Өнөөдөр "RAILBUS" авто вокзалаас Толгойтын чиглэлд анхны чиглэлдээ явж хүмүүсийн анхаарлыг татав. Энэхүү  RAILBUS ирэх сарын 6-наас Амгалан-Толгойтын чиглэлд 400 гаруй зорчигдыг тээвэрлэх ба үнэ тарифийн хувьд одоогоор тодорхойгүй байгаа юм.

Цагт 160 км-ийн хурдтай давхих "RAILBUS"-аар иргэд ердөө л 20 минут зорчиод хүссэн газартаа очих нөхцөл бүрдэж байгаа. Тэгвэл иргэдэд ч, нийслэлийн авто замын ачаалалд ч багагүй хувь нэмэр оруулах уг ажлын талаар Зам тээврийн сайд Л.Гансүхээс зарим зүйлийг тодрууллаа.

-18,4 тэрбум төгрөгийн санхүүжилтээр эл ажлыг хэрэгжүүлж байна гэсэн. Тэгвэл энэ мөнгөн дүн яг хангалттай хүрэлцэх хэмжээний байж чадаж байна уу?

-Эхний ээлжинд бид 250 сая доллараар Улаанбаатар төмөр замын техникийн шинэчлэл хийж байгаа. Тодруулбал, ОХУ-ын тал 125 сая доллар, Монголын тал 125. Энэ техникийн шинэчлэлийн хүрээнд өнөөдөр бид “railbus”-ыг оруулж ирж байна.

-“Railbus”-ын давуу талуудаас цухас дурдаач?
-Энэ өөрөө хэд хэдэн онцлогтой юм. Юуны өмнө, Улаанбаатар төмөр зам техникийн шинэчлэлт хийхдээ зөвхөн өөрийнхөө үйл ажиллагаанд зориулах төдийгүй Улаанбаатар хотын иргэдийн нийтийн тээврийн  үйлчилгээнд зориулж байгаагаарай онцлогтой. Өөрөөр хэлбэл, нийтийн тээврийн үйл ажиллагаанд чухал хувь нэмэр оруулж байна. Ингэснээрээ бид Нийслэлийн нэг захаас нөгөө захруу 20 минутын дотор л явчихна. Түгжрэл саадгүй, хурдан шуурхай зорчино гэх мэтчилэнгээр ниймгийн өмнөх үүрэг хариуцлагаа Улаанбаатар төмөр зам биелүүлж байна гэсэн үг.

-Мэдээж шинэ технологи нэвтэрч байна. Цаашид төлөвлөсөн зүйл их л байгаа байх?
-Цаашдаа бол шинэ технологийг үргэлжүүлээд нэмээд явах зорилготой байна. Шаардлага ч байгаа. Ер нь бол 2015 он гэхэд Улаанбаатар төмөр замын техникийн шинэчлэлийг хийх эхний үе шатын төлөвлөгөө гарсан байгаа.  Энэ хүрээнд л явагдаж байгаа.

-2015 он гэхэд та бүхэн ямар үр дүн харж байгаа вэ?
-Бид Улаанбаатар төмөр замаар тээвэрлэх ачааны хэмжээ 20-34 сая болж нэмэгдэх үр дүнг харж байгаа. Энэний шинэчлэлийн жижигхэн хэсэг өнөөдрийн нийтийн тээврийн автобус болж байгаа юм.