Улсын Их Хурлын чуулганы өнөөдрийн /2014.05.15/ үдээс өмнөх нэгдсэн хуралдаанаар эхлээд Монгол Улсын нэгдсэн төсвийн 2014 оны төсвийн хүрээний мэдэгдэл, 2015-2016 оны төсвийн төсөөллийн тухай хуульд өөрчлөлт оруулах тухай хуулийн төслийн хэлэлцэх эсэх асуудлыг хэлэлцэв. Энэ талаарх хууль санаачлагчийн илтгэлийг Сангийн сайд Ч.Улаан танилцууллаа. Мөн хуулийн төслүүдийн талаарх Төсвийн байнгын хорооны санал, дүгнэлтийг Улсын Их Хурлын гишүүн Л.Эрдэнэчимэг танилцуулсан юм. Төсвийн тухай хуулийн 34.1.4-т “Төсвийн ерөнхийлөн захирагч хооронд төсвийн зохицуулалт хийх” тохиолдолд тодотголын төслийг боловсруулна” гэж, “Монгол Улсын Засгийн газарт чиглэл өгөх тухай” Улсын Их хурлын 2014 оны 4 дүгээр сарын 17-ны өдрийн 30 дугаар тогтоолд Монгол Улсын 2014 оны төсвийн тодотголын төслийг энэ тогтоолын хүрээнд боловсруулан Улсын Их Хуралд өргөн мэдүүлэх” гэж тус тус заасан нь Монгол Улсын 2014 оны төсвийн тухай хууль, Нийгмийн даатгалын сангийн 2014 оны төсвийн тухай хуульд өөрчлөлт оруулах хуулийн төслийг боловсруулсан. Энэхүү хуулийн өөрчлөлтүүдийг боловсруулахын тулд Төсвийн тогтвортой байдлын 7.3-т “Төсвийн төсөл боловсруулах, батлах, батлагдсан төсөвт нэмэлт, өөрчлөлт оруулахдаа дунд хугацааны төсвийн хүрээний мэдэгдэлд нийцүүлнэ” гэж заасны дагуу юуны өмнө Монгол Улсын нэгдсэн төсвийн 2014 оны төсвийн хүрээний мэдэгдэл, 2015-2016 оны төсөөллийн тухай хуульд өөрчлөлт оруулах шаардлага бий болж байна. Хуулийн өөрчлөлт болон макро эдийн засгийн голлох үзүүлэлтүүдийн төсөөлөлд өөрчлөлт орсноор дунд хугацааны төсвийн хүрээний мэдэгдэлд тусгагдсан төсвийн үндсэн үзүүлэлтүүд болон макро үзүүлэлтүүдийн хэмжээг дахин тооцож, хуулийн төсөлд тусгасныг Сангийн сайд танилцуулгадаа дурдлаа.
Хуулийн төслүүдийн хэлэлцэх эсэхтэй холбогдуулан Улсын Их Хурлын гишүүн Д.Дэмбэрэл, Д.Лүндээжанцан, Ө.Энхтүвшин, Ч.Хүрэлбаатар, Б.Бат-Эрдэнэ, Д.Хаянхярваа, Ж.Эрдэнэбат, Д.Сумъяабазар нарын асуултад Сангийн сайд Ч.Улаан, Эдийн засгийн хөгжлийн сайд Н.Батбаяр болон Төсвийн байнгын хорооны дарга Ц.Даваасүрэн нар хариулт өгөв. Мөн хуулийн төслүүдийг хэлэлцэх эсэх талаар Улсын Их Хурлын гишүүн Ч.Хүрэлбаатар, Б.Бат-Эрдэнэ, Н.Энхболд, Ж.Эрдэнэбат, Д.Сумъяабазар, Ш.Түвдэндорж нар үг хэллээ.
Ингээд Монгол Улсын нэгдсэн төсвийн 2014 оны төсвийн хүрээний мэдэгдэл, 2015-2016 оны төсвийн төсөөллийн тухай хуульд өөрчлөлт оруулах тухай хуулийн төслүүдийг хэлэлцэх нь зүйтэй гэсэн байнгын хорооны саналын томъёоллоор санал хураалт явуулахад чуулганы нэгдсэн хуралдаанд оролцсон гишүүдийн 52.9 хувь нь дэмжсэнээр анхны хэлэлцүүлэгт бэлтгүүлэхээр Төсвийн байнгын хороонд шилжүүллээ гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
