УИХ дахь АН-ын бүлгийн дарга Д.Эрдэнэбат өнөөдөр мэдээлэл хийлээ. Түүнээс зарим зүйлийг тодрууллаа.

-Ашигт малтмалын хуулийн өөрчлөлт дээр долоон орд газрын асуудал яригдаж байгаа юм байна. Энэ талаар тодруулахгүй юу?

-Ашигт малтмалын тухай хуульд хамгийн гол хадаас заалт нь геологи хайгуулын зөвшөөрлийг олгох тухай заалт байгаа. Энэ заалт батлагдсанаараа 1000 гаруй лицензийн асуудал яригдана.

-100 гаруй аж ахуйн нэгжийн зөвшөөрлийг сэргээх асуудал бас яригдаж байна. Үүнээс болоод тухай үед Ашигт малтмалын газрын даргаар ажиллаж байсан Н.Батхуяг ял эдэлж байна. Хэрвээ тэд аж ахуйн нэгжүүд буруугүй бол ял аваад явсан хүний асуудал яригдах уу?

-146 гэдэг тоо байдаг. Тухай үедээ Засгийн газар цуцалсан. Цуцалсан хууль гарсны дараа лицензүүд олгогдож эхэлснээс үүдэн ийм байдал үүссэн болов уу. Өөрөөр хэлбэл энэ нь хууль зөрчсөн үйлдэл. Нарийн ширийнийг тайлбарлах эрх байхгүй. Бид Ашигт малтмалынхаа хуулийг хурдан баталж гаргах ёстой. Энийг баталснаар гадаадын шууд хөрөнгө оруулалт нэмэгдэнэ. Монгол Улсад нэг тэрбум доллар орж ирнэ.

-ҮХААЯ-ны дараагийн сайдын асуудал бүлгийн хуралдаанд яригдсан уу?

-Ерөнхий сайд ямар нэгэн хүний нэр дэвшүүлж оруулж ирээгүй байна. Манай намын журмаар Гүйцэтгэх зөвлөлөөр нэр дэвшүүлдэг. Тэрний дагуу бүлгээр оруулж дэмжигддэг. Өнөөдөр ямар хууль үйлчилж байна, хуулийнхаа хүрээнд сайдын асуудал шийдэгдэнэ.

-Монголбанкны Ерөнхийлөгчид хариуцлага тооцох ёстой гэсэн байр суурийг Бие даагч гишүүд илэрхийлсэн. Эрх баригчдын зүгээс ямар байр суурьтай байгаа бол?

-Хариуцлага гэдэг нэрийн дор огцруулах гэдэг үг моодонд орж байна. Одоо бид ажил хийх хугацаа болохоос биш “популизм”-дах хугацаа биш. Бид шинэчлэлээ хийж дуусгах, эдийн засгаа сэргээх тал дээр хэн, хэнийгээ шахаж ажиллуулах хугацаа болохоос биш хэн нэгнийг авч хаях хугацаа биш. Монголбанкыг сонсоод юун дээр алдаж, юун дээр анхаарах вэ гэдгийг хэлж өглөө. Өнөөдрийн эдийн засгийн бодит байдлыг илтгэж байгаа нүүр царай болохоос биш, Монголбанк хэдэн боодол доллар дарчихаад Монгол орныг алаад байна гэж бодохгүй байна. Бие даагчид санал гаргасан байна лээ. Хүндэтгэлтэйгээр энэ саналд хандана. Энэ улс орон эдийн засгийн хүндрэлтэй үед оччихсон байна. Одоо хэн ажил хийх вэ гэдгээ л бодох хэрэгтэй. Ажил хийхэд садаа болох үйлдлүүдийг аль ч улс төрийн хүчин, гишүүд битгий гаргаасай гэж хүсч байна. Монголбанкинд хариуцлага тооцох асуудал хэзээ ч оройтохгүй. Харин Монголын эдийн засгийг эрүүлжүүлэх тухай оройтчих гээд байна.

-Ухаалаг хэрэглээг урамшуулна гэж байна. Ямар хэрэглээг ухаалаг гэж тодорхойлох вэ?

-Засгийн газар ухаалаг хэрэглээ гэдгийг юу гэж үзсэн гэхээр өнөөдөр үндэснийхээ үйлдвэрлэлийн бүтээгдэхүүнийг худалдаж авах хэрэглээ рүү оръё. Энэ бидний хамгийн эхний ухаалаг хэрэглээ байгаасай гэсэн энэ саналыг гаргасан. Би үүнийг буруу гэж бодохгүй байна.

-Өрийн удирдлагын тухай хуулийн асуудлаар танай бүлэг байр сууриа нэгтгэсэн үү?

-Өрийн удирдлагын тухай хуулийг хэлэлцэх эсэхийг энэ 7 хоногт шийднэ. Бүх намууд ижил байр суурьтай байгаа байх. Өр гэдэг үгийг буруу оруулж ирсэн. Уг нь Зээлийн эрсдлийг зохицуулах тухай хууль байгаа юм. Нэрнээсээ эхлээд улс төрийн буруу өнцгөөр яваад байна уу гэж анзаарч байна. Хэлэлцэх эсэхийг дэмжээд явна. Хэлэлцүүлгийн явцад энэ нь өөрөө Төсвийн тогтвортой байдлын тухай хуультай уялдаж гарч ирнэ. 40 хувь, 70 хувь гэсэн өрийн таацын зөрчил байгаа. Үүнийгээ хэлэлцээд шийдэх байх.

-Хяналтын тухай хуулийг хэлэлцэх үед намын эрх ашиг нөлөөлсөн гэж байна. Нөгөө талаасаа танай намынхан олуулаа байж чадсангүй. Бүлгийн гишүүд энэ хуулийг хэлэлцэх үед хариуцлаггүй хандсан юм биш үү?

-Бид өөрсдийнхөө алдаа дутагдлыг хүлээнэ. Хамгийн ноцтой зүйл нь МАН-ын бүх гишүүд эсрэг санал өгсөндөө байгаа юм. Нийгэмд хэрэгтэй хуулийг зохион байгуулалттайгаа унагасан. Энэ нь ард түмэн, улс орноо гэж бодоогүй зөвхөн өөрсдийнхөө явцуу эрх ашгийг бодсон хэрэг.