АТГ-ыг тойрсон шүүмжлэл газар авлаа. Хамгийн сүүлийн мэдээллээр л гэхэд Тэргүүн шадар сайд Д.Тэрбишдагва тус байгууллагыг муу, муухайгаар нь дуудаж шүүмжлэв.

Өмнө нь Ерөнхий сайд Н.Алтанхуяг “АТГ ажил хийлгэхгүй юм” хэмээн хэвлэлээр ярьж дуулиан тарьсан. Мөн УИХ-ын гишүүн С.Дэмбэрэл чуулганы хуралдаан дээр “АТГ өндөр боловсролтой 100 бизнесмэнийг шоронд хорьсон. Тэдний нэг нь л зуу, цаашлаад мянган хүнийг ч ажлын байртай болгох чадалтай гэдгийг бодооч. Тэр бизнесмэнүүд чинь  бүгд валют үйлдвэрлэдэг хүмүүс” гэсэн билээ. Насаараа өмгөөлөгч хийсэн Ц.Монгол гэх эр мөн л АТГ-ын талаарх таагүй мэдээллийг олон нийтэд дэлгэсэн байх юм. Тэрбээр “Монголын бүх хууль, хяналтын байгууллагууд АТГ-ын тэргүүн комиссорын хяналтанд орсон” гэжээ.
 
     АТГ руу чиглэсэн манай улс төрчид болоод жирийн иргэдийн шүүмжлэлийг зах зухаас нь хүргэхэд ийм байна. Гэхдээ тус байгууллагыг хатуу шүүмжлэх хүмүүсийн тоо цаашид ч нэмэгдэх хандлагатай байгаа билээ. Гэтэл гадны томоохон нэр хүндтэй хэвлэл болох Блүүрберг агентлаг саяханы нэг өдөр “Монголын авлигатай тэмцэх газрын үйл ажиллагааг шоронтой зүйрлэж, Монголыг шорон шиг улс” гэж онцолсон нь энэ хаврын улс төр дэхь ээдрээг арай өөр тийш хандуулж интернэт сэтгэгдлийн улсын шигшээ багийг хүртэл хоёр хуваагдуулж орхисон. Монголыг “муухай” харагдуулсан тус мэдээлэлд манайхан дор бүрнээ ичиж, нүүр хийх газаргүй болсон гэж хэлж болно.

    Энэ мэт таагүй мэдээлэл намжаагүй байтал хэрэгт сэжиглэгдэж АТГ-т шалгагдаж байсан Газрын тосны газрын дарга асан Д.Амарсайхан урьдчилан хорих төвд хоригдож байгаад эмнэлэгийн тусламж авч чадалгүй нас барсан нь уг асуудлыг улам хурцатгаж орхилоо. Энэ нь АТГ нь хүмүүсийг дарамталдаг, айлгадаг байгууллага гэж хэлүүлэхээс гадна хүний эрхийг ноцтойгоор зөрчдөг газар гэж нэрлэхэд хүргэсэн юм. Д.Амарсайхан агсны хэрэг улс төрчид хийгээд хүний эрхийн байгууллагууд, энгийн иргэдийг үнэхээр цочроосон. Гэм буруутай нь тогтоогдоогүй байхад АТГ-аас хорьж цагдсан нь буруу гэж хэлэх хүмүүс одоо ч байна. Мөн эмчлүүлэх хүсэлт тавьж байхад нь эмнэлэгт хэвтүүлээгүй нь Монголын төр иргэндээ хүнд суртал гаргасаны илрэл юм.

    Хуулиараа бол хүний гэм буруутайг шүүхээр тогтоогоогүй байхад хэнийг ч хорьж, цагдах эрх байдаггүй аж. Энэ бүгдээс харахад “Блүүмберг”-т бичсэнчлэн АТГ үнэхээр буруу системээр ажиллаад байгаа юм биш биз.

   Дээрх бүх мэдээллээс илүүтэйгээр олны анхаарлыг татаж буй нэгэн зүйл нь Шадар сайд Д.Тэрбишдагдын мэдэгдэл болж байна. Тэрбээр маш ноцтой мэдэгдэл хийсэн бөгөөд “АТГ гаднынхны шахалтаар байгуулагдсан. АТГ-ыг байгуулагдах үед энэ газрыг өөрөө авлигалын газар болчих вий гэж Засгийн газрын хурал дээр сануулж байсан хоёр сайдын нэг нь би. Нөгөөх нь У.Хүрэлсүх. Хүн буруу юм хийсэн байж болно. Түүнийг шүүгээд, учруулсан хохирлыг нь барагдуулахад болно шүү дээ. Миний хувьд авлига хээл хахуультай хийх тэмцлийг үгүйсгээд байгаа юм биш. Авлига авч болохгүй шүү гэж сануулж зөвлөж, соён гэгээрүүлж, сургалт явуулж, урьдчилан сэргийлж байх ёстой атал АТГ шулуухан хэлэхэд цагдаагийн үүргийг гүйцэтгэдэг, дарамталдаг, айлгадаг байгууллага болчихлоо. Бас үйл ажиллагаа нь нэг тал руу гаа хэт хэлбийгээд байгаа. Үнэндээ цөөхөн монголчууд ингэж бие, биеэ үзэн ядаж, хийж бүтээе гэсэн нэгнээ юм л бол авлигач гээд барьж, хориод, буруутгаад, эцэст нь үхэлд хүргээд байж болохгүй ээ” гэж ярьжээ.

    Энэ бол энгийн иргэний яриа биш. Засгийн газарт хамтарч байгаа намын лидерийн хэлсэн үг. Тэр ч утгаараа түүний үгийг анхаарахгүй өнгөрч болсонгүй. Манай улсын АТГ-ыг гадна, дотныхон ийнхүү дүгнэж байна. Тийм ч учраас Монгол улсын АТГ-ын үйл ажиллагааг зөв гэж тодорхойлоход бэрх болжээ. Мөн АТГ үнэхээр хараат бус байж чадаж байна уу гэдэгт эргэлзэж байна. Ямартай ч энэ бүгдэд хүн бүр дүгнэлт хийх цаг болсон байна.

    Ер нь АТГ-ын явуулж буй бодлогыг буруу жишиг гэж хэлэх хүмүүс ч олон байна.Учир нь дэлхийн ихэнхи оронд ямар ч төрлийн гэмт хэргийг цагдаагийн газар нь шалгадаг аж. Тэгэхээр АТГ-ын үйл ажиллагааг цагда хийдэг ганц жишиг дэлхийд байдаг гэсэн үг. Харин Сингапур, Малайз зэрэг хагас ардчилалтай оронд АТГ шиг хуулийн байгууллагууд байдаг аж. Гэтэл манай улс маш том бүтэцтэй хуулийн эрх бүхий байгууллага байгуулчихаад түүнийгээ хэт их эрх мэдэлтэйгээр ажиллуулаад явж байгаа нь хэр оновчтой вэ. Тэгээд тэр байгууллага нь юм л бол айлган сүрдүүлсэн,  дарж, дарамталсан, барьж хорьсон, эвдэж сүйтгэсэн, булааж, хураасан ажлыг л хийх юм.