Өнгөрсөн долоо хоногт УИХ-ын гишүүн С.Баярцогт “МАН-ыг урьж Засгийн газарт оруулья. Тэгэхгүйгээр эдийн засгийн хүндрэлийг давж гарч чадахгүй. 100 хоногийн төлөвлөгөө ч амжилттай хэрэгжихгүй. Үндэсний эв нэгдлийн Засгийн газар байгуулья” гэж уриалаад бөөн дуулиан дэгдээв. Зарим хүмүүс С.Баярцогт ийм шийдэл гаргаснаараа намынхандаа “бариулах шахсан” гэж өнгөцхөн дүгнэсэн юм. Үнэндээ бол С.Баярцогт ганцаараа сууж байгаад ийм юм олоод чуулган дээр орилчихоогүй гэнэ. Тэр энэ асуудлаар намынхаа олон гишүүдтэй санал солилцсон байна. Ихэнхи нь эдийн засаг хүндэрснийг хүлээн зөвшөөрч хямралаас гарахын тулд МАН-тай ярихаас өөр гарцгүйг хэлэлцжээ. Хамтарч байгаа ч үргэлж бодлого сөрж, засгийг элдэвээр хэлэх болсон “Шударга ёс” эвсэлийнхэнтэй хол явахгүйг дүгнэцгээжээ. Тэр бүү хэл “Бид МАХН, МҮАН-тай биш МАН-ынхантай илүү олон удаа хэлэлцээрийн ард сууна. Илүү олон жил энэ улсын төлөө бодлогоо уралдуулна. Ойрын биш холын зайн улс төрөө бодоцгооё” гэжээ. Мөн С.Баярцогт “Алтангадас”-ынхантайгаа ч асуудлыг ярилцаж, МАН-ыг анхнаас нь л урисан бол улс орны эдийн засаг өөр байх зурагийг олж харжээ. Тэгээд ч цаашид эдийн засаг улам л муудна. Сөрөг хүчин урьдынхаасаа илүү сайн ажиллах болсон. Энэ мөт нөхцөл байдал нь шинэ гарцыг хайх шаардлагатай болсон гэж дүгнээд “МАН-ыг урих санаачилга гаргья”, “нийгэм яаж хүлээж авахыг харцгаая”, “МАН-ынхан наанаа үгүй гэж байгаа ч яг тулаад ирэхээр юу гэхийг үзье” гэх мэтээр ярилцжээ. Ингээд МАН-ыг урих санаачилгыг хэн гаргах вэ гэдэг дээр гишүүд нь “би л биш” гээд байж. Эцэст нь санаачлагчид үүрэг оногдож С.Баярцогт чуулган дээр аваад хаяжээ. Тэгэхээр С.Баярцогт намынхаа гишүүдийн өмнө буруутай гэдэг нь дэндүү хөнгөн бас инээдтэй дүгнэлт болон хувирчээ.

    Хамгийн сонирхолтой нь С.Баярцогтын урилгад “Шударга ёс” эвсэлийнхэн ихээхэн цочирджээ. Тэд өөрсдийг нь шууд засгаас хөөгөөд гаргах нь гэж ойлгожээ. Тиймээс БНСУ-д эмчлүүлж байгаа Н.Энхбаяр “эзэн”-тэйгээн ярьж зөвлөлджээ. Бас МҮАН-ын дарга М.Энхсайхан ч асуудалд ач холбогдол өгч. Сүүлийн өдрүүдэд энэ яриа л эвслийн хүрээнд эргэлдсэн гэж дотор нь байх эх сурвалж мэдээллээ. Уг эх сурвалжийн мэдээлж байгаагаар бол Н.Энхбаяр “МАН-ыг засагт оруулж болохгүй. Хэрэв МАН засагт орвол МАХН-д улс төрийн орон зай бага болно. Ирэх сонгуульд амжилт олох боломжгүй байдал үүснэ. Тиймээс МАН-ыг засагт оруулахгүй байх талаар ажиллах ёстой”-г зөвлөжээ. Түүгээр ч барахгүй Х.Тэмүүжингийн асуудлаар барьцаалан АН-ын нөлөө бүхий хүмүүстэй Н.Энхбаяр ярьсан мэдээлэл түгж байна. Бодвол Х.Тэмүүжиг МАХН болон МҮАН хамгаална. Хариуд нь хамтарсан засгаа тогтвортой ажиллуулах ёстой гэж шийдсэн бололтой. Ингэж байтал олон нийт С.Баярцогтын санаачилгыг шүүмжлэх нь давамгайлаад иржээ. Түүн дээрээ тулгуурлан АН-ынхан мэдэгдэл гаргаж “энэ бол С.Баярцогт гэж хувь хүний л байр суурь. АН-ынх биш” гэж залруулахаа мартсангүй. Асуудал төлөвлөгөөний дагуу явагджээ.

    АН-ын энэхүү мэдэгдэлийг өчигдөрөөс эхлэн МҮАН-ын дарга М.Энхсайхан ихээхэн дэмжиж твитертээ хэд хэдэн удаа жиргээд авав. Өөрөөр хэлбэл тэрээр МҮАН-ыг эвслээс гаргачих вий, өөрийгөө Тавантолгойн ЦС-аас болиулчих вий гэж айж байгаа бололтой. Үүнтэй зэрэгцээд “Шударга ёс” эвслийн бүлгийн дарга Н.Батцэрэг “С.Баярцогтын уриалгыг олонхийн санал авсан АН шийдвэр гаргавал шийдэж болох байх. Нэг гишүүний байр суурийг манай бүлэг хуралдаанаар хэлэлцэхгүй” хэмээн мэдэгдэв.

    Өөрөөр хэлбэл С.Баярцогтын “МАН-тай хамтарч Үндэсний эв нэгдлийн Засгийн газар байгуулья” гэдэг санаачилга олон хүний хүрээнд яригдаж байж гадагшилсан байна. Бас МАХН, МҮАН-ынхан “зүрхээ гартал” айцгааж. Н.Энхбаяр дарга нь утасдаж, М.Энхсайхан идэвхижиж юм юм л болж. Хамгийн сонирхолтой нь АН-ынхан оройтосон ч гэсэн МАН-гүйгээр эдийн засгаа сэргээж, хол явж чадахгүйгээ дотроо ил тодоор ярьж эхэлсэн байна.