Сүүлийн үед хэвлэл мэдээллийн хэрэгслээр МАХН, АН-тай нууц гэрээ байгуулсан гэх мэдээлэл гарах болсон. Энэ талаар МАХН-ын Ерөнхий нарийн бичгийн дарга Г.Шийлэгдамбаас тодрууллаа.

-АН, МАХН-тай хаалтын гэрээ, нууц гэрээ байгуулсан гэж хэлж, бичих болов. Үнэхээр тийм гэрээ байгаа юм уу?

-МАХН-ын зүгээс Ардчилсан намтай албан ёсоор тусад нь үзэглэсэн гэрээ одоогийн байдлаар байхгүй байна. Харин эвслийн Засгийн газрын үед өмнө нь намуудын хооронд байгуулсан гэрээ бол бий. Тэр гэрээ өнөөдөр хүчин төгөлдөр мөрдөгдөж байгаа.

-Тэгвэл нууц гэрээ гэж ямар учиртай зүйл гараад ирэв. Энд та тайлбар өгөөч?

-Энэ сарын 3-ны өдөр Ардчилсан нам, МАХН-ын хооронд тодорхой заалтуудыг тусгасан санамж бичгийг байгуулсан. Энэ санамж бичгийн талаар нууцлаад байх шаардлага байхгүй. Харин үүнийг зарим нэг улстөрч, улс төрийн хүчин ил, далд нууц гэрээ мэтээр нийгэмд ойлгогдохоор хэлж, ярьж байна. Тийм ч учраас энэ санамж бичгийг олон нийтэд ил гаргаж тавих нь зүйтэй гэж үзэж байгаа. 

-Нэгэнт ил болгох гэж байгаа бол санамж бичгийнхээ доторх агуулгыг шулуухан хэлж болох уу?

-Болно. Ерөөсөө л эвслийн Засгийн газарт ажиллаж байгаа улс төрийн намууд улс төрийн албан тушаалтныхаа хариуцлагын асуудлыг нам дотроо ярьдаг байх, ажиллаж байгаа сайдуудынхаа асуудлыг улс төрийн намууд дотооддоо ярьж шийдвэрлэх нь зүйтэй гэсэн зарчмыг энэ санамж бичигт тусгасан юм. Хэдийгээр МАХН Ардчилсан намтай хамтран эвслийн Засгийн газрыг байгуулан ажиллаж байгаа боловч тус, тусын үйл ажиллагаа явуулж буй улс төрийн хүчнүүд. Тиймээс намууд аль нэг сайдынхаа талаар ажил хэрэгч шүүмжлэл гаргаж, хариуцлагаа өндөрсгөж байх нь ард түмний эрх ашигт нийцнэ. Хамтын ажиллагааны санамж бичгийн агуулга ийм юм. Энэ бол улс төрийн том соёл, хариуцлагын асуудал гэж үзэх хэрэгтэй.