Өнөөдөр Байгаль орчин, хүнс, хөдөө аж ахуйн болон Эдийн засгийн байнгын хорооны хамтарсан хуралдаан болж Үйлдвэр хөдөө аж ахуйн сайд Х.Баттулгын хүсэлтийг хэлэлцлээ. Тэрбээр өөрийн хүсэлтээр сайдынхаа албан тушаалаас чөлөөлөгдөх хүсэлтийг өргөн бариад байгаа юм.  Хуралдааны үеэр Байгаль орчин, хүнс хөдөө аж ахуйн байнгын хорооны дарга Г.Баярсайхан УИХ-ын гишүүн Б.Бат-Эрдэнэ, Д.Сумъяабазар нарыг “аварга” цолоор нь дуудаж цоллов.

Тэрбээр “Б.Бат-Эрдэнэ аварга, Д.Сумъяабазар аварга үг хэлнэ. Өөр үг хэлэх саналтай гишүүд гараа өргөөрэй” гэж хэлсэн юм. Харин түүний хэлсэн үгэнд Б.Бат-Эрдэнэ аварга нилээн эмзэглэж “Чи надаар тоглоом, тохуу хийгээд байна уу. Ёс зүйтэй байгаарай. Хэнийг юу гэж дуудахаа ялгаж, салгах ёстой шүү” гэв.

 Б.Бат-Эрдэнэ гишүүний хувьд Монгол түмний хайртай аварга мөнөөсөө мөн. Гэхдээ наадмын зүлэг ногоон дэвжээ бус парламентын танхимд түүнийг "аварга аа" гэж дуудах нь хэр тохиромжтой вэ гэдгийг бодох л асуудал билээ.

Ямартай ч үүнийг сонссон хүмүүс Г.Баярсайхан даргыг ихээхэн шүүмжилж байна.