УИХ дахь АН-ын бүлгийн дарга Д.Эрдэнэбаттай ярилцлаа.

-Өрийн удирдлагын тухай хуулийг өргөн барьсан. Түүний хажуугаар Эдийн засийг эрчимжүүлэх тогтоолын төслөө баталчихлаа. 100 хоногт эдийн засаг уналтаас гарах уу?

-Өрийн удирдлагын тухай хуулинд гадаад өрийг ДНБ-ний 70 хувьтай тэнцүү байхаар болгосон. Мөн Засгийн газрын баталгааг 20 хувь болгохоор тусгасан байгаа. Гэхдээ энэ нь тусдаа асуудал. Ер нь эдийн засгийн бодлогоо хаачихаад зөвхөн төсөв дээрээ хэрүүл хийгээд суух нь бидний ирээдүй биш. Улс орны өрийн хэмжээ янз бүр байдаг. Манай орны хувьд 40 хувиар хязгаарласан байгаа. Үүнийг өсгөх шаардлагатай. Тэгж байж эдийн засгаа тэлж, мал аж ахуй, газар тариалан зэрэг хүлээгдэж байгаа салбаруудыг идэвхжүүлж чадна. Гэхдээ энэ бүхнийг хийхийн тулд эдийн засгийн хамгийн зөв аргаар явах ёстой. Энэ бол манай намын барьж буй зарчим юм. Тийм учраас энэ 100 хоногт эрхзүйн асуудлыг ямар ч гэсэн бүрдүүлж чадна.

-100 хоногийн дотор ямар нэгэн эерэг үр дүн гарахгүй бол олонхийн бүлэг Засгийн газартай хариуцлага тооцох уу?

-Заасан хугацаанд үр дүн гарахгүй бол энэ Засгийн газар бүтцийн хувьд буруу явж байна гэдгийг хүлээн зөвшөөрөх ёстой. Энэ нь эрүүл үзэгдэл. Түүнээс биш хэн нэгний хөндлөнгийн хатгалгаар улстөрийн өнцгөөс асуудалд хандахыг манай нам хүлээн зөвшөөрөхгүй. Бид өөрсдийн дотоод хүчин чадлаар асуудлыг шийдэх бүрэн чадалтай. Энэ итгэлийг ард түмэн ч өгсөн. Тиймээс эргэлзээ алга. 
 
-Чуулганы нэгдсэн хуралдаанаар С.Баярцогт Үндэсний эв нэгдлийн Засгийн газрыг байгуулах ёстой гэсэн санал хэлсэн. Энэ талаар АН-ын бүлэг ямар, байр суурьтай байгаа вэ?

-Шуудхан хэлэхэд Эв нэгдлийн Засгийн газар байгуулах бодол манай намд байхгүй. Энэ бол зөвхөн С.Баярцогт гишүүний бодол. Ардчилсан намын байр суурь биш гэдгийг хэлсэн. Цаашид ч тийм зүйл байхгүй.

-Х.Баттулга сайдын асуудлыг намын бүлэг авч хэлэлцсэн үү?

- Өнөөдрийн байдлаар Засгийн газраас Х.Баттулга сайдыг ажлаас нь чөлөөлөх тухай албан ёсны бичгийг бидэнд өгөөгүй байна. Тиймээс энэ асуудлаар манай бүлэг хуралдаагүй. Харин маргааш болох байнгын хорооны хуралдааны өмнө бүлэг зайлшгүй хуралдана.

-Засгийн газар таван тэрбум ам.долларын бонд гаргах эрхтэй байгаа. Нэг хэсгийг нь гаргасан. Үлдсэнийг нь гаргах асуудал ер нь Өрийн удирдлагын тухай хуулиар шийдэгдэх үү?

-70 хувь гэдэг нь том сонсогдож байж магадгүй. Гэхдээ 3.5 тэрбум ам.доллараар хийх ажлын хүлээлт маш их байгаа гэдгийг бодох хэрэгтэй.

-Эдийн засгийн асуудлын хүрээнд хоёр хөрштэй харилцах талаар АН-ын бүлэгт төлөвлөж буй ажил байна уу?

-Хоёр хөрштэй харилцах харилцааны талаар манай намын бүлэг дотроо ярилцсан зүйл байгаа. Гэхдээ хэзээ энэ асуудлаа гаргаж тавих вэ гэдэг нь бүлгийн дотоод асуудал юм.