УИХ дахь АН-ын бүлгээс мэдээлэл хийлээ. Тус бүлэг хуралдаанаараа Ерөнхий сайдын мэдээллийг сонсож, Эдийн засгийн эрчимжүүлэх ажлыг хэрхэн, яаж гүйцэтгэх болон цаашид нэмж ямар арга хэмжээ авах талаар нээлттэй ярилцсан байна. Мөн Эдийн засгийг эрчимжүүлэх тогтоолын төсөл батлагдсантай холбогдуулан дагалдах бусад хууль тогтоомжуудийг өргөн барих шаардлагатай гэдэгт тус бүлэг саналаа нэгтгэжээ.

Энэ талаар АН-ын бүлгийн дарга Д.Эрдэнэбат ярихдаа "Засгийн газраас эдийн засгийг эрчимжүүлэх 100 хоногийн гарааг эхлүүлж байна. Энэ 100 хоногийн хугацаа бол Засгийн газар болоод УИХ-ын олонхийн бүлэгт эдийн засгийг эрчимжүүлэх, идэвхжүүлэх, тогтворжуулах зэргээр хамгийн идэвхтэй үйл ажиллагаа явуулах, өөрсдийгөө шахаж ажиллах хариуцлагатай үе юм. Энэ хугацаанд эдийн засагт эерэг дүн гаргахын тулд шуурхай ажлыг зохион байгуулах ёстой. Мөн Засгийн газрын үйл ажиллагаанд нөлөө үзүүлэх улс төрийн болон бусад хөндлөнгийн үйл ажиллагааг тогтвортой байлгах ёстой гэж үзэж байна. Ер нь эдийн засгийг эрчимжүүлэхийн тулд 10 гаруй хууль, хоёр тогтоол, нэг шийдвэрийг нэн даруй өөрчлөх ажил бидэнтэй тулгарч байна. Энэ 100 хоногийн хугацаанд Засгийн газар эдийн засгийнхаа үйл ажиллагааг идэвхжүүлж чадвал цаашид ажиллах боломжтой болно гэж бид үзэж байна. Хэрвээ эдийн засгаа өндийлгөж чадахгүй бол олонхийн бүлэг өөрсдөө энэ Засгийн газраа хэрхэхийг шийднэ. Эдийн засгийг хүндрэхэд янз бүрийн зүйл нөлөөлж байгаа ч өөрсдийнхөө алдааг эрүүлээр дүгнэх чадамж байх ёстой гэж бодож байна. Гэхдээ үүнийг тойрсон улс төрд хэт автагдаж бодит байдлаас алслагдаж болохгүй" гэв. 

Тиймээс УИХ дахь АН-ын бүлгээс Засгийн газарт хэд, хэдэн шаардлагыг тавьсан байна.

1. НӨАТ-ыг 50 сая болгох хуулийн төслийг яаралтай хэлэлцэх шаардлагатай. НӨАТ-ын 10 хувийн хоёрыг нь иргэдэд буцаан олгох эрх зүйн орчныг бүрдүүлэх.

2. Эдийн засгаа эрчимжүүлэх хугацаанд эдийн засагт гацаа үүсгэж буй хүнд суртал, төрийн оролцоог багасгах ажлыг гүйцэтгэх.

3. Тендерийн тухай хуульд нэмэлт өөрчлөлт оруулах тухай хуулийн төслийг оруулж ирэх. Уг хуулийг баталснаар тендерийн маш олон асуудал цэгцтэй болно гэж АН-ын бүлгийн дарга мэдэгдлээ. Тухайлбал тендерийн маргаан 28 хоногт шийдэгдэхээс төр өөрөө үнээ зарлаж компаниудыг урьж ажиллуулдаг болох аж.

4. Хил орчмын худалдааг сэргээх асуудалд онцгой анхаарах. Уг ажлын хүрээнд Алтанбулагийн худалдааны бүсийг туршилтаар ажиллуулахаар болсон байна. Хэрвээ туршилт амжилттай болбол цаашид олон худалдааны бүсийг ажиллуулна гэлээ.

5. Бусад холбогдох хууль тогтоомжийг яаралтай батлуулах.