УИХ дахь бие даагчдын бүлгээс мэдээлэл хийлээ. Өнгөрсөн долоо хоногт УИХ-аар хэлэлцэгдээд унасан "Газрын тосны тухай хууль"-ийг дэмжиж батлах ёстой байсан гэж тус бүлгээс мэдэгдлээ. Хэрвээ энэ хууль батлагдсан бол газрын тосноос хүртэх Монголын төрийн ашиг 50 хувь болох байсан гэв. Гэтэл ганц хүний саналаар энэ хуулийг унагасан буруу нь гэж бие даагчдын бүлгээс мэдэгдлээ. Тиймээс тус хуулийн ажлын хэсгийн ахлагчаар ажилласан Х.Болорчулуун хуулийн төслийг дахин өргөн барина гэв. Тэрбээр "Энэ хуулийн хамгийн гол заалт нь бүтээгдэхүүнээс олсон орлогоо Монголоор дамжуулах тухай байсан юм. Харамсалтай нь ашиг сонирхлыг зөрчлөөс болж гишүүд хуулийг баталсангүй. Тэр дундаа МАН-ынхан бүлгээрээ энэ хуулийн эсрэг санал өгсөн нь тэдний үг, үйлдэл хоёр хэрхэн зөрж буйг харуулсан хэрэг боллоо. Тэд эдийн засгаа сайжруулъя хэмээн байгаа ч,  хачир дээрээ эх орноо гэсэн бодол тэдэнд алга. С.Одонтуяа гишүүн ч мөн адил нөхөр нь Газрын тосны газрын дарга болохоор хуулийн төслийн эсрэг санал өгч байсан. Энэ бүхэн тус хуулийн цаана ямар их ашиг сонирхлын зөрчил байгааг илтгэж байна" гэв.

Энэ хууль батлагдаагүй нь УИХ-ын гишүүн С.Одонтуяагийн нөхөр Газрын тосны газрын дарга Г.Өлзийбүрэнгийн эрх мэдэлд хэрхэн нөлөөлөх байсан талаар тодруулахад " Газрын тосны газрын дарга Г.Өлзийбүрэнгийн эрх мэдэл тодорхой хэмжээгээр хумигдах байсан. Г.Өлзийбүрэн 2013 онд 370 сая төгрөгний хөрөнгө оруулалтын гэрээ зэрэгт гарын үсэг зурсан байдаг. Харин хууль батлагдсанаар энэ эрх нь хаагдаж, Г.Өлзийбүрэнээс гадна аудит зэрэг хяналтын байгууллагууд гэрээ, хэлцэл, хөрөнгө оруулалтыг давхар баталгаажуулдаг болох байсан" гэсэн юм.

Бие даагч гишүүдийн хүргэсэн дараагийн мэдээлэл нь "Монгол банк"-ны Ерөнхийлөгчтэй холбоотой мэдээлэл байв. Өөрөөр хэлбэл тэд энэ долоо хоногт "Монгол банк"-ны Ерөнхийлөгч Н.Золжаргалыг огцруулах асуудлыг УИХ-ын даргад өргөн барихаар болжээ. Гэхдээ хуулийн хүрээнд "Монгол банк"-ны Ерөнхийлөгчийг огцруулах асуудал гэж хэлдэггүй бөгөөд асуудлыг нь авч хэлэлцэнэ гэдэг аж. Энэ тухай УИХ-ын гишүүн С.Ганбаатар "Эдийн засгийн хүндэрсэн байдал, валютын нөөц, ханш зэрэг одоо үүсээд буй асуудал бол Монголбанкны ажлаа хийж чадахгүй байгаагийн нотолгоо. Тиймээс УИХ өөрөө бүрэн эрхийнхээ хүрээнд томилсон Монголбанкны удирдлагуудыг дахин авч хэлэлцэх хэрэгтэй" гэв.

Харин УИХ-ын гишүүн Ц.Даваасүрэн ирэх долоо хоногт царцаасан барилгуудтай холбоотой төсвийн тодотголыг хийнэ хэмээн онцлоод Өрийн удирдлагын тухай хуультай холбогдуулан Монгол Улс Зээлийн баталгааны сангаас гадна Зээлийн эрсдэлийн сантай болох ёстой гэлээ. Ингэх нь аливаа эрсдэлээс хамгаална гэсэн юм.