“Ерөнхий сайдын 30 минут” уулзалт өнөөдөр Монголын залуучуудын холбооны байранд боллоо. Энд МҮОНРТ-ээс зохион явуулдаг “Залуу зохион бүтээгч 2014″ уралдааны гуравдугаар шатанд тунаж үлдсэн шилдэг 37 бүтээлийн үзэсгэлэн гарч байгаа юм.

Монгол хүний оюун санаа, ур чадвараас урган гарсан тэдгээр бүтээлүүдтэй нэг бүрчлэн танилцсан Ерөнхий сайд Н.Алтанхуяг: 

“Залуу зохион бүтээгч уралдааныг үе үеийн Ерөнхий сайдууд дэмжиж оролдог байсан учраас би ч бас дутахгүй оролцож байгаа. Ноднин жил бид үзсэн. Манай хүүхдүүд олон шинэ бүтээл хийсэн байсан. Энэ жил зарим нэг нь бүтээлээ шинэчилж сайжруулаад ирсэн байна. Жишээ нь нэг мятаршгүй ямаа самнагч залуу байгаа. Тэр энэ жил бүтээлээ ямаандаа зовлон багатай, нэг пижигнүүлэхэд овоо хэдэн грамм ноолуур авахаар сайжруулсан байна" гэлээ.

Энэ жилийн "Залуу зохион бүтээгч" уралдаанд нийтдээ 200 гаран бүтээл оролцсон бөгөөд гуравдугаар шилдэг 37 бүтээл  шалгараад байна. Тухайлбал Булган аймгийн сурагч Р.Авирмэд бага оврын тракторын хөдөлгүүрийн хүчээр ажилладаг өтөг малтагч төхөөрөмж зохион бүтээжээ. Тэр нь өтөг бууц цэвэрлэж, ачиж, зөөхөөс гадна цас цэвэрлэн зам гаргах боломжтой юм.

Уг уралдааны   эцсийн дүн ирэх зургадугаар сарын 1-ний өдөр гарна. Уралдааны  ялагч МУИС, ХААИС, ШУТИС-ийн инженер техникийн мэргэжлийн ангиудад дөрвөн жил суралцах тэтгэлгийн хамт 10 сая төгрөг гардан авах юм.