“Элсний 13”-ийн гол хүмүүсийн нэгээр нэрлэгдэж явсан Л.Одончимэд улстөрөөс хол хөндий болсоор удаж байна. Түүнийг хамгийн сүүлд эрүүл мэндийн сайд асан Н.Хүрэлбаатарын зөвлөхөөр ажиллаж байснаас хойш эрдэм номын ажил хөөцөлдөж элдэв шог, хууч тэрлэсэн шигээ хүслээрээ чөлөөтэй яваа гэдэг. Тэрээр М.Энхболдыг Ерөнхий сайд, намын даргаас нь огцруулахад “элсний 13”-т багтаж эсрэг явсан гэдгээрээ гадуурхагдаж өнөөдөр намынхаа гортигноос гадуур эргэлдэх болсон. Хэдийгээр тэрээр эрх мэдэл албан тушаалаас хол хөндий байгаа ч шооч, наргиач зантай гүндүүгүй шударга хүн гэдгээр нь МАН-ынхан ихэд хүндэтгэдэг.

Тэгвэл тэрээр дурсамжаас гадна намынхаа ирээдүйтэй холбоотой шинэ зүйлийг сэтгүүлч Ш.Гүрбазарын “Та хариулахгүй байсан ч болно”  нэвтрүүлэгт оролцохдоо хэлээд авсан нь олон хүний анхаарлыг татах болов. “МАН-ын өнөөгийн байдал ямар байгаа 2016 оны сонгуульд яах бол?” гэсэн сэтгүүлчийн асуултанд “Манай намд фракц энэ тэр гэж олон жил ярьсан. Хотын фракц байдаг, байдаггүй гэх мэт. Тэгвэл яг тэр хотын фракц чинь албан ёсоор гараад ирчихсэн. Намын бага хурал, удирдах зөвлөлийн бүтцийг хар. Нэг бол М.Энхболдын хотын фракцынхан нэг бол мөнгөтэй улсууд л сууж байгаа. Яг одоо МАН гурав хуваагдчихсан байдалтай байна. Нэг хэсэг хүмүүс нь Н.Энхбаярыг дагаад МАХН гээд салчихсан. Өөр нэг хэсэг нь М.Энхболдыг дагаж байгаа. Үлдсэн хэсэг нь дунд нь яахаа мэдэхгүй ажсан байдалтай байна гэж тодорхойлов” Мөн цаашлаад “Энэ маягаараа бол манай нам 2016 оны сонгуульд ялахгүй. Тийм учраас 2015 онд Намын Их Хурлыг хуралдуулах ёстой. Над шиг ийм эргэлзээтэй, янз янзын бодолтой олон хүмүүс байгаа. Тэдний итгэл үнэмшил сэтгэл санаа нэгдээгүй цагт нам сонгуульд амжилт үзүүлэх боломжгүй” гэсэн утгатай тайлбарыг хийлээ.

Удаа дараа сонгуульд ялагдсан МАН-ынхан шинэчлэл гэж баахан ярьсан ч 27-р Их Хурлаараа хуучин дарга М.Энхболдыг сонгосон. Тухайн үед хамгийн хөл сайтай, бүлэглэл нь инерци барагдаагүй байсан учраас л М.Энхболд намын даргаар сонгогдсон. Энэ сонголтондоо МАН-ынхан тийм ч сэтгэл хангалуун байдаггүй гэх явган яриа нэг хэсэг нэлээд явсан. Сонгуулиас сонгуулийн хооронд чансаа унасан энэ намыг М.Энхболд ялалтанд хүргэнэ гэдэгт эргэлзэх хүн олон байдаг ч намынхаа шинэчлэлийн төлөө дуу хоолойгоо дугаргаж байгаа хүн өнөөдөр алга байна. М.Энхболд намын дарга болсноор цагаан байшингаар чангаар цуурайтаж нийгэмд багагүй хүлээлт үүсгээд байсан шинэчлэл зогссон уу? Эрчимжсэн үү? Гэдэг дээр тус намынхаа дор бүрнээ бодоод эхэлжээ. МАН энэ маягаараа сонгуульд орох уу? Эсвэл наана нь Их хурлаа хуралдуулах уу? Гэдэг асуултын тэмдэг өдрөөс өдөрт тодрох бололтой. Энэ асуудлыг эхлүүлж Л.Одончимэд дугарлаа. Түүний хэлсэнчлэн эргэлзээтэй бодолтой хүмүүс маш олон бий. Энэ хаврын улстөрийг МАН-ынханы дотоод уур амьсгал ч чимэх янзтай болоод явчихлаа.

 О.Цагариг