Үйлдвэр хөдөө аж ахуйн сайд Х.Баттулгыг өөрийнх нь хүсэлтээр үүрэгт ажлаас нь чөлөөлөх асуудлыг УИХ хэлэлцэж эхлээд байна. Засгийн газар Х.Баттулгын чөлөөлөгдөх хүсэлтийг УИХ-д өргөн мэдүүлсэн нь түүнийг Р.Амаржаргалыг авч үлдэж байсан шигээ гуйж, гувшихгүй гэдгээ илэрхийлсэн хэрэг болсон юм. Угаас Х.Баттулгыг ардчиллын түүхэнд оруулсан хувь нэмэр, улстөрийн туршлага, боловсрол мэдлэгээр нь Р.Амаржаргалтай харьцуулашгүй тул гуйж, чангаах шалтгаан байхгүй бизээ.

Ийнхүү ажлаасаа чөлөөлөгдөх болсон Х.Баттулгын асуудлыг Байгаль орчин хүнс хөдөө аж ахуйн болон эдийн засгийн байнгын хорооны хамтарсан хуралдаанаар хэлэлцэх үед УИХ-ын гишүүн Ц.Нямдорж нэлээд анхаарал татах зүйлийг ярьсан юм.

Тэрээр “Тавантолгойг гартаа оруулах гэж Х.Баттулга оролдоод Орос, Хятад, Солонгос гээд баахан орнуудтай зэрэг хэлэлцээр хийгээд, гэрээ ч байхгүй улс орны  харилцаа ч байхгүй болгосон хүн л дээ. Х.Баттулгыг зүгээр нэг давхар дээлнээс болоод Засгийн газраас гарч байна гэж ойлгойхгүй байна. Ардчилсан намын мөрийн хөтөлбөр хэрэгжих боломжгүй болж, эдийн засаг уналтанд ороод ирэхээр сая Солонгост сүйрсэн онгоцны капитан шиг багаа хаяад зугтаж байна л даа. Ийм л юм хийдэг хүн. Чи мөн ч  их муухай юм хийсэн дээ Х.Баттулга аа... Маккензи гэдэг компиар 12 сая доллараар төмөр замын урьдчилсан судалгаа маягийн юм хийлгээд тэр 12 сая доллараас өөрийнхөө зөвлөх Ганбат гэдэг хүнд 2 сая доллар өгчихсөн ш д. Одоо тэр Маккензигийн баримт бичгээс хэрэглэж байгаа юм байхгүй” гэв.

Цаашлаад түүнийг чөлөөлөх биш, төмөр замын асуудлаар хариуцлага ярьж огцруулах ёстой гэсэн байр суурийг ч илэрхийлсэн. Үнэхээр 2011 онд төрөөс төмөр замын талаар баримтлах бодлого батлагдаж байх үед Х.Баттулга “1000 км замыг хоёр жилийн дотор барина” гэж хэлж байсан. Санхүүжилтийг хэрхэн шийдвэрлэх талаар асуухад “Концессийн хууль байна. Зээл байна. Ерөнхийдөө концессийн хуулийн дагуу явна. Хөрөнгө оруулагчид ихэд сонирхож байгаа. Орос, Хятад, Солонгосын тал урьдчилсан байдлаар оролцоно гэдгээ илэрхийлээд байгаа” гэж хариулж байсан нь хөдлөшгүй үнэн. Үүнээс шинэ төмөр зам төслийг татвар төлөгчдийн мөнгөөр биш хөрөнгө оруулагчдын мөнгөөр шийдэх юм байна гэсэн ойлголтыг хаана хаанаа авсан билээ. Гэтэл өнөөдөр төмөр замд төрөөс хөрөнгө оруулалт хийгээгүй учраас ажил явахгүй байна гэсэн тайлбарыг өгөх болсон. Тэр ч бүү хэл хувийн хэвшил ажлаа эхлүүлээд явж байсан төслийг зогсоогоод 80 гаруй тэрбум төгрөгийг нөхөн төлбөрт гарлагдсан байдаг. “Энержи ресурс” ХК төмөр замаа 500 сая долларт багтаан өөрийн хөрөнгөөр босгоно гэж байсан бол түүнийг нь булааж авсан төр 900 сая доллараар бүтээн байгуулна гээд Чингэс бондын хөрөнгөөс 400 тэрбум доллар авахаар батлуулаад явж байна. Энэ мэтээр төмөр замын ажилд Х.Баттулгын хийсэн будлианыг Монголын ард түмэн, Засгийн газартайгаа хамт үүрнэ гэдгийг Ц.Нямдорж хэлсэн юм.

Тавантолгойн төмөр замыг заавал өргөн царигаар тавина гэж Х.Баттулга өөрийн болон өрөөлийн намынхантайгаа нэлээд үзэлцсэний эцэст арга буюу үнэнд гүйцэгдэж Монгол Улсын Засгийн газар Хятадад нийлүүлэх нүүрсний тээврийн өртөгийг хямд байлгах зайлшгүй шаардлагаар нарийн царигтай зам тавихаар асуудал оруулж ирж байна. Харин Монгол Улс төмөр замын хэрэгцээгүй төлөвлөгөөнд 12 сая доллараа салхинд хийсгээд хоцрох боллоо. Энэ 12 сая доллараас 2 сая доллар салгаж чадсан “Liberty Partners” гэгч ямар компани вэ? Ямар ч тендергүйгээр 2 сая доллар салгаж чадсан тус компанийг үүсгэн байгуулагч Чулуунхүүгийн Ганбат нь Х.Баттулгыг зам тээврийн сайдаар ажиллаж байхад зөвлөх нь байсан залуу ажээ. Тэрээр АНУ-ын Кколумбиагийн Их сургуулийг төгссөн, Нью Иоркын Commerzbank AG-д хөрөнгө оруулалтын мэргэжилтээр таван жил ажиллаад улмаар Х.Баттулгын зөвлөх болсон төд удалгүй гадаадын хөрөнгө оруулагчдад зуучлах, бизнесийн зөвлөгөө өгөх үйл ажиллагаа явуулдаг гэх “Liberty Partners” компанийг үүсгэн байгуулсан гэдгээс өөр мэдээлэл олдохгүй байна.

Илэрхий ашиг сонирхолын зөрчилтэй этгээдэд зөвлөх үйлчилгээний хөлс нэрээр 2 сая доллар өгсөн гэдгийг УИХ-ын гишүүн барим тавим хэлж байхад АТГ, хууль хяналтын байгууллага яагаад хөдлөхгүй байгаад гайхах хүн олон байна.