УИХ дахь МАН-ын бүлэг хуралдаж, Ашигт малтмалын тухай хуульд нэмэлт, өөрчлөлт оруулах хуулийн төсөл болон 2014 оны төсвийн тухай хуульд нэмэлт өөрчлөлт оруулах тухай, Нийгмийн даатгалын сангийн 2014 оны төсвийн тухай хуульд өөрчлөлт оруулах тухай хуулийн төслүүдийн талаар хэлэлцсэн байна.

Бүлгийн хуралдааны талаар УИХ дахь МАН-ын бүлгийн дарга С.Бямбацогт, Ч.Хүрэлбаатар, Я.Содбаатар нар мэдээлэл хийлээ.

МАН-ын бүлгийн зүгээс Ашигт малтмалын тухай хуульд нэмэлт  өөрчлөлт оруулахдаа албан тушаалтнуудын оролцоог тодорхой болгох ёстой гэж үзсэн байна.

Үүнээс гадна Засгийн газраас өргөн барьсан дээрх хуулийн төсөлд тодорхой бус, ойлгомжгүй заалт олон байгаагаас гадна эрх баригчдын сонгуулийн үеэр амласан амлалт нь энэ хуульд тусгагдсан заалттай, зөрчилдөж байна гэлээ. Тодруулбал хайгуулын лицензийг нээлттэй болгоно гэж байгаа ч алийг нь концесс болон дуудлага худалдаагаар өгөх эсэх нь тодорхойгүй гэх мэт засч залруулах шаардлагатай олон зүйл байгаа гэлээ.

Мөн тус хуульд тусгагдсан "Төсвийн мөнгөөр нөөцийг нь тогтоосон хайгуул хийсэн бол 51, 34 хувиас дээшхийг төр эзэмших ёстой гэсэн заалт байсан ч 51 хүртэл, 34 хүртэл гэж өөрчилсөн байна. Энэ нь тодорхойгүй байгаа нь гадаад, дотоодын хөрөнгө оруулагчдад тодорхой бус, ойлгомжгүй байдлыг үүсгэнэ гэж МАН-ын бүлэг үзжээ. Үүний цаана өнөөдөр стратегийн ач холбогдолтой орд газруудад Монголын төрийн эзэмшиж  буй хувийг бүдгэрүүлэх, хувь эзэмшиж буй хөрөнгө оруулагчдын хувийг хүчээр авах, тусгай хамгаалалтай газарт олборлолт хийж магадгүй гэсэн хардалд байгаа гэлээ.

Тиймээс тус заалтуудыг тодорхой болгож өөрчлөхын тулд УИХ-аар нухацтай хэлэлцэх ёстой гэдэг дээр байр сууриа нэгтгэсэн байна. Мөн Хилийн зурваст, Тусгай хамгаалалтай газар нутагт ашигт малтмалын үйл ажиллагаа эрхлэх зөвшөөрлийг УИХ хэлэлцэх ёстой гэсэн хуулийн заалтыг өөрчилж Засгийн газарт эрх мэдлийг нь шилжүүлж байгааг эсэргүүцэж байна гэв. Энэ нь УИХ-ын бүрэн эрхт халдсан үйлдэл гэж тус бүлгээс үзэж байгаа аж.

Тиймээс МАН-ын бүлгээс АН болон Шударга ёс эвлсийн бүлэгт  хэд, хэдэн шаардлагыг тавьж байгаагаа энэ үеэр дуулгалаа.

1. Сонгуулийн үед тавьж байсан амлалтандаа нийцүүлж ажиллах.

2. Хөрөнгө оруулалт болон бизнесийн орчныг муутгахгүй байх

3. Ашигт малтмалтын салбарт баримтлах улс төр эдийн засаг, эрх зүйн бодлогыг тогтвортой байлгах чиглэлээр бодлого баримтлах

4. Төрийн захиргаа түшмэдийн оролцоог багасгах зэрэг шаардлагыг тавилаа.

Мөн 2014 оны төсвийн тухай хуульд нэмэлт өөрчлөлт оруулах тухай төслийг батлахдаа нийгмийн эмзэг бүлгийн иргэд рүүгээ чиглэсэн саналыг оруулж ирэх болон цалинг тодорхой хувиар нэмэх зэрэг асуудлыг тусгаагүй байна гэв. Мөн “2014 оны Төсвийн тодотгол халтуурдсан  тодотгол болсон” гэж МАН-ын бүлэг үзсэн байна. Тодруулбал, өнгөрсөн долоо хоногт 2014 оны Төсвийн тодотголын төсөл болон түүнийг дагалдах хуулийн төслүүдийг хэлэлцсэн. Хэлэлцүүлгийн үеэр Сангийн сайд Ч.Улаан ирэх зургадугаар сард төсөвт дахин сайжруулсан тодотгол хийнэ гэж хэлсэн. Тиймээс МАН-ын бүлэг дахин тодотгол хийх  гэж байгаа бол энэ удаагийн тодотголыг хэлэлцэх шаардлагатай эсэхийг судлахаар болсон байна. Ер нь бүхэлдээ алдаатай хууль болсон учраас тус хуулийг эргүүлэн татахыг МАН-ын бүлгээс шаардлаа.