Өнгөрөгч долоо хоногт УИХ-ын нэгдсэн чуулганаар хууль зүйн сайд Х.Тэмүүжинг огцруулах асуудлыг хаалттай хэлэлцсэн ч эцсийн шийдвэр гаргах мөчид МАН-ын бүлэг 5 хоногийн завсарлага авсан билээ. Хаалттай хуралдаанд хууль хяналтын байгууллагын удирдлагууд оролцож Х.Тэмүүжинтэй хамтран ажиллах боломжгүй гэсэн утгатай мэдэгдэл хийсэн нь олон гишүүний эгдүүцлийг хүргэсэн гэдэг. Нэг хэсэг нь “Хаалттай хуралдаан шүүх хурал шиг болж байна, УИХ дээр цагдаа хүчний байгууллагын удирдлагуудыг дуудаж ирж байцаалт авдаг нь буруу” гэсэн бол хууль хяналтын байгууллагын өгч байгаа мэдээлэл хороондоо зөрөөд байгаа нь олон хүний гайхшралыг төрүүлсэн байна. Тэр ч бүү хэл Х.Тэмүүжинг тодорхой хэргээр шалгагдаж байгаа гэж хэлсэн нь байдлыг улам хүндрүүлсэн байна. Хэрвээ УИХ-ын гишүүн гэмт хэрэгт холбогдсон бол Улсын Ерөнхий прокурор УИХ-д хандаж  чуулганаар гишүүний бүрэн эрхийг нь түтгэлзүүлж шалгадаг хуультай. Гэтэл Х.Тэмүүжингийн асуудлыг хуулийн дагуу оруулж ирэхгүй улстөрийн арга хэрэгслээр сайдын суудлаас нь огцруулах асуудал тавьж байгаад гайхсан хүн олон байв. Ингээд хууль хяналтын байгууллагын өгч буй мэдээллийг нягтлах шаардлагатай гэсэн үндэсллээр МАН-ын бүлэг завсарлага авсан гэдэг. Гэвч зарим эх сурвалжийн хэлж буйгаар МАН-ынхан зөвхөн дээрхи шалтгаанаар завсарлага аваагүй бололтой.

    МАН-ын бүлэг Х.Тэмүүжинг огцруулах ёстой гэсэн нэгдсэн дүгнэлтэнд тийм ч амархан хүрээгүй гэнэ. Х.Тэмүүжинтэй ойр дотно холбоотой үе тэнгийн залуус нь түүнийг өмгөөлсөн байр суурийг бүлгийн хуралдаа илэрхийлсэн ч арга буюу олонхийн дагахад хүрсэн гэдэг. Тэрээр өөрийнх нь асуудал яригдаж эхлэхэд л МАН-ын бүлгийн дарга С.Бямбацогтын өрөөнд орж нэлээд удаан ярилцаж суусан гэдэг. Хоёр дахь удаагаа парламентад хамт суугаа тэднийг энгийн дотно харьцаатай гэдгийг ч ойрын эх сурвалжууд хэлдэг. Гэсэн хэдий ч МАН-ын бүлгийн шийдвэр нэгэнт гарсан. Харин АН-ын бүлэг дотооддоо нэлээд дажинтай байсны эцэст түүнийг авч үлдэх шийдвэр гаргасан. Үүнийгээ ч “шударга ёс” бүлгийн гишүүдээр хүлээн зөвшөөрүүлж чадсан байна. Гэвч УИХ-ын дарга З.Энхболд, Х.Баттулга, О.Баасанхүү нарын цөөн гишүүд түүнийг огцруулахын төлөө санал өгнө гэдгээ ил цагаан мэдэгдэж байдлыг улам хүндрүүлсэн. Ингээд хаалттай чуулган хуралдаж санал хураалт болоход түүнийг огцруулах тал 1,2 кнопоор илүү гарах хандлагатай болоод явчихсан ажээ.

    Харин түүнийг огцруулах талд гэнэтийн тооцоологүй зүйл гарч арга буюу завсарлага авахад хүрсэн байна. МАН-ынханы тооцоолсон ёсоор санал хураалт болох гэтэл Ё.Отгонбаяр гишүүн алга болчихсон гэнэ. Ё.Отгонбаярын эхнэрийг өнгөрөгч сонгуулийн үеэр тодорхой хэрэгт холбон хууль хяналтын байгууллагаас шалгах болсон. Үүнд нь ихэд эгдүүцсэн Ё.Отгонбаяр хууль зүйн сайд Х.Тэмүүжинд нэлээд хатуу үгсийг ч чулуудаж байсан. Гэтэл Х.Тэмүүжинг огцруулах болоход Ё.Отгонбаяр хаашаа алга болчихов гэдэг нь олон хүнийг гайхшруулжээ. Нэг хэсэг нь түүнийг шалгагдаж байгаа асуудлаар нь дамжуулж дарамталсан байж болно гэж байна. Өөр нэг хэсэг нь түүнийг МАХН-ын дарга Н.Энхбаярын нөлөөнд орсон байж болзошгүй гэж хардах болжээ. Учир нь Ё.Отгонбаярыг улстөрд хөтөлж оруулсан хүн нь Н.Энхбаяр. Н.Алтанхуягийн засгийн газар багаа бүтнээр нь авч гарахын тулд Н.Энхбаяртай тохиролцож Х.Тэмүүжинг аврах болсон гэдгийг эх сурвалжууд мэдээллэж байгаа. Үүний илрэл болж Н.Энхбаяр өөрийнхөө зөвлөх асан Ё.Отгонбаярыг нөлөөндөө оруулсан гэх мэдээлэл ч саарал ордноор түгэх болсон. Чухам ямар шалтгаанаар Ё.Отгонбаяр гишүүн Х.Тэмүүжинг огцруулах асуудлаас тойрч дөлөх болсон шалтгаан энэ долоо хоногт тодорхой болно.