Сүүлийн үед төрийн өмчит "Эрдэнэс-Тавантолгой" асуудал ихээхэн анхаарал татах болсон. Анх энэ компанийн дуулиан Ерөнхий сайдын хүргэн Г.Дэнзэнгийн 17 тэрбумын асуудлаас болж олон нийтийн анхаарлын төвд орж ирсэн. Дараа нь 70 ам. доллараар зарагдаж байсан нүүрсийг 40 ам.доллар болгож буулгасан явдал дуулианыг дэвэргэсэн. Энэ мэт элдэв явдлаас болж "Эрдэнэс-Тавантолгой"-г олон хүн сонирхох болсон юм.

    Эцэст нь хаврын чуулганы хугацаанд төрийн өмчит "Эрдэнэс-Тавантолгой"-д шалгалт оруулах санаачилгыг хэсэг гишүүд гаргасан юм. Санаачилгын хүрээнд нам намыг төлөөлсөн гишүүдийг оролцуулахаар болжээ. Ингээд МАН, "Шударга ёс" эвсэлээс шалгалтын бүрэлдэхүүнд орох гишүүдийн нэрс ч тодроод байж. Гэтэл нэг л өдөр байнгын хорооны АН-ын гишүүдийн олонхи нь "Эрдэнэс-Тавантолгой"-д шалгалт оруулж болохгүй гээд шийдвэр гаргачихаж. АН-ынхны энэ шийдэл МАН-ынхны уур бухимдлыг дээд цэгт нь хүргэсэн сураг гарлаа. Учир нь "энэ компанид асуудал байгаа болоод л та бүхэн УИХ-аас ажлын хэсэг байгуулж шалгалт оруулахгүй байна. Ямар асуудал эрх ашгийг чинь хөндсөн болоод ингэж шийдэв" гээд нилээд асуудал болсон сураг гарлаа. Тэр ч бүү хэл МАН-ын дарга М.Энхболд "Эрдэнэс Тавантолгойд та бүхэн олонхийн саналаараа шалгалт оруулахгүй гэж шийдсэн нь ямар учиртай вэ" гэж асуусан гэнэ. Мэдээж хариултаа авч чадаагүй аж. Бас Ерөнхий сайд асан Сү.Батболд саяхан "Тавантолгойн Чалькотой хийсэн гэрээг та бүхэн алдагдалтай гээд байх юм. Би ашигтай гэрээ хийсэн гэж боддог. Хэрэв тийм ойлголцлын зөрүү байгаа бол одоо ажлын хэсэг байгуулаад шалгалт оруулья. Ард түмний төлөөллийг ч гэсэн оролцуулья" гэж хэлээд нэмэр болоогүй. 

    Ямар ч гэсэн АН-ынхан "Эрдэнэс-Тавантолгой"-д шалгалт оруулахгүй байгаа нь МАН-ын даргын асуусан шиг "ямар учиртай вэ" гэсэн эргэлзээ хардлагыг нэмэгдүүлэх боллоо. Саарал ордонд тарсан мэдээлэлээр бол Ерөнхий сайд Н.Алтанхуяг "Эрдэнэс-Тавантолгой"-д шалгалт оруулах хэрэггүй гэсэн чиглэл өгсөн гэсэн явган яриа газар авах болсон гэнэ. Хэрэв энэ нь үнэн бол Ерөнхий сайд яагаад ийм чиглэл өгөв гэдэг бас л анхаарал татна. Мэдээж асуудал байгаа болоод л шалгалт оруулахын эсрэг байгаа бололтой.

    Үүнтэй зэрэгцээд "Эрдэнэс-Тавантолгой" ХК-ийн удирдлагууд сүүлийн хэд хоног тасралтгүй хуралдаж УИХ-ын шалгалтанд бэлдсэн сураг ирлээ. Тэд санхүү, тайлан тооцоо гээд олон зүйлээ янзалсан байна. Төрийн өмчит энэ компанид ч бас янзлах зүйл их байсан бололтой.

    Эх сурвалжийн мэдээлж байгаагаар бол төрийн өмчит "Эрдэнэс мгл", "Эрдэнэс-Тавантолгой" компаниуд "Увс хүн"-ээр дүүрчээ. Бас эдгээр компаниудаас зарласан тендерт найдвартай шалгардаг цөөн хэдэн аж ахуйн нэгжүүд байдаг гэнэ. Бас "Эрдэнэс-Тавантолгой" компанийн санхүү ч ихээхэн будилаантай болсон гэж яригддаг аж. Энэ мэт олон асуудал байгаа учраас л УИХ-ын шалгалтыг оруулж болохгүй гэж эрх баригчид шийдлээ. Хэдий болтол УИХ-ын шалгалтыг хориглохыг хэлэхэд хэцүү юм. Хэрэв МАН-ынх дахин энэ асуудлыг сөхвөл бөөн л юм болж мэдэхээр байна. Харин ард түмэн нууцлаад байгаа төрийн өмчит энэ аж ахуйн нэгжид шалгалт оруулахыг дэмжиж асуудлыг хүрээг өргөтгөж мэдэх юм.