Өнгөрөгч баасан гарагт МАН-ын дарга М.Энхболд, тус намын УИХ-дахь бүлгийн дарга С.Бямбацогт нар Монгол Улсын Ерөнхий сайдын өрөөнд урилгагүй зочилж "10 өдрийн дотор алдаа гаргасан албан тушаалтнуудтай хариуцлага тооцохыг шаардсан" бичгийг гардуулж өгсөн. Долоо хоног бүрийн даваа гарагт хуралддаг МАН-ын бүлэг баасан гарагт хуралдаж улстөрд хурцадмал асуудал үүсээгүй байхад яагаад гэнэт ийнхүү шаардах бичиг барих болов гэдэг нь олон хүнд сонирхолтой санагдсан биз ээ. Ерөнхий сайд ч МАН-ынханы шаардах бичгийг судалж хариу өгөхөө мэдэгдсэн. Үүний араас МАН-ын дарга М.Энхболд 2-р суваг телевизийн цензургүй яриа нэвтрүүлэгт оролцохдоо арван өдрийн дотор тодорхой арга хэмжээ авахгүй бол Засгийн газрыг огцруулах асуудлыг УИХ-д өргөн мэдүүлнэ гэдгээ хоёрдмол утгагүй илэрхийлсэн билээ.  Сөрөг хүчний шахааг эрх баригчид энэ удаад тоохгүй өнгөрч болохгүй болжээ. Учир нь давхар дээл, Х.Тэмүүжинг огцруулах асуудлаар нэлээд бужигнаад намжсан Засгийн газрыг бүхэлд нь огцруулах асуудал ороод ирвэл улс төрд таамаглаж мэдэхгүй олон эрсдэл үүсэх нөхцөл бий болчихоод байна.

Сүүлийн үед эрх баригчид ба Ерөнхийлөгчийн зүгээс УИХ-д өргөн мэдүүлсэн хэд хэдэн хуулийн төслүүд буцах болсон. АН-ын бүлэг фракцуудын зөрчил нууц биш болж МоАХ-ныг тэргүүлж буй Х.Баттулга сайдын албан тушаалаасаа татгалзсан.Гэтэл С.Баярцогт МАН-ыг засгийн газарт урих хэрэгтэй гэсэн саналыг хэлсэн бол хамтран эрх барьж буй МАХН-аас хууль зүйн сайд Х.Тэмүүжинг огцруулах саналыг өргөн барьж нэлээд сандаргаад авсан. Энэ бүхнээс харахад эрх баригчид ямарваа асуудлаар нэгдмэл байдалд хүрэхэд өдрөөс өдөрт төвөгтэй болсоор байна. Харин энэ орон зайд нь МАН-ынхан тоглолт хийж улам нягтарсаар байгаа нь тэдэнд шүдний өвчин болоод байгаа. Байдлыг хяналтанд аваагүй байхад Засгийн газрыг огцруулах асуудал ороод ирвэл улам хүндэрнэ. Тиймээс л тодорхой хүмүүстэй хариуцлага тооцох асуудлаас энэ удаад тойрч гарах аргагүй болж байгааг эх сурвалжууд онцлох боллоо.

Зарим сайд нарт хариуцлага тооцох асуудал нь шинээр яригдаж буй сэдэв биш. Энэ удаагийн хаврын чуулган нээхтэй зэрэгцэн Эдийн засгийн хөгжлийн сайд Н.Батбаяр, Сангийн сайд Ч.Улаан, Уул уурхайн сайд Д.Ганхуяг нарыг огцруулах явган яриа тарж эхэлсэн ч давхар дээл, Х.Тэмүүжин, Х.Баттулгад дарагдаад нам гүм болчихсон. Гэтэл Монгол Улсын Ерөнхийлөгч Ц.Элбэгдорж хэд хэдэн сайдыг ажлаа өг гэж хэлснээ телевизээр зарласан. Тэр дундаа эдийн засгийн хөгжлийн сайдыг огцруулах ёстой гэдгээ маш тодорхой хэлээд авсан. Төд удалгүй Үндэсний аюулгүй байдлын зөвлөмж ч гарч хариуцлага алдсан албан тушаалтанд хариуцлага тооцохыг Засгийн газраас шаардсан билээ. УИХ-ын дарга З.Энхболд  Х.Тэмүүжинг хууль зүйн сайдаас огцруулах саналыг ил цагаанаар дэмжих болсноор Засгийн газрын аль нэг сайдад хариуцлага тооцохгүйгээр цаашаа явахгүй болсныг тэд албан бусаар анхааруулж зарласан.

Нөхцөл байдал Засгийн газрыг гарцгүй болгож Н.Алтанхуягийн танхим цаашид оршин тогтохын тулд хэд хэдэн сэлгээний тамирчдыг талбайд гаргах хэрэгтэй боллоо.

Эх сурвалжуудын хэлж буйгаар Засгийн газар эдийн засгийн хөгжлийн сайд Н.Батбаяр, Сангийн сайд Ч.Улаан нарт хариуцлага тооцож огцруулах нь тодорхой болсон гэнэ. Үүн дээр сайн дураараа ажлаа хүлээлгэн өгсөн Х.Баттулгын орон гарч АН хамтран засаг барьж буй МАХН-тай зөвшилцөж эхэлсэн гэсэн явган яриа саарал ордноор түгэх боллоо. ҮХХАА-н сайдад Ерөнхийлөгчийн зөвлөх Л.Пүрэвсүрэн УИХ-ын гишүүн Г.Баярсайханы нэр яригдаж байгаа бол Сангийн сайдад С.Одонтуяа, С.Баярцогт нарын нэр дуулдах болов. Угтаа сангийн яамыг МАХН-д хуваарилсан тохироотой. Хэрвээ энэ тохироо эвдэгдэхэд хүрвэл МАХН-ынхан зүгээр суухгүй нь мэдээж. Тийм учраас эдийн засгийн хөгжлийн дэд сайд О.Чулуунбатыг Н.Батбаярын оронд томилж товчхондоо хоёр нам сангийн яам, эдийн засгийн яамаа солих наймаалцал явагдаж эхэлсэн гэх бор шувуу ч нисэх болов.

Ямартай ч сэлгээ хийхгүйгээр цаашаа явахгүй нь тодорхой болсон Н.Алтанхуягийн багт хэнийг оруулах вэ? гэсэн марафон АН-ынханы дунд эрчимтэй явагдаж эхэлжээ. АН-ынхан бүлгийн хурлаа хүртэл хоёр тусдаа салж “Алтангадас”-ынхан төрийн ордон бусад нь “Маршалтаун”-д хуралдах болсон зэргээс харвал шинэ албан тушаалын тохироо наймаа бүлэг фракцуудыг багагүй зодоонд хөтлөх болсныг харуулж байгаа юм. Ойрын өдрүүдэд Ерөнхий сайд Н.Алтанхуяг ОХУ-ын Санктпетербуг хотноо болох бизнесийн форумд оролцоно. Уг форумд МАН-ын дарга М.Энхболд ч мөн оролцохоор болсон билээ. Улстөрийн нөхцөл байдал тааж мэдэхэд тун ээдрээтэй болсоор байгаа энэ үеэр тэднийг уулзан учраа олж хойд зүгээс МАНАН татуулахыг ч үгүйсгэх арга юм.

О.Цагариг