсэн асуудал юм. Тус гишүүдийг тойрогтоо ажиллах үеэр иргэдийн зүгээс олон саналыг тавьсан байна. Иргэдийн тавьсан санал, асуудлыг шийдвэрлэхийн тулд бүлгийн зүгээс шаардлагатай ямар ажлыг зохион байгуулах болон төрөөс зохицуулах хуулийн зохицуулалт ямар байх тал дээр нээлттэй ярилцжээ. Тодруулбал хорооны хэсгийн ахлагчийг төрийн жинхэнэ албан хаагч болгохоос эхлээд өрхийн эмнэлэгийн үйл ажиллагааг сайжруулах зэрэг ажлаар хуулинд өөрчлөлт оруулж, нийслэлийн удирдлагуудтай хамтарч ажиллах ерөнхий чиглэлийг гаргажээ. Мөн тус бүлгээс иргэдийн санал, гомдлын дагуу асуудлыг шийдвэрлэхийн тулд дахин бүлгийн хурал дээрээ ярихаар болсон байна.

2012-2016 оны Засгийн газрын үйл ажиллагааны биелэлттэй холбоотой асуудлыг энэ долоо Төрийн байгуулалтын байнгын хороогоор хэлэлцэнэ. Тэгэхээр 2012 оны сонгуульд "Шударга ёс" эвслийн бүлгээс ард түмэндээ амласан ажлын хэрэгжилт ямар байгаа талаар тус бүлгийн гишүүд нарийвчлан судлахаар болсон байна. Хэрвээ дутуу хэрэгжсэн ажил байвал хэрэгжүүлэхээр ажиллана гэлээ.

Тус бүлгийн гишүүн Д.Батцогт бүлгээсээ гарах шийдвэрийг албан бичгээр гаргасан. Энэ дагуу Д.Батцогт гишүүнийг бүлгээс гарах болсон тухай мэдээллийг албан ёсоор УИХ-ын даргад өнөөдөр өргөн барихаар болжээ.