Өчигдөр АН-ын бүлгийн дарга Д.Эрдэнбат бүлгийн хурлаараа хэлэлцсэн асуудлаар сэтгүүлчдэд мэдээлэл өгөхдөө нэгэн хачирхалтай зүйлийг хэлсэн нь ордноор явган яриа болж байна. Тодруулбал тэрээр "МАН-ын бүлэг зориудаар ирцээ бүрдүүлж байгаад эсрэг санал өгч ажилд саад болж байгаад харамсч байна" гэж хэлжээ. Түүнийхээр бол МАН-ынхан хуралдаа идэвхтэй сууж ирцээ бүрдүүлж байгаа нь буруу юм байна. АН-ын бүлэг бодлого шийдвэрийг УИХ-аас буцаагаад байгаагийн буруу хуралдаа ирдэггүй давхар дээлтэй өөрийнх нь намын гишүүдэд биш хуралд өндөр ирцтэй ороод байгаа сөрөг хүчнийхнээс болж байгаа гэсэн ойлголтыг тэр хэлж байна. Ийм хачин тайлбарыг сонссон хүмүүс олонхи бодлогоо хамгаалж чаддаггүй, нэгдмэл биш байгаа нь бүлгийн даргын арчаагүй байдалтай холбоотой гэж ярих болов. Гишүүдээ зангидаж чаддаггүй чухал шийдвэрээ сөрөг хүчнийхээ өмнө хамгаалж чадахгүй бүлгийн ажил нь нэг иймэрхүү байгаад өөрсдөө дүгнэлт хийж Д.Эрдэнэбатдаа хариуцлагаа дотооддоо ярихаас биш ирцээ бүрдүүлж байгаа сөрөг хүчний гишүүдийг хуралдаа бөөнөөрөө ирлээ гэж зандрах нь эрүүл сэтгэхүйгээс гарах хандлага лав биш гэж тайлбарлах хүмүүс олон байна.