УИХ-ын гишүүн О.Баасанхүү Хууль зүйн сайд Х.Тэмүүжинг огцруулах өргөдлийг өргөн барьсан ч эцсийн шийдвэр гарах мөчид эргүүлэн татсан. Тэрбээр өргөдлөө татаж авсан шалтгаанаа “Хууль зүйн сайдтай холбоотой ноцтой хэргүүд олноор илэрлээ. Тиймээс дахин нягталж шалгах шаадлагатай зүйлүүд байна. Үүнийхээ дараа огцруулах асуудлыг дахин оруулж ирнэ. Энэ бол түр татаж байгаа асуудал” гэсэн билээ.

Тэгвэл түүний хэлсэн дээрх үгүүд бүгд худал аж. Энэ талаар МАХН-ын Ерөнхий нарийн бичгийн дарга Г.Шийлэгдамба ярихдаа О.Баасанхүү гишүүний шийдвэрт нам нь нөлөөлсөн гэв. 

Тодруулбал тэрбээр “О.Баасанхүү өргөдлөө татаж авсан нь намын шийдвэр гэдэг нь үнэн. Гэхдээ энэ шийдвэрийг Солонгост очиж Н.Энхбаяр даргатай уулзахаас өмнө буюу энэ сарын эхээр хуралдсан намын Гүйцэтгэх товчооны хуралын дараа гаргасан” гэжээ. Тэгэхээр намынхан нь О.Баасанхүүд нөлөөлсөн нь тодорхой болж таарлаа. Гэхдээ үүнд Н.Энхбаяр дарга нь оролцоогүй гэх баталгаагүй.

Хамгийн гол учир нь МАХН, Ерөнхий сайдтай хамтарч байгуулсан санамж бичигт байна. Уг бичигт Засгийн газар болон аль нэг сайдын ажлыг шүүмжлэх бүрэн эрхтэй. Гэхдээ огцруулах асуудлыг хөндөж болохгүй гэж тусгагасан байдаг аж. Тиймээс Засагт хамтарч ажиллаж байгаагийн хувьд огцруулах бичиг өргөн барих нь зохимжгүй гэсэн шийлвэрийг тус намаас гаргажээ.

Тэгэхээр О.Баасанхүү гишүүний хэлсэнчлэн түүнийн гаргасан шийдвэрт хэн, нэгэн хөндлөнгөөс нөлөөлөөгүй гэдэг нь худлаа боллоо. Бас "Миний ард ард түмэн байгаа. Шийдвэр ард түмний талд гарсан тохиолдолд би саналаа татна" гэх мэтээр ярьж байсан нь ч худлаа болов. Харин ч О.Баасанхүү гишүүн ард түмний төлөө гэж ярьдаг мөртлөө эцсийн шийдвэр гарах мөчид намын удирдлагуудын хэлснээр хөдөлдөг "хүүхэлдэй" болохоо дахин батлах шив.

Тэрбээр Х.Тэмүүжинг сайдыг огцруулах нэрээр УИХ-ын үйл ажиллагааг бүтэн сар уясан. Үүнд нь ч гишүүд ихээхэн бухимдаж байгаа. Гэтэл намын шийдвэрээс болж бүтэн сар тоглосон шоугаа шал сонирхолгүй төгсгөсөн байх юм. Уг нь жаахан мэдээлэлтэй байсан бол Хамтарч Засаг барьж байгаа намынхаа сайдыг огцруулах асуудлыг хөндөж болохгүй юм байна гэдгийг тэрбээр мэдэх ёстой байлаа. Бас бүтэн сар хүмүүсийн ажлыг удаж, өөрийнхөө нэр хүндийг ч унагахгүй байсан юм.