Өнөөдөр АТГ-т  Авлигатай тэмцэх газрын дэргэдэх Олон нийтийн зөвлөлийн бүрэлдэхүүнийг томилох тухай Монгол Улсын Ерөнхийлөгчийн зарлигийг гардуулах ёслол болов. Өөрөөр хэлбэл, АТГ-ын ажил байдлыг давхар хянаад ард иргэд, төр засагт мэдээлэл хүргэх гүүр болсон уг албаны 15 гишүүнийг томилох ажил болов. 

Ерөнхийлөгчийн зарлигийг Ерөнхийлөгчийн Тамгын газрын дарга П.Цагаан, Ерөнхийлөгчийн Хүний эрх, хуулийн бодлогын зөвлөх Ч.Өнөрбаяр, Хэвлэл мэдээллийн албаны дарга П.Сайнбилэг нар шинээр томилогдсон гишүүдэд танилцуулж, Зөвлөлийн гишүүний үнэмлэхийг гардуулж, баяр хүргэлээ.

Энэ үеэр Монгол Улсын Ерөнхийлөгчийн зарлигаар АТГ-ын дэргэдэх олон нийтийн зөвлөлийн шинээр сонгогдсон гишүүд болоод хуучин ажиллаж байсан гишүүдэд Ерөнхийлөгчийн Тамгын газрын дарга П.Цагаан сайн сайхныг хүсээд Авлигалийн талаар зарим зүйлийг хэллээ.

Тэрбээр “Авлига гэдэг хэдэн мянган жилийн өмнө буюу Ромын эзэнт гүрний үед байсан. Авлига бол төр оршин тогтнохын эсрэг аюул занал юм. Авлигатай тэмцэж чадсан төр удаан оршин тогтносон. Харин авлигатай тэмцэж чадаагүй төр богино настай байсан түүх бий. Монгол Улс  НҮБ-ын авлигын эсрэг конвенцид нэгдэж орсон. Түүний дараагаар хөтөлбөр батлагдаж, хууль гарсанаар АТГ байгуулагдаад ажиллаж байгаа билээ. АТГ-ын дэргэд томилогдсон олон нийтийн зөвлөлийн гишүүд их хариуцлагатай ажил хийж байгаа. Тэд ард түмний нийтийн эрх ашгийн өмнөөс өндөр, хариуцлагатай үүрэг гүйцэтгэж байгаа АТГ-ыг хэрхэн яаж ажиллаж байна вэ гэдэг дээр хяналт тавих үүрэгтэй. Өөрөөр хэлбэл, ард иргэдийн өмнөөс АТГ-т хяналт тавих үүргийг хүлээж байна гэсэн үг. Өнөөдөр АТГ-ын талаар зөрчилтэй байр суурь нийгэмд бий болоод байна. Тэгэхээр олон нийтийн зөвлөл нь АТГ-т хяналт тавьж саар ажиллаж байгаа бол түүнийг нь илчилж, сайн ажиллаж байгаа бол түүнийг нь дэмжих үүрэгтэй. Дашрамд хэлэхэд, АТГ-ын ажилчин гэдэг төрийг цэвэр байлгах үндсэн үүрэгтэй хүмүүс. АТГ төрийн албан тушаалтан, эрх мэдэлтэн бүхий хүмүүс хуулиар хүлээсэн эрх ашгаа нийтийн тусын тулд ашиглаж байна уу эсвэл хувийн эрх ашигтаа ашиглаж байна уу гэдэгт анхаарлаа хандуулах ёстой байх. Ингэхийн тулд энд ажиллаж байгаа хүмүүс хүний халдашгүй эрх, өмчийн халдашгүй байдлыг сахих ёстой. Үнэхээр нийгэмд үлгэр дуурайлал болсон хүмүүс энд ажиллах байгаа байх гэж найдаж байна.
Харин Олон нийтийн зөвлөл нь АТГ, төр, ард түмний хоорондох итгэлцлийг бэхжүүлэх, хэрвээ буруу зөрүү байвал засаж залруулах үүрэгтэй хүмүүс.  Олон нийтийн зөвлөлийн гишүүдээр дамжуулж АТГ-ыг хэрхэн яаж ажиллаж байгаа талаар мэдээлэл авч хамтарч ажиллах болно” гэв.

Харин Ерөнхийлөгчийн Хүний эрх, хуулийн бодлогын зөвлөх Ч.Өнөрбаяр Ерөнхийлөгчийн зарлигийг уншиж танилцууллаа.