УИХ дахь АН-ын бүлгийн өчигдрийн хуралдаанаар нийт гурван асуудлыг хэлэлцсэн байна. Хурлаас гарсан шийдвэрийн талаар тус бүлгийн дэд дарга С.Одонтуяа өнөөдөр сэтгүүлчдэд мэдээлэл хийлээ.

АН-ын бүлгийн хуралд Ерөнхий сайд оролцож, ОХУ-д айлчилсан айлчлалынхаа үр дүнгийн талаар мэдээлэл хийсэн байна. Ерөнхий сайд Н.Алтанхуяг ОХУ-д айлчлахдаа тус улсын Ерөнхийлөгч В.Путин болон Төмөр замын дарга, Роснефтийн захиралтай уулзаж хоёр орны хамтын ажиллагааны талаар болон төмөр замын ачаа эргэлтийг сайжруулах, үр ашгийг нь нэмэгдүүлэх талаар санал солилцжээ. Мөн ОХУ-аас БНХАУ-руу татах хийн хоолойг Монголын нутгаар дамжуулах саналыг тавьсан байна. Энэ саналыг Засгийн газраас дэмжиж, шаардлагатай бүхий л зүйлд нь тусална гэдгээ Ерөнхий сайд илэрхийлжээ. Мөн Роснефть компанитай манай шатахуун импортлогч компаниудын төлөөлөл чухал хэлэлцээр хийсэн байна. Энэ нь Сингапурын биржийн үнэнд тулгуурлан урт, удаан хугацаанд үнэ тохирч импортын шатахуун авах хэлэлцээр аж. Тус хэлцэл хийгдсэнээр жил бүр 100 гаруй сая долларын эдийн засгийн хэмнэлтийг хийх юм байна. Ерөнхий сайдын ОХУ-д хийсэн айлчлалыг АН-ын бүлэг амжилттай болсон гэж дүгнэж байгаа гэж бүлгийн дэд дарга С.Одонтуяа хэллээ.

Бүлгийн хурлаар хэлэлцсэн дараагийн асуудал нь Эдийн засгийг идэвхжүүлэх зарим арга хэмжээний  тогтоолын төслийн хэрэгжилт аж. Импортыг орлож, экспортыг нэмэгдүүлэх чиглэлээр Хөгжлийн банкин дээр ирээд буй хоёр  тэрбум гаруй төгрөгийн 888 төсөл хөтөлбөрт Чингис бондоос 100 сая долларын санхүүжилт хийхээр болж, мөнгийг нь жижиг, дунд үйлдвэрийг дэмжих сан руу шилжүүлжээ. Мөн цементийн хэрэгцээгээ дотоодоос хангах арга хэмжээний хүрээнд “МАК”, “Монполимент”, Баян-Өлгий аймагт баригдаж байгаа хамтарсан үйлдвэрт хөнгөлттэй үнээр зээл олгохоор болжээ.

Мөн НӨАТ-аас чөлөөлөх тухай хуулийг хэлэлцээд босгыг нь 50 сая байлгах уу, байлгахгүй юу гэдгийг хэлэлцэх явцдаа тодорхой болгосон дээр гэдэгт саналаа нэгтгэжээ. Тендерийн тухай хуулийг ч мөн дэмжжээ. Хэрвээ энэ хуульд өөрчлөлт орвол тендерт ялсан компанийг 20 хоногт шалгаруулдаг болох юм байна. Мөн хамгийн бага мөнгөөр ажил гүйцэтгэх компанид эрхийг өгдөг бус тендер зарлаж буй газраас үнээ зарлаад ажлаа хийлгэдэг систем рүү шилжих юм байна.