2014.05.06  өдөр буюу өнгөрсөн долоо хоногт ҮАБЗ-ийн зөвлөл хуралдаж нэгэн дуулиант шийдвэр гаргажээ. Өөрөөр хэлбэл Монгол Улсын Ерөнхийлөгч UBS телевизээр хэлсэнчлэн бүтэн зургаан сар шаардаж байж "Чингис" бондын зарцуулалтыг ҮАБЗ хэлэлцэн тодорхой шийдвэрүүдийг гаргажээ. ҮАБЗ-ийн ихэнх шийдвэрүүд "Чингис" бондын талаарх цөөнхийн бүлгийн шаардлагуудыг хэрэгжүүлэхийг шаардсан байна.

   Үүнээс гадна нэгэн ноцтой шийдвэр гаргасан нь Эдийн Засгийн хөгжлийн сайд Н.Батбаярт хариуцлага тооцохыг Засгийн газарт зөвлөмж болгожээ. Тухайлбал ҮАБЗ Засгийн газарт зөвлөмж өгөх шийдвэрийн 2.7-р заалтад "Үндэсний Аюулгүй байдлын зөвлөлийн 2012 оны 28/20 дугаар зөвлөмжийн 2.4-ийн заалтыг биелүүлээгүй албан тушаалтанд хариуцлага тооцох" гэжээ. Тэгэхээр ҮАБЗ ямар хүнд хариуцлага тооцохыг чиглэл болгосныг лавлаж 28/20 дугаар зөвлөмийн 2.4-ийн заалтыг олж үзэв. Уг заалт нь "Засгийн газрын хүлээх эрсдлийг багасгах, хөрөнгө оруулалтын орчинг дэмжих үүднээс нэг төсөл, хөтөлбөрт хийх санхүүжилт нь тухайн төслийн нийт санхүүжилтийн 1/3-ээс хэтрэхгүй байх" гэсэн заалт байна. Өөрөөр хэлбэл ҮАБЗ-өөс аливаа төслийн 1/3-аас илүүг "Чингис" бондоос санхүүжүүлсэн албан тушаалтанд хариуцлага тооц гэж Засгийн газарт тодорхой чиглэл өгчээ.

 Тэгэхээр хэн гэдэг албан тушаалтан аливаа төслийн 1/3-аас илүүг "Чингис" бондоос санхүүжүүлсэн бэ гэдэг асуудал урган гарч ирж байна. Угаасаа дур мэдэн ийм зарцуулалт хийсэн хүн байгаа учраас ҮАБЗ асуудлыг нарийвлан хэлэлцээд ийм шийдвэр гаргасан болж таарлаа.

 Мэдээж "Чингис" бондын мөнгөнөөс Н.Батбаяраас өөр ингэж дур мэдэн санхүүжилт өгөх хүн байхгүй. Тэгэхээр ҮАБЗ-ийн хариуцлага тооц гэж нэр цохоод байгаа хүн нь Н.Батбаярыг хэлсэн хэрэг хэмээх яриа саарал ордноор тархжээ. Учир нь Н.Батбаярыг найзынхаа удирддаг "Гудамж" төсөл болон аймгуудыг холбох автом замын төслүүдийн санхүүжилтийг 1/3-ээс ихгүй байх гэсэн заалтыг зөрчсөн гэсэн яриа гарсан байна.

 Хэрэв Н.Батбаяр сайд "би биш, ҮАБЗ-ийн шийдвэрийг зөрчөөгүй" гэвэл хэн зөрсөн байх вэ? гэдэг асуудал урган гарч ирнэ. Ямар ч байсан асуудал байнаа хариуцлага тооцоо гэж ҮАБЗ үүрэг өгөөд байхад Засгийн газар хэн нэгэн хүнтэй хариуцлага тооцох нь гарцаагүй боллоо. Хэрэв ҮАБЗ-ийнхөө шийдвэрийг биелүүлэхгүй бол Засгийн газар л өөрөө эвгүй байдалд орно. Тэр хүн нь Н.Батбаяр гэсэн яриа ихээхэн тархаж байна.

Эх сурвалжийн мэдээлж байгаагаар бол ҮАБЗ-ийн хурал нилээд ширүүхэн болсон сураг гарав. Зөвлөлийн гишүүд Н.Батбаяр сайдын "Чингис" бондын зарцуулалтын талаарх илтгэлийг хэлэлцээд асуудлыг ихэд шүүмжилсэн гэсэн яриа саарал ордноор гарч. Бас олон нийт болоод цөөнхийн бүлгийн зүгээс шахаж шаардаад байгаа асуудлууд ор үндэстэй болохыг ч ярилцсан гэнэ.