Уул уурхайн сайд Д.Ганхуягийг “Financial Times” сонин “Dickhead” гэж бичсэн тухай хэвлэлээр багагүй шуугисан. Харин сайд маань үүнийг эрс үгүйсгэж албан ёсоор тус сонинд ярилцлага өгөөгүй, блог дээрхи хувь хүний сэтгэгдлийг манай хэвлэл мэдээллүүд хуулаад биччихсэн үүнийхээ төлөө залруулга гаргасан мэтээр тайлбарласан. Залруулга гэж ойлгоод байгаа зүйл нь уул уурхайн яамнаас гаргасан мэдэгдлийг хэвлэлийнхэн мэдээллийн тэнцвэрт байдлыг хангах үүднээс нийтлэж өгснийг хэлээд байгаа юм. Гадны хэвлэлээр уул уурхайн сайдыг маань доромжилсоныг хамгаалаад  уул уурхайн яамныхаа албан ёсны байр суурийг гаргахгүй байх хорон санааг аль ч хэвлэлийнхэн агуулахгүй. Тэр ч утгаараа асуудалд хүндэтгэлтэй хандаж мэдэгдлийг нь нийтлэсэн.  Үйл явдал ингэж намжаад байтал Уул уурхайн дэд сайд О.Эрдэнэбулган “Financial Times” сонинд Уул уурхайн сайдыг “Dickhead” буюу тэнэг толгой гэсэн мэдээлэл гаргаагүй л дээ. FT сонинд албан ёсоор хандсан. Энэ сонины газраас манай яаманд хандаж хувь хүний блог байсан, манай сонин ийм зүйл нийтлээгүй гэдгээ албан ёсоор илэрхийлсэн. Энэ мэдээллийг нийтлэсэн Монголын зарим сайтууд буруу мэдээлэл гаргасандаа залруулга хийсэн” гэж мэдэгдэжээ. Мөн тус яамны төрийн захиргааны удирдлагын газрын дарга Д.Батболд УИХ-ын гишүүн Д.Хаянхярваад хандаж “Манай сайдыг Dickhead гээгүй, сайтууд худлаа мэдээлэл цацсан” гэсэн утгатай албан бичгийг илгээсэн байх юм.

Салбарынхаа ажлыг олигтой хийж, уул уурхай эдийн засгаа уналтаас гаргахын оронд “Dickhead”-д ямар их санаа зовно вэ? Сэтгүүлчид гэхээрээ л үргэлж худлаа зүйл бичиж, хүн гутаах ажлыг хийж явдаг улсууд уу? Сэтгүүлчгүй нэг өдөр амьдраад үзвэл яасан юм бэ? зэрэг асуултыг “Dickhead”-чин эрхмүүдэд дайж уг мэдээллийн уг сурвалжийн талаар тайлбарыг хүргэж байна.

Анх энэ мэдээлэл “Financial times” сонины албан ёсны цахим хуудас болох www.FT.com-д  2014 оны 03-р сарын 25-ны өдөр нийтлэгдсэн. Хувь хүний блог гэж хэлээд байгаа нь тус сайтын зохиогчийн буланд нийтлэгдсэнийг хэлээд байгаа юм. Хувь хүн гэж хэлээд байгаа нь тус сонины тусгай сурвалжлагч Dan Mccuram. Тэрээр 2013 оноос хойш тус сонинд тусгай сурвалжлагчаар ажиллаж байгаа бөгөөд Нью Иоркод хөрөнгийн бирж, сан, хөрөнгө оруулалт, менежментийн чиглэлээр нийтлэл бичдэг. “Citigroup”-д судалгааны мэргэжилтнээр ажиллаж байсан нэр хүндтэй эксперт юм. Тэрээр Торонто-д болсон хөрөнгө оруулагчдын чуулга уулзалтанд манай уул уурхайн сайдыг зарим хөрөнгө оруулагчид аргаа барсан тэнэг толгой гэж хэлсэн тухай бичсэн юм. Үүнийг л орчуулж олон нийтэд хүргэсэн. “Financial Times”-ийн албан ёсны веб хуудаснаас тусгай сурвалжлагчийнх нь бичснээр. Гэтэл сэтгүүлчдийг худал зүйл зориуд санаатайгаар бичсэн. Түүнийхээ төлөө уучлал гуйсан мэтээр уул уурхайн  яамны эрх мэдэлтнүүд ярьж явна.

Сэтгүүлчид юуг ч зохиогоогүй, худал мэдээллээгүй гэдгээ хамгаалж чадна. Харин уул уурхайн яамны эрх мэдэлтнүүд маань сэтгүүлчдийг худал мэдээлэл түгээж байна гэж гүтгэхийн оронд “Dickhead”гэж бичсэн нөхөртэйгээ энэ тухай ярьж, нэр төрөө хамгаалахаар олон улсын зохих байгууллагад хандах хэрэгтэй. Эсвэл үнэхээр “dickhead” гэдэгтэй нь эвлэрээд байгаа хэрэг үү?

Жич: “Dick” гэдэг нь англи хэлэнд эрэгтэй хүний бэлэг эрхтэн “head” гэдэг нь  толгой гэсэн утгатай үг. Манай хэлний логикд ийм этгээд үгийн жишиг байхгүй тул “Махан толгой” “Тэнэг толгой” гэж орчуулагддаг. 

О.Цагариг