Удтал маргалдсан төмөр замын асуудал сая нэг шийдэгдэж байх шиг. Гэхдээ бүх зүйл жигдэрлээ гэвэл бас үгүй юм. Учир нь “Төмөр замын шинэ шугам барих тухай” УИХ-ын тогтоолын төслийг Байнгын хороо, УИХ-аар хэлэлцэж байж эцсийн шийдвэрийг гаргана.

“Шинэ төмөр зам” төслийн хүрээнд Ухаахудаг-Гашуунсухайт чиглэлийн 270 км төмөр замын суурь ажил хийгдэж, нийт ажлын гүйцэтгэл 40 орчим хувьтай явагдаж байгаа. Тиймээс төмөр замын царигийн асуудлыг яаралтай шийдэж өгөхийг Засгийн газар УИХ-аас хүсч байгаа юм. Тиймдээ ч уг асуудалд Х.Баттулга болоод түүний хүмүүсийг огт оролцуулаагүй гэх. Олон жил Төмөр замын царигийн төлөөх тулалдааныг эрчимтэй өрнүүлсэн Х.Баттулгыг уг асуудалд оролцуулаагүйн учир нь түүний өргөн царигт үнэнч байдаг зангаас болсон аж.

Засгийн газраас Таван толгой–Гашуунсухайт, Сайншанд–Замын-Үүд, Хөөт–Бичигт чиглэлийн төмөр замын шинэ шугамыг 1435 мм-ийн буюу нарийн царигтайгаар барихаар оруулж ирсэн. Харин Могойн гол–Эрдэнэт, Таван толгой–Сайншанд–Баруун-Урт–Хөөт–Чойбалсан, Хөөт–Нөмрөг чиглэлийн төмөр замын шинэ шугамыг 1520 мм-ийн буюу өргөн царигтайгаар барихаар Улсын Их Хурлын тогтоолын төсөл боловсруулсан.  Гэхдээ эдгээр асуудлыг хэлэлцэх үеэр урьд цагийн маргаан эрчимтэй өрнөх нь гарцаагүй.

Засгийн газрын гаргасан дээрх шийдвэр өчигдөрхөн сайдынхаа суудлаас буусан Х.Баттулгын уур бухимдлыг дээд цэгт нь хүргэсэн байна. Учир нь Х.Баттулгын хувьд олон жил өргөн царигийг дэмжиж ирсэн хүн. Одоо ч энэ бодолтойгоо хэвээр байгаа. Тиймдээ ч тэрбээр Засгийн газраас өргөн барьсан дээрх төслийг унагахын төлөө бүх зүйлээрээ дэнчин тавьж тэмцэхээр болсон талаар эх сурвалж мэдээллээ.

Энэ нь удахгүй “Монголын төмөр зам” компанид эхлэх албан тушаалын томоохон зодооноос мэдэгдэх аж. Ерөнхий сайд Н.Алтанхуяг тус газарт удахгүй маш том халаа, сэлгээг хийхээр бэлтгэж байгаа аж. Тодруулбал тэрбээр “Монголын төмөр зам” төрийн өмчит хариуцлагатай компанид ажиллаж буй Х.Баттулгын ойр орчмын бүх хүнийг явуулахаар болжээ. Энэ нь мэдээж Засгийн газар төмөр замд явуулах бодлогоо саадгүй хэрэгжүүлэх гэснийх.

Харин Х.Баттулга төмөр замын асуудлыг тийм ч амар орхихгүй бөгөөд энэ асуудлаар Засгийн газрын эсрэг тууштай тэмцэхээр бэлтгэж байгаа аж. Тиймдээ ч Зам тээврийн яам болоод Монголын төмөр замд оруулсан өөрийн хүмүүсийг явуулахгүйн тулд нилээн тэмцэлдэх талаар эх сурвалжууд хэлж байна. Тэрбээр өмнө нь “Монголын төмөр зам” ТӨХК-аар дамжуулан төмөр замчдыг Засгийн газрын эсрэг босгож байсан удаатай. Одоо тэрбээр Засгийн газраас боловсруулсан Төмөр замын талаарх бодлогыг батлуулахгүй тулд улс төрийн карьер, өөрт байгаа бүх нөөц бололцоогоо тавьж тоглох нь тодорхой боллоо. Харин Засгийн газраас эхний ээлжинд Х.Баттулгын гэх бүх хүмүүсийг зайлуулах аж.

Одоогоос хэд хоногийн өмнө Ерөнхий сайд Н.Алтанхуяг, Сайд Х.Баттулга хоёрын уулзалт өглөөний найман цагаас үдийн хоёр хүртэл бүтэн 6 цаг хэнийг ч оруулахгүйгээр үргэлжилсэн гэж хэвлэлүүд шуугисан. Уг уулзалтын хийгээд ойлголцолын гол цөм нь "Төмөр замын шинэ шугам барих тухай" асуудал байсан ч гэх мэдээлэл байна. Ингэж олон цаг уулзалдаад АН-ын хоёр лидер ойлголцолд хүрэлгүй хоёр тийш болсон байна. Тэгээд л Ерөнхий сайд Н.Алтанхуяг сайд Х.Баттулгынхныг оролцуулалгүй бодлогоо явуулахаар зүтгэж эхэлсэн нь энэ аж. Харин Х.Баттулга ямар хариу барих нь удахгүй тодорхой болох биз.