Үйл явдал ингэж л эхэлсэн. Хууль зүйн сайд хар тамхичинтай ч юмуу, хар тамхитай ч юмуу холбоотой гэж сонин хэвлэлүүд шуурсан. Гэмт хэрэгт холбогдсон ч юмуу, гэмт хэрэгтэнтэй холбоотой ч юмуу нэг л тийм аймшгийн киноны эхлэл шиг сэрдхийм үзэгдлүүд хөврөөд л. Насанд хүрээгүй охиныг “биеэ үнэлэгч, хар тамхичин" гэж цоллохдоо юуг нь ч нуугаагүй хэрнээ сайдыг огцруулах асуудлыг учиргүй нууж хэлэлцсэн.

Хууль зүйн сайд Х.Тэмүүжинг хууль зөрчсөн, эмнэлэгийн аппарат эвдсэн, салбараа удирдаж чадахгүй зэрэг хэд хэдэн үндэсллээр огцруулах саналыг  О.Баасанхүү өргөн барьж УИХ энэ асуудлыг хэлэлцэх гэж бүтэн сарын ажлаа барав. Огцруулж чаддаггүй. Бас аварч чаддаггүй.

Эргэн тойронд нь бөөн айдас хүйдэстэй яриа өрнөнө. Хар тамхины хэрэгтэй Х.Тэмүүжин өөрөө холбоотой ч юм шиг ил далд яриа хананаас хананы хооронд шивэр авир хийх болов. Засгийг зайдчуулж, зангарагатай гээч нь хоромхон зуур мандах заяа О.Баасанхүүд тохиолоо. Эвий хөөрхий. Хүн тоож шиншилдэггүй гологдмол жаалыг явсан газарт нь сэтгүүлчид багшран бүслээд л мань эр ч төв царай гаргаж сайд огцруулагчийн дүрдээ нэлээд сайн орсон л доо.

АН-ын МоАХ, Шонхор фракцынхан нийлж байгаад хууль зүйн сайдыгаа балбах гэж байсан зодоон дундуур мань эр бужигнаад орчихсон хэрэг. Ардаа лантуу, алх агссан аваргуудыг жагсаачихаад шингэн хоолойгоороо үгүй мөн их шүгэлдсэн дээ. Гэтэл  Ерөнхийлөгч Ц.Элбэгдорж улстөрийн салхийг эргүүлж, бүх санаачлагыг өөртөө татах нь тэр. Х.Тэмүүжинг авч үлд гэсэн хөдлөшгүй лүндэнгээ буулгаж, Засгийн газрыг задгай шүүмжилж “чадахгүй бол багалзуурдана шүү” гээд “шүдээ харуулснаар” АН-ынхан Х.Тэмүүжингээ аварч үлдэхээс өөр сонголтгүй болох нь тэр. Завиа  бүтэн авч гарах Н.Алтанхуягийн гарамгай менежментийн хөврөл энэ улсын эрх мэдлийн тэнцвэрийг атгасан эмзэг цэг дээр уран гэгч нь дарж чадлаа. Басар нохойгоо “барь” гээд  ярдаглуулсан “эзэнбаяр” “шаарик одоо боль” гэх нь тэр.

Явдлаас явдлын хооронд ялгуулсан гавьяа байгуулагчийн дүрээр гарч ирсэн О.Баасанхүүгийн хоолой шингэрч сүрт том дүгнэлтүүд нь шалихгүй зэмлэлийн шинжтэй болоод ирснээр л өргөдлөө татах нь ойлгомжтой болоод эхэлсэн.Хар тамхины хэргээр эхэлсэн скандалын тасалбар “Уучлал гуйвал уучилна” гэсэн янагийн захианы  үнэтэй болтолоо хямдарсан. Х.Тэмүүжин ч тэрэнд нь тааруулж уучлал эрсэн янагийн захидал явуулсан ч байх шиг.

Хийх гэж байгаа үйлдэл нь хэтэрхий мэдэгдэм болсонд бантаж “уучлал хүссэн янагийн захианд дур ханаагүй" гээд нэлээд үзэлцсэн. Гэвч эцсийн мөчид тэр саналаа татлаа.

Угтаа тэрэнд сайдыг огцруулах нь л хамгийн чухал баймаар. Санал хураалтын дүнгээр ажлаасаа чөлөөлөгдөх нь л хүссэн үр дүн нь болмоор. Гэтэл огцруулах үндэсллээ дахиад дэлгэрүүлэх гэж өргөдлөө түр татсан гэдэг тайлбарыг хэлэх болов. Оршилын дөрвөн мөрөндөө хоёр үг нэмэх нь огцруулах зорилгоосоо илүү утга учиртай юм байхаа. Удахгүй дахиад өргөдөл өгөх юм гэнэ. Ёстой харагдаач!!!

О.Цагираг