Эдийн засгийг эрчимжүүлэх 100 хоногт долларын ханшийг хүчээр бууруулахыг АН-ынхан “Монгол банк”-нд үүрэг болгосон гэж эх сурвалжууд мэдээллээ. Тодруулбал уржигдар болсон тус бүлгийн хуралд “Монгол банк”-ны ерөнхийлөгч Н.Золжаргал оролцож, мэдээлэл өгсөн байна. Энэ үеэр АН-ын бүлгээс долларын ханшийг бууруулахад онцгой анхаарах үүргийг “Монгол банк”-ны тэргүүнд өгчээ.Эдийн засгийг эрчимжүүлэх Засгийн газрын тоолуур явж эхлээд ес хонож байна. Харин үлдсэн 91 өдөрт “Монгол банк”-ны хийх ёстой хамгийн чухал ажил бол долларын ханшийг буулгах юм. Харин “Монгол банк” валютын ханшийг яаж тогтвортой барих бол. Энэ талаар тэдний баримтлах бодлого, хийх ажил хүмүүсийн сонирхлыг хамгийн ихээр татаж байна.
Тэгвэл “Монгол банк” валютын ханшийг хүчээр тогтоодог “галзуу” ганц аргаа хэрэглэх гэж буй талаар зарим эх сурвалж мэдээлллээ. Энэ нь их хэмжээний долларыг валютын нөөцөөсөө гаргаж зарна гэсэн үг юм. Хэдийгээр тус мэдээллийг АН-ынхан эрс үгүйсгэж байгаа ч үүнээс өөр арга “Монгол банк”-нд үлдээгүй аж.
Төв банкнаас их хэмжээний валютыг гаргаж арилжааны банкуудад зарвал түр зуурхандаа валютын ханш тогтворжино. Гэхдээ эсрэгээрээ нөөц нь дундраад буй валютын нөөцөө “гөвөх” эрсдэлтэй тулгарах юм.
Өнөөдөр л гэхэд доллар 1820 төгрөгийн ханштай байна. Доллар ийнхүү тасралтгүй өсч буй учир “Монгол банк” өөрсдийн нөөцөөс тодортой хэмжээний валютыг нийлүүлсээр байгаа. Харин үүний үр уршигаар оны төгсгөлд 2.7 тэрбум доллартай байсан валютын нөөц өнөөдөр 2.3 тэрбум болтлоо багасчээ. 2.3 тэрбум доллар гэдэг бол Монгол улсын импортын ердөө 18 хоногийн нөөц. Гэтэл эрх баригчид ийм бага валютын нөөцийг дуусгах оролдлогыг энэ 100 хоногт хийх нь. Нөгөө талаар нөөц багасах тусам ханш өснө гэдгийг хэн хүнгүй мэдэж байгаа.
Өмнө нь Эдийн засгийн хөгжлийн сайд Н.Батбаяр болон Сангийн сайд Ч.Улаан нарыг огцруулах асуудлыг хэлэлцэх үеэр АН-ынхан долларын ханшийг хүчээр буулгаж байсан удаатай. Засгийн газар хоёр сайдаа авч үлдэхийн тулд дээрх аргыг хэрэглэсэн гэж сөрөг хүчин болох МАН-ын бүлгийн дарга С.Бямбацогт хэлж байсан.
Н.Батбаяр болон Ч.Улаан сайдыг огцруулах асуудлыг УИХ-д оруулж ирэхэд 1700 төгрөг байсан долларын ханш 1600 төгрөгт хүртлээ буурч байсныг уншигчид та бүхэн санаж байгаа байх. Гэтэл асуудал намжсаны дараа долларын ханш огцом өсч өнөөдөр 1800 даваад байна. Энэ нь хоёр сайдыгаа авч үлдэхийн тулд их хэмжээний долларыг гаргаж зарж нөөцөө хомсдуулсанаас болсон гэж зарим эдийн засагчид тайлбарладаг. Тэгвэл хоёр сайдын асуудлыг хэлэлцэж байх үеэр гаргасан аргаа хэрэглэж долларын ханшийг хүчээр барих гэж байгаа нь эдийн засгийг бүр ч сульдаах аюултай аж. Үүнийг ч эдийн засагчид өнөөдөр анхааруулж байна.
Т.Энхэлээ
Сэтгэгдэл (27)