Өчигдөр болсон АН-ын бүлгийн хуралд Нийслэлийн удирдлагууд өөрсдийн саналаар оролцож, мэдээлэл хийсэн байна. Тэд 2014 онд нийслэлд хийгдэх ажлуудын талаар дэлгэрэнгүй мэдээллийг АН-ын бүлгийн гишүүдэд өгчээ.
АН-ын бүлгээс нийслэл хотод хийгдэж буй ажлуудыг эрчимтэй явагдаж байгааг сайшаагаад цаашид хийж гүйцэтгэх ажлуудад нь чиглэл өгсөн гэж тус бүлгийн дарга Д.Эрдэнэбат хэллээ. 

Үүнд:

1.    Нийслэл хотод бизнесийн таатай орчныг бий болгох.
2.    Төрийн дарамт, шахалтыг багасгах.
3.    Гэр хорооллын дахин төлөвлөлтийн ажлыг эрчимжүүлэх зэрэг багтсан байна.

Мөн “Гудамж” төслийн ажлыг үргэлжлүүлэн хийх ёстой гэж үзээд шаардагдах хөрөнгө, мөнгийг нь Эдийн засгийн хөгжлийн яамнаас гаргаж өгөхийг Н.Батбаяр сайдад даалгажээ. “Гудамж” төслийн хөрөнгийг хөдөө орон нутаг руу татсан гэж Нийслэлийн засаг дарга Э.Бат-Үүл Эдийн засгийн хөгжлийн сайд Н.Батбаяртай муудалцсан талаарх мэдээлэл байсан. Тэгвэл АН-ын бүлгээс “Гудамж” төслийн хүрээнд хийгдэх ажлууд нь хот, хөдөөд хоёуланд нь хийгдэх ёстой. Гэхдээ нийслэлд хийгдэх ажлуудыг яаравчлах нь зүйтэй. Тодруулбал Туул голын зам дагуух хурдны зам зэрэг ажлыг даруй эхлүүлэх ёстой гэж үзэж байгаа аж. Тиймээс шаардагдах хөрөнгө мөнгийг Эдийн засгийн хөгжлийн яамнаас гаргаж өгөхийг үүрэгджээ. Мөн Нийслэлийн удирдлагуудыг Засгийн газартай нягт хамтарч ажиллах ёстой гэсэн байна.