"Шударга ёс" эвслийн бүлгийн дарга Н.Батцэрэгтэй ярилцлаа.

-УИХ-ын гишүүн Д.Батцогт бүлгээс гарах саналаа өгсөн. Үүнтэй холбогдуулж Нийгмийн бодлого, боловсрол, соёл, шинжлэх ухааны байнгын хорооны даргын ажлаас татах шийдвэрийг танай бүлгээс гаргах уу?

-Одоогоор энэ талаар яригдсан зүйл алга. Эвслийн бүлэг АН-тай хамтран Засгийн газар байгуулахдаа хэн нь аль байнгын хороог удирдах талаар гэрээ хийж, тохирсон. Тэр дагуу Нийгмийн бодлого, боловсрол, соёл, шинжлэх ухааны байнгын хороо болон Аюулгүй байдал, гадаад бодлогын байнгын хороо эвслийн бүлгийн квотод байдаг. Одоогоор Д.Батцогт гишүүнийг байнгын хорооны даргаас чөлөөлөх асуудал бүлгийн зүгээс, гишүүдийн зүгээс ч ирээгүй байгаа. Д.Батцогт гишүүн өөрөө санаачилгаараа байнгын хорооны даргын суудлаа өгвөл бид татгалзахгүй.

-Х.Баттулга сайдын асуудал дээр “Шударга ёс” эвслийн бүлэг байр сууриа нэгтгэсэн үү?

-Бид энэ асуудлаар хуралдаагүй. Шаардлагатай гэж үзвэл хуралдана. Засгийн газрын гишүүн өөрөө чөлөөлөгдөх хүсэлтээ өгснөөс илүү мэдээлэлгүй байна. Байнгын хороо, УИХ-ын чуулганы хуралдаанаар энэ асуудлыг хэлэлцэхдээ өнгөрсөн хоёр жилийн хугацаанд хийсэн ажил, гаргасан ололт, алдаа оноог ярилцах байх. Мэдээж гишүүн өөрийн хүсэлтээр чөлөөлөгдөх өргөдөл гаргасан учраас чөлөөлөөд явж таарах байх. Хүсэлт гаргасан албан тушаалтан бүрийг чөлөөлөхөөс илүү ажлын хариуцлагатай нь холбоотой асуудлыг хэлэлцэж байх нь зүйтэй. Ялангуяа Засгийн газрын гишүүний хувьд ажлын хариуцлагыг яриад чөлөөлөд явах ёстой гэж бодож байна. Тэгэхгүй бол чөлөөлөгдөх хүсэлт өгсөн гээд л явуулж болохгүй. Тухайн хүн өөрийнхөө хариуцсан салбарт ямар ажил хийсэн. Хөрөнгө мөнгийг хэрхэн хувиарлаж ажил хэрэг болгосноос эхлээд шалгах ёстой олон зүйл бий.

-Хууль зүйн сайд Х.Тэмүүжингийн асуудлаар хаалттай хуралдаж, гишүүд мэдээлэл авсан. Эвслийн бүлгийн байр суурь өөрчлөгдсөн үү?

-Өөрчлөгдөөгүй. Х.Тэмүүжин сайдыг огцруулахгүй гэсэн байр суурьтай байгаа.

-Үндэсний Эв нэгдлийн Засгийн газар байгуулах талаар яриа гарсан. Эвслийн бүлэг ямар байр суурьтай байгаа вэ?

-.Энэ асуудлаар олонхийн санал авсан Ардчилсан намаас шийдвэр гаргавал шийдэж болох байх.  Түүнээс биш нэг гишүүний байр суурийг бүлгийн хуралдаанаар хэлэлцэх шаардлагагүй

-Хөрөнгө оруулалтын газарт хүсэлт ирүүлсэн газруудын олонхи нь уул уурхайн салбарт хөрөнгө оруулах хүсэлтэй байна гэсэн. Харин танай бүлгээс дотоодын аж ахуйн нэгж өөрсдөө баялагийнхаа эзэн нь байх тухай асуудлыг ярьж байна. Тэгэхээр гадаадын хөрөнгө оруулагчийн байр суурь ямар хүрээнд байх ёстой гэсэн үг вэ?

-Зөвхөн гадны хөрөнгө оруулалтад тулгуурлаж хөгжинө гэвэл буруу гэж үзэж байна. Гадны хөрөнгө оруулалт бол хоёр тал харилцан ашигтай байх тохиолдолд л хэрэгтэй гэж үзэж байна. Харин түүний оронд өөрсдөө хийх гэж оролдох хэрэгтэй. Үндэсний компаниудыгаа гадаад зах зээлээс мөнгө босгох бололцоогоор хангаж өгөх бодлого хэрэгтэй байна. Тухайлбал, бид өмнөх нийгмийн үед Орос улсаас 10 тэрбум төгрөгтэй тэнцэх хөрөнгийн зээл аваад хот суурин газруудыг бүтээн босгосон. Хэрвээ тухайн үед зээл биш шууд зөвлөлтийн хөрөнгө оруулалтыг авсан бол одоо босчихсон байгаа үл хөдлөх хөрөнгүүдийн 51 хувь нь Орос улсынх байх байсан. Харин бид зээл аваад эргэн төлсөн учир энэ баялаг Монголынх болоод үлдсэн. Тиймээс аль болохоор өөрсдөө мөнгө босгоод тэр баялагийнхаа эзэн нь байх тэр чиглэлийг барина. Гэхдээ энэ нь гадны хөрөнгө оруулалтыг нүд үзүүрлэнэ гэсэн үг огтхон ч биш. Бид чадахгүй байгаа хэсэгтээ гадны хөрөнгө оруулалтыг оруулъя гэсэн үг юм.