Сүүлийн үед улс төрийн үйл амьдрал дуулиан, шуугиантай өнгөрч байна. Х.Тэмүүжин, Х.Баттулга, Ц.Нямдорж, О.Баасанхүү гэсэн гол дүрүүдтэй уцаар төрөм ший янгуу ужгирч байх зуур Төрийн ордноо олныг хөгжөөсөн нэг хүн гарч ирлээ. Шинэ баатрын нэр Г.Баярсайхан.

Үнэхээр ч түүнийг энэ хаврын ээдрээн дундах онигооны гол эзэн болгох хэд, хэдэн үндэслэл байгаа юм.

Тухайлбал өнгөрсөн лхагва гаригт Байгаль орчин, хүнс, хөдөө аж ахуй болон Эдийн засгийн байнгын хорооны хамтарсан хуралдаан болж, Үйлдвэр хөдөө аж ахуйн сайд Х.Баттулгын хүсэлтийг хэлэлцсэн. Энэ үеэр тэрбээр УИХ-ын гишүүн Б.Бат-Эрдэнэ, Д.Сумъяабазар нарыг “аварга” цолоор нь дуудаж цоллосон юм.

Түүнийг чанга яригчаар “Б.Бат-Эрдэнэ аварга, Д.Сумъяабазар аварга үг хэлнэ. Өөр үг хэлэх саналтай гишүүд гараа өргөөрэй” гэж ордноор нэг орилход ихэнхи гишүүд шоглож инээсэн бол заримынх нь дургүй нилээд хүрсэн бололтой байсан юм. Тодруулбал түүний хэлсэн үг Б.Бат-Эрдэнэ гишүүнийг нилээн эмзэглүүлж орхисон. Тэрбээр “Чи надаар тоглоом, тохуу хийгээд байна уу. Ёс зүйтэй байгаарай. Хэнийг юу гэж дуудахаа ялгаж, салгах ёстой шүү” гэв. Харин Д.Сумъяабазар гишүүний хувьд инээд алдаад өнгөрнө лээ.

Мөн тэрбээр аль хоёр жилийн өмнө сайдынхаа суудлаас буусан Ц.Нямдоржийг “сайд аа” хэмээн саймшираад авсан юм.

Аль 10 жилийн өмнө зодогоо тайлсан бөхийг “аварга аа” гэж, хоёр жилийн өмнө сайдаасаа больсон хүнийг сайд аа хэмээн дуудаж буй түүнийг сонссон хүмүүс Г.Баярсайхан гишүүнийг үнэхээр “уймраа” болсон гэж хэлэхэд хүргэж байгаа аж.

Б.Бат-Эрдэнэ гишүүний хувьд Монгол түмний хайртай аварга мөнөөсөө мөн. Гэхдээ наадмын зүлэг ногоон дэвжээ бус парламентын танхимд түүнийг "аварга аа" гэж дуудах нь хэр тохиромжтой вэ гэдгийг бодох л асуудал билээ.

Нөгөөтэйгүүр түүнийг замбараагүй зүйл ярих болсныг МАН-ын хуучин генсек У.Хүрэлсүхэд шанаадуулснаас болсон гэж тайлбарлах хүмүүс ч байна.