УИХ-ын гишүүн О.Баасанхүү хууль зүйн сайд Х.Тэмүүжинг огцруулах тогтоолын төслөө эргүүлэн татсан нь МАН-ынханы эгдүүцлийг нэлээд хүргэв. Хууль зүйн сайд асан УИХ-ын гишүүн Ц.Нямдорж “Хоёр хоногийн өмнө шоронд хүн нас барсан. Тэрийг зөв гэж саналаа татаж байгаа юм уу?” гэж маш хурцаар байр сууриа илэрхийлсэн юм. Ингээд хууль санаачлагч нэгэнт саналаа татаж авсан тул дараагийн асуудал болох 2014 оны төсвийн хүрээний мэдэгдэл, 2015 оны төсвийн төсөөллийн тухай хуулийн төслийг хэлэлцэх эсэхийг ярьж эхлэв. Гэтэл О.Баасанхүү гишүүн хаанаас ч юм гэнэт гарч ирээд хэлэлцэж байгаа асуудлаас тэс өөр үг хэллээ. Тэрээр “МАН-ынхан ой санамж нь хайччихсан юм бэ? Тав хоногийн өмнө би горимын санал хэлсэн аль нь ч дэмжээгүй. Хаалттай хуралдаанаар Х.Тэмүүжингийн асуудалд улам хүндсэрсэн зүйлүүд яригдсан тэр бүхнийг нэмж оруулах боломжгүй” гэхэд МАН-ын гишүүд түүнийг ихэд шоглон, чангаар басамжлан инээцгээв. Үүнд эгдүүцсэн О.Баасанхүү “Чам шиг биш Хүрэлбаатараа... Чам шиг тендер авч явдаггүй... Чи Увсын...” гээд учир утга нь тодорхой бус логик дараалалгүй үгээ нэлээд түгдэрч хэлэв. Ийнхүү тэвдэж суухад УИХ-ын дарга З.Энхболд “хэлэлцэх асуудалтай холбогдолгүй тул микрафоныг чинь хаалаа” гээд үгийг нь тасаллаа. Хэрвээ түүний микрафоныг хаагаагүй бол Х.Тэмүүжинг огцруулах саналаа ямар үндэсллээр татсанаа тайлбарлаж МАН-ын хариу шоглож тун хөгжилтэй этюд болох байлаа.